Blŭ hrăm gĭt gai klei bi kƀĭn, Khua gĭt gai Đảng, Khua Lăn čar Tô Lâm čih yap dŭm boh tŭ dưn êdah êdi mơ̆ng Knơ̆ng gĭt gai lĭng kahan gưl dlông, gưl bruă nah gŭ, khua gĭt gai dŭm gưl leh anăn knuă druh, lĭng kahan hlăm bruă hluê nhă dŭm bruă klam hlăm wưng êgao, mbĭt anăn mñă klă, hlăm wưng kơ anăp gưl bruă nah gŭ, khua gĭt gai dŭm gưl hyuă kjăp klei mĭn gĭt gai “Răng mgang lăn čar mơ̆ng hnưm, mơ̆ng kbưi srăng kčưm mơ̆ng klei thâo kral mơ̆ng hnưm, đăo tĭng kbưi leh anăn ngă bruă mơ̆ng êlâo”.

Khua gĭt gai Đảng, Khua Lăn čar Tô Lâm gĭt gai dŭm anôk bruă djŏ tuôm mơ̆ng Knơ̆ng gĭt gai lĭng kahan gưl dlông, Phŭn bruă lĭng kahan čiăng mđĭ hnơ̆ng jăk klei ksiêm duah, đăo tĭng hdră êlan, čŏng pô thâo kral dŭm klei arưp aram đưm leh anăn mrâo, klei arưp aram hlăm internet. Lŏ dơ̆ng mđĭ hnơ̆ng jăk klei bi hriăm, mprăp klei kdơ̆ng mblah, kiă kriê kjăp wăl adiê, krĭng êa ksĭ, knông lăn, lăn čar, internet, ktang phĭt răng mgang klei êngiê, klei dưi kiă kriê, hlur hlir, kluôm dhuôm lăn čar leh anăn boh tŭ dưn djuê ana.