Blŭ hrăm hlăm klei kƀĭn trông, Khua Knŭk kna Lê Minh Hưng mñă kơ dŭm phŭn, dhar bruă leh anăn alŭ wăl srăng čŏng pô, mbruă, amâo mâo čang guôn čiăng rơ̆ng djŏ hdră kčah leh anăn hnơ̆ng jăk hdră bruă. Khua Knŭk kna mñă brei ngă djŏ hŏng hdră êlan, hră mơar hdră bhiăn, hluê ngă djŏ dŭm ênoh čuăn kơ klei êđăp ênang. mđĭ hĭn klei ba yua klei kreh knhâo mrâo mrang, mlih mrâo mbruă, bi mlih mrô leh anăn bi mlih mtah hlăm klei mă bruă, mtrŭt bi pral klei ngă bruă leh anăn mđĭ hnơ̆ng jăk hdră bruă.

Khua Knŭk kna mñă amâo dưi brei mâo klei amâo mâo jăk, klei ƀơ̆ng ngăn, luč liê mang ai dưi mơ̆ng Knŭk kna leh anăn yang ƀuôn. Khua Knŭk kna mñă kơ Phŭn bruă mkŏ mkra leh anăn dŭm alŭ wăl nao klă hŏng hdră, bi leh hră mơar mprăp kơ klei duh bi liê, bi klă klei hưn mdah dưi ngă leh anăn ruah phung duh bi liê hŏng dŭm hdră yuôm bhăn.