Anôk kriê pioh Tháp Nhạn čar Dak Lak giăm hriê knăm ngă yang vía Bà mâo lu snăk tue hiu čhưn. Amai Tống Thị Hải Yến, tue hiu čhưn hriê mơ̆ng Phú Thọ brei thâo, pô mrâo mâo sa hdră êbeh 180 km mơ̆ng Ƀuôn Ama Thuôt kyua anăn êmăn snăk. Đa đa tue hlăm êpul lui tour, amâo djăp klei suaih pral čiăng hlue si hdră hiu čhưn aguah hiu dlăng hlăm dliê, tlam truh ti êa ksĭ; aguah mnăm kphê Buôn Ma Thuôt, tlam dlăng nina hlăm Hòn Yến. Amai Yến brei thâo, klei bi kpleh plah wah dŭm anôk bi kbưi, êlan klông amâo jăk kyua anăn hruê mmông pioh kơ bruă tŭ klei găn êrô ba klei kpĭ kơ wưng hiu čhưn ênguê.

“Anei jing gưl tal êlâo pô hriê tinei snăn pô ƀuh krĭng lăn anei siam snăk, anak  mnuih jăk, hdră bruă ăt jăk mơh. Ƀiădah ăt adôk lu anôk dôk hrông, ka dưi bi leh klă klơ̆ng, ka mâo hdră bruă čiăng krơ̆ng tue hiu čhưn. Tơdah mđĭ kyar jăk snăn anôk anei adôk lu klei găl”.

 Hiu čhưn ênguê Dak Lak adôk hliê, ăt jing klei ksiêm dlăng mbĭt mơ̆ng lu anôk bruă duh mkra tue hiu čhưn, Dŭm kdrêč êlan kbưi, mnơ̆ng dhơ̆ng kƀah boh êlam ngă klei iêô jak tue hiu čhưn hrŏ. Mơ̆ng ƀuôn prŏng Ƀuôn Ama Thuôt ti nah Yŭ truh kơ êa ksĭ nahh Ngŏ êbeh 180 km. Mơ̆ng Ƀuôn Ama Thuôt truh kơ dŭm anôk hiu čhưn ênguê điêt hĭn, msĕ si Ênao Lăk, Ƀuôn Đon ăt kbưi hlăm brô 50km. Amai Phạm Bích Hạnh, bi ala kơ sa knơ̆ng bruă hiu čhưn ênguê ti ƀuôn prŏng Hồ Chí Minh brei thâo:

“Kdrêč êlan găn êrô kbưi đei, phung tue srăng êmăn snăk tơdah hiu dlăng mơ̆ng Ngŏ truh kơ Yŭ čar Dak Lak. Tơdah dưi mkra mlih êlan klông snăn hnơ̆ng tue hriê tinei srăng lu snăk.”

Trần Hữu Phước, anôk bruă hlue si tour hŏng ala tač êngao Việt – Lào brei thâo, boh kpleh prŏng, anôk bruă nah gŭ ka mkŏ hrăm mbĭt ngă kơ bruă mkŏ mjing tour mlir krĭng plah wah dliê leh anăn êa ksĭ adôk lu klei gun kpăk:

“Ară anei dŭm ktuê êlan mkŏ plah wah dap kngư leh anăn dŭm čar ktuê hang ksĭ kwar Krah adôk jhat”.

Hŏng bruă kơ êlan klông, hiu čhưn ênguê ti Dak Lak ăt dưi lač jing adôk kƀah boh êlam. Tue hiu čhưn truh ti dŭm anôk hiu čhưn dlăng ti Dak Lak, mă rup leh anăn đuĕ pral. Dŭm bruă dhar kreh ti lu anôk ăt ktrŏ kơ klei rang mdah, kƀah klei bi blŭ hrăm leh anăn kƀah hdră bruă bi ksung sui wưng dôk jưh, kyua anăn Dak Lak jing krĭng “kbưi snăn ênguôt- giăm snăn msĕ aguah tlam”. Dương Quốc Tuấn, pô atăt tue hiu čhưn ktuê êlan Lăn Dap Kngư - ktuê hang ksĭ kwar Krah brei thâo, klei msĕ ti lu anôk truh jing klei awăt hĭn ti Dak Lak.

“Bruă duh mkra mlam snăn adôk kƀah, ƀiă mâo anôk hlăp lêñ kyua klei mdê amâo dưi ngă bruă duh mkra mlam msĕ si Thái Lan ôh. Bi kơ wăl mnơ̆ng hdĭp snăn ară anei arăng mguôp klei blŭ jing mâo klei msĕ kơ wăl anôk kyua dŭm anôk msĕ si bi tui, ka mâo klei jăk siam mdê mdê ôh”.

Leh bi mŭt, Dak Lak mâo leh êa ksĭ, pŏk klei čang hmăng prŏng kơ hiu čhưn ênguê hlăm dliê - mnei êa ksĭ. Khădah snăn, ênoh rmô kơ prăl hrui wĭt ăt brei ƀuh sa boh sĭt amâo jăk. Hlăm gưl knăm mdei hruê 30/4 leh anăn 1/5 mrâo êgao, prăk hrui wĭt hiu čhưn ênguê Dak Lak mâo êbeh 520 êklai prăk, mâo hlăm brô mkrah wah Gia Lai, mâo sa kdrêč tlâo Lâm Đồng leh anăn hlăm brô sa kdrêč êma Khánh Hòa.

 Klei điêt awăt mơ̆ng hiu čhưn ênguê Dak Lak lŏ bi êdah hlăm hnơ̆ng jăk anôk bruă nah gŭ dôk jưh, hlăk êjai knŏng mâo 2 anôk bruă djăp hnơ̆ng čuăn 5 mtŭ; 4 anôk djăp hnơ̆ng čuăn 4 mtŭ, 9 anôk bruă djăp hnơ̆ng čuăn 3 mtŭ.

Dŭm anôk bruă hiu čhưn ênguê hing ang hĭn ti Dak Lak, msĕ si Ƀuôn Đon, Ênao Lắk, Sang kriê pioh, ênao Ea Kao... mâô ƀiă snăk klei đru mguôp hlăm klei đĭ kyar mbĭt mơ̆ng čar.

 Hlue si Nguyễn Thị Ngọc Anh,  Khua Êpul hgŭm phung mniê čar Dak Lak, hiu čhưn ênguê wăl anôk siam - êpul êya jing klei găl mơ̆ng čar, ƀiădah anôk bruă duh mkra knŏng jhŏng bi liê hnơ̆ng điêt kyua lăn hiu čhưn ênguê čar dôk brei mưn dôk kpĭ kơ ênoh lăn mnia blei hdră bruă. Tơdah Dak Lak amâo ruh mgaih klei dleh dlan gun kpăk anei, hiu čhưn ênguê ti čar dleh snăk tlaih mơ̆ng klei điêt hliê ară anei.

“Lu snăk hdră êlan kơ wăl hdĭp mda, lăn ala leh anăn dŭm klei kčah djŏ tuôm dôk jing klei gun kpăk hŏng phung bi liê jih ai tiê. Tơdah hdră êlan amâo djăp găl snăk snăn dleh snăk mâo dŭm hdră bruă hiu čhưn ênguê hnơ̆ng prŏng ƀiădah knŏng mđi’ kyar điêt hliê đuč”.