Jing leh klei mưng, grăp aguah, Pang Tin Sin (djuê ana K'Ho) ti ƀuôn hgŭm Lang Biang - Đà Lạt, čar Lâm Đồng hâo hưn kơ klei mrâo hlăm đĭng blŭ thâo mĭn. Ñu pŏk app, nao čuă dŭm anôk mrô mơ̆ng Sang mđung asăp blŭ Việt Nam lehanăn duah truh kơ hdră mđung klei K'Ho. Dŭm klei hâo hưn ƀrư̆ ƀrư̆ lŏ wĭt hlăm đĭng blŭ hŏng klei blŭ djuê ana pô. Ñu ruah sa klei hâo hưn, mđing dlăng:

 Êpul bi ala bruă Đảng Cộng sản Việt Nam mâo Lê Hồng Quang, k'iăng khua hlăm phŭn bruă kđi čar ngă khua êpul nao čhưn leh anăn mă bruă ti Brasil".

Mâo hŏng anei 25 thŭn, Hdră klei K'Ho mơ̆ng Sang mđung asăp blŭ Việt Nam dưi mđung asăp. Mbĭt hŏng hdră mđung mơ̆ng đưm, dŭm hdră dưi bi lar hlăm hla pŏk web leh anăn dŭm anôk hlăm hla pŏk yang ƀuôn. Hla pŏk Facebook "Klei K'Ho VOV Lăn Dap Kngư" ară anei mâo êbeh 9.300 čô tui ksiêm. K' Si Môn -Khua Anôk bruă Mặt trận ƀuôn Lộc Bảo, să Bảo Lâm 5, čar Lâm Đồng brei thâo: dŭm klei hâo hưn kơ klei hdĭp, hdră êlan mơ̆ng Đảng, Knŭk kna leh anăn dŭm klei yăl dliê dhar kreh dưi dưm hŏng klei blŭ amĭ kkiêng hlăm dŭm anôk mrô mơ̆ng Sang mđung asăp blŭ Việt Nam, đru kơ mnuih ƀuôn sang ênưih hmư̆, ênưih thâo săng leh anăn ênưih nao hgŭm hĭn.

“Kâo nao hgŭm hlăm hdră mđung asăp blŭ klei K'Ho tal êlâo jing mơ̆ng Facebook. Mơ̆ng anăn kâo thâo lu hĭn klei hâo hưn hŏng klei K'Ho pô. Asei kâo pô ăt kreh pŏk dlăng leh anăn hmư̆ dŭm klei hâo hưn dưi mđung hŏng klei K'Ho, Mạ, kyuanăn kâo thâo lu hĭn. Hmăng hmưi mnuih ƀuôn sang djuê ana K'Ho, Mạ hmư̆ čiăng thâo lu hĭn klei hâo hưn hŏng klei blŭ djuê ana pô, mơ̆ng anăn đru mguôp hlăm bruă kriê pioh, răng mgang leh anăn mđĭ kyar klei blŭ djuê ana K'Ho, Mạ ƀrư̆ hruê ƀrư̆ đĭ kyar".

Amâo djŏ knŏng ba klei hâo hưn truh hŏng mnuih ƀuôn sang, hdră klei K'Ho mơ̆ng Sang mđung asăp blŭ Việt Nam lŏ đru kriê pioh klei blŭ mơ̆ng djuê ana. Cil Poh, Kiăng Khua Knơ̆ng bruă sang čư̆ êa ƀuôn hgŭm Lang Biang - Đà Lạt, čar Lâm Đồng lač, klei anei ƀrư̆ mâo boh tŭ yuôm hlăm klei hdĭp hruê anei, êjai sa kdrêč mnuih K'Ho wơr bĭt leh klei blŭ amâo dah amâo thâo čih boh hră djuê ana pô.

“Ară anei mâo sa kdrêč mnuih K'Ho amâo lŏ thâo blŭ, thâo čih klei blŭ djuê ana pô. Sang mđung asăp blŭ Việt Nam mđung hŏng klei K'Ho jing bruă yuôm bhăn êdi. Hâo hưn hŏng klei K'Ho đru kơ mnuih ƀuôn sang mđĭ klei thâo săng, thâo săng. Kâo čang hmăng Đảng, Knŭk kna lŏ dơ̆ng uêñ mĭn, mđĭ ktang mđung hŏng klei K'Ho čiăng đru mguôp kriê pioh leh anăn răng mgang klei blŭ K'Ho.”

Ti dŭm alŭ wăl dôk mâo lu klei dleh dlan, bruă ba klei hâo hưn klă sĭt truh hŏng mnuih ƀuôn sang hŏng klei blŭ djuê ana ƀiă jing yuôm bhăn hĭn. Ti să Dam Rông 4, čar Lâm Đồng, êbeh 90% ênoh mnuih ƀuôn sang jing mnuih djuê ƀiă, lu jing K'Ho Cil lehanăn M'Nông. Lơ Mu Ha Poh, kiăng khua bruă Đảng să Dam Rông 4 brei thâo: hŏng mnuih ƀuôn sang tinei, dŭm klei hâo hưn kơ hdră êlan mtrŭn mơ̆ng Đảng, knŭk kna, kơ klei hdĭp mda, bruă duh mkra lehanăn dhar kreh dưi bi lar hŏng klei K'Ho, M'Nông đru kơ mnuih ƀuôn sang ênưih thâo săng hĭn.

“Sang mđung asăp blŭ Việt Nam mđing dlăng, hrăm mbĭt hŏng gưl bruă Đảng, bruă sang čư̆ êa alŭ wăl. Boh nik, să Dam Rông 4 mâo lu mnuih ƀuôn sang djuê ana ƀiă K'Ho Cil lehanăn M'Nông. Sang mđung asăp blŭ hmao ba klei hâo hưn mơ̆ng alŭ wăl truh hŏng mnuih ƀuôn sang, mbĭt anăn hưn mthâo dŭm boh tŭ dhar kreh jăk siam mơ̆ng mnuih ƀuôn sang truh hŏng mnuih ƀuôn sang hlăm kluôm ala."

Êbeh 80 thŭn êgao, mơ̆ng hruê Sang mđung asăp blŭ Việt Nam kčưm mđung asăp tal êlâo, asăp mđung mơ̆ng Sang mđung truh leh hŏng djăp krĭng kwar lăn čar. Hŏng hdră mđung klei K'Ho mơ̆ng Anôk bruă dôk jưh ti krĭng Lăn dap kngư hluê ngă mâo leh 25 thŭn hrăm mbĭt hŏng mnuih ƀuôn sang. Lehanăn hlăk asăp K'Ho dưi mđung hlăm asăp mđung ala čar, dưi ba hlăm wăl anôk mrô, đru mguôp lar bra leh klei blŭ, dhar kreh mơ̆ng djuê ana pô hlăm tar rŏng lăn.