Ti ƀuôn Kép, dŭm klei bi hdơr kơ sa ênuk bi blah ăt mâo Rơ Châm Kóp lŏ wĭt lač hŏng klei ktưn hưn. Thŭn 1965, ñu nao hgŭm hlăm êpul kahan m blah dêč; dua thŭn êdei, ñu dưi mŭt Đảng leh anăn dưi jao ngă khua ƀuôn Kép. Hlăk anăn, bruă klam mơ̆ng ñu jing mtrŭt mjhar phung êdam êra nao hgŭm hlăm êpul kahan, mtrŭt mjhar mnuih ƀuôn sang đru mguôp mnơ̆ng ƀơ̆ng huă čiăng rông kahan mblah dêč, rông knuă druh mă bruă hlăm dliê.

"Kâo bi mŭt hlăm Đảng thŭn 1967, leh anăn dưi jao ngă khua ƀuôn, kiă kriê ƀuôn Kép. Hlăk anăn, bruă klam mơ̆ng kâo jing mtrŭt mjhar phung êdam êra nao mŭt kahan alŭ wăl, kahan phŭn; mbĭt anăn mtrŭt mjhar mnuih ƀuôn sang đru mguôp braih, mdiê, leh anăn mkŏ mjing hrui mă mdiê pioh rông kahan, rông knuă druh mă bruă hlăm dliê, mkŏ mjing êpul kahan ƀuôn hlăk anăn.”

Klei bi blah đuê̆ leh, phung tuôm đru mguôp răng mgang ƀuôn sang êlâo dih ară anei ƀuh ƀuôn sang bi mlih. Hŏng mnuih ƀuôn sang Ia Ly, ai tiê anăn dưi lŏ čuê hŏng klei čŏng ngă bruă, mkra mjing, jhŏng bi mlih klei mĭn, hdră ngă čiăng mđĭ hnư hrui wĭt.

Ti alŭ Ia Ping, lĭng kahan hđăp Bùi Quang Trung ruah leh gru hmô lu mnơ̆ng dhơ̆ng, pla pluă lu gưl ana kyâo, mơ̆ng durian, kphê truh kơ lu mta ana boh kroh mkăn. Hdră ngă anei dưi ba yua lăn leh anăn mnơ̆ng tŭ jăk, đru kơ gŏ sang mâo mnơ̆ng hrui wĭt hlăm grăp thŭn, bi hrŏ klei amâo jăk tơdah ênoh sa mta mnơ̆ng dhơ̆ng đĭ trŭn. Ayŏng Trung brei thâo, gru hmô lu mnơ̆ng dhơ̆ng ară anei ba wĭt hnư hrui wĭt hlăm brô 500 êklăk prăk grăp thŭn. Amâo djŏ knŏng mđĭ boh tŭ yua lăn, hdră ngă anei lŏ đru kơ gŏ sang čŏng pô hĭn ti anăp dŭm klei bi mlih mơ̆ng anôk mnia mblei mnơ̆ng dhơ̆ng lŏ hma.

“Kâo pla pluă mbĭt hŏng klei c̆iăng kơ mnơ̆ng pla bi đru hdơ̆ng găp, yan anei ƀơ̆ng mnơ̆ng anăn, mnơ̆ng anei jih yan snăn mâo ba wĭt mơ̆ng mnơ̆ng adih kyua anăn bruă duh mkra gŏ sang hơĭt kjăp hĭn.”

Leh mkŏ dăp anôk bruă knŭk kna, să Ia Ly mâo thiăm klei găl čiăng ba yua dŭm klei găl kơ wăl anôk leh anăn dhar kreh. Hiu čhưn ênguê êpul êya dưi alŭ wăl bi mklă jing sa hdră êlan čiăng mkŏ mjing thiăm hdră duh ƀơ̆ng. Wăl anôk dhar kreh Jarai, wăl anôk lăn mnga êa mơak mbĭt hŏng dŭm anôk truh msĕ si drai Công Chúa, drai Đá Cổ leh anăn knơ̆ng kdơ̆ng êa Ia Ly dôk dưi mkŏ čiăng mkŏ mjing dŭm mta mnơ̆ng dhơ̆ng hiu čhưn ênguê. Sang roong ƀuôn Kép bi leh hlăm gưl I thŭn anei ăt pŏk thiăm wăl anôk hdĭp mda êpul êya, mbĭt anăn mjing anôk jăk čiăng kơ phung tuê hiu čhưn ênguê tui ksiêm kơ dhar kreh alŭ wăl. Nguyễn Văn Ánh, Khua bruă Đảng să Ia Ly brei thâo, alŭ wăl bi mklă mđĭ kyar bruă duh mkra brei mguôp hŏng bruă kriê pioh leh anăn mđĭ lar dŭm boh tŭ yuôm knhuah dhar kreh djuê ana mơ̆ng đưm:

“Mđĭ lar knhuah gru să jhŏng ktang, să mđing kơ knhuah gru dhar kreh Jarai, tinei hmei mâo bruă hiu čhưn ênguê êpul êya čiăng mđĭ lar knhuah gru dhar kreh mơ̆ng mnuih Jarai. Ară anei mâo čar đru dŭm hdră ala čar kñăm snăn ti ƀuôn Kép dưi rŭ mdơ̆ng sang roong djuê ana, mkŏ hŏng bruă hiu čhưn ênguê lăn mnga êa mơak ti drai công chúa, drai boh tâo đưm, knơ̆ng kdơ̆ng êa Ia Ly, mâo dŭm knơ̆ng kdơ̆ng êa prŏng mơ̆ng ala čar.”

Mơ̆ng dŭm thŭn mlan bi blah răng mgang ƀuôn sang truh kơ hdră mkŏ mkra klei hdĭp mrâo hruê anei, ai tiê krŭ kdơ̆ng ti Ia Ly dôk dưi lŏ čuê hŏng dŭm bruă ngă klă klơ̆ng. Anăn jing kriê pioh knhuah dhar kreh, mlih mrâo bruă mkra mjing, mkiêt mkriêm prăk bi liê, răng mgang wăl hdĭp mda leh anăn ba yua tŭ dưn klei găl alŭ wăl. Dŭm hdră ngă anăn dôk đru mguôp bi mlih knhuah gru jing boh kdrŭt, mjing tur knơ̆ng čiăng kơ Ia Ly đĭ kyar hơĭt kjăp, kpưn đĭ hlăm ktuê êlan mrâo.