Klei iêô blŭ đĭng blŭ mjêč mơ̆ng să krĭng taih kbưi pŏk leh kơ sa gưl hiu hiu duah yuôm bhăn mơ̆ng Êpul hrui mƀĭn klang kleh phung djiê êngiă K51, Anôk bruă gĭt gai lĭng kahan čar Dak Lak. Ti krah klei kdlưn hĭn mơ̆ng "Hdră 500 hruê mlam hrui mƀĭn klang kleh phung êngiă asei”, djăp klei mnuih ƀuôn sang hưn jing sa klei mtrŭt mjhar phung lĭng kahan nao ngă bruă. Anôk truh tal anei jing sa pưk hma kbưi dôk ti ktuê êlan krŭ kdơ̆ng Dinh Điền - să Khuê Ngọc Điền hđăp, ară anei jing să Krông Bông – krĭng lăn kđông kahan hđăp bŏ hŏng klei suăi êmăn.

Leh 3km êlan kdrăn lŏ leh anăn giăm 1km êbat jơ̆ng đĭ kngư, phung lĭng kahan nao ti đang kphê ti gŭ jơ̆ng čư̆ Yang Sin. Djơ djĕ kuai dŭm tal lăn hlue si klei mnuih ƀuôn sang ktrâo, diñu mơak leh klei grăp tal ƀaih, grăp kdrêč klei kă asei atâo rai leh găn gao dŭm thŭn mlan ƀrư̆ êdah. Đại úy Nguyễn Duy Thuận, hlăm êpul K51 brei thâo:

Hmei ngă răng snăk, mă kngan leh anăn mă mnơ̆ng bi lik lăn, lu êgei leh anăn knŭt ai sui hruê brŭ leh, ƀuh pap snăk kơ digơ̆. Ayŏng adei ƀuh snei mơak snăk leh anăn mgei ai tiê mơh.”

Klei bi blah đuĕ kbưi leh, ƀiădah klei ênguôt hnĭng leh anăn bruă klam hŏng phung djiê leh snăn ka tuôm jih ôh. Bi hŏng Đại úy Y Nhai Drao, ñu mâo leh giăm 20 thŭn siă suôr hŏng bruă hrui mƀĭn klang kleh phung djiê êngiă, grăp blư̆ sô̆ hlăm klang kleh phung êngiă asei jing sa blư̆ ƀuh klei mgei ai tiê amâo thâo lŏ pia ôh.

“Anei jing klang lĭng kahan djiê êngiă, hmei hơ̆k mơak êdi, amâo mdê hŏng mnuih hlăm sang pô ôh. Pô jing anak čô ngă bruă klam, jing sa kdrêč kyua asăp mtrŭn mơ̆ng ai tiê yơh... Kâo pô sô̆ djŏ hŏng klang phung awa mgei ai tiê snăk amâo mâo blŭ ôh, mâo blư̆ hia amâo hmư̆ ênai, knŏng êa ală luh yơh.”

Klei bi kƀĭn mjưh ruê̆ hlăk mđiă yang hruê dơ̆ng lĕ ti lăn dliê. Boh tŭ, êpul ngă bruă klam dưi kuai ba wĭt 2 klang lĭng kahan djiê êngiă, mbĭt hŏng dŭm mta mnơ̆ng msĕ si ƀaih, dŭm kdrêč mơ̆ng kdrăp hâo hưn êlan kbưi leh anăn mnơ̆ng yua grăp čô rai leh hlăm thŭn mlan găn êgao.

Kdô kahan đŭng mâo phung lĭng kahan pioh hŏng klei mpŭ prŏng prĭn. Nguyễn Hoàng Quang, K’iăng khua anôk bruă sang čư̆ êa să Krông Bông, bi mklă bŏ hŏng jih ai tiê:

“Anei jing wưng jih hnơ̆ng hlue ngă hdră 500 hruê mlam. Krông Bông jing krĭng bi blah hđăp, klei bi blah tinei ktang snăk. Hluê hŏng tur knơ̆ng klei hâo hưn mơ̆ng mnuih ƀuôn sang leh anăn klei bi mguôp mơ̆ng êpul K51, hmei srăng lŏ dơ̆ng mtrŭt mđĭ bruă hâo hưn, si srăng ngă čiăng mâo boh tŭ dưn hĭn čiăng ba wĭt anăn knăl, atăt phung khua mduôn, awa mduôn wĭt hŏng ƀuôn sang, hŏng ƀĭng kahan.”

Čiăng đru kơ bruă bi mklă anăn, êpul djŏ tuôm hrui mă leh mta êgei, mta klang mkăp kơ bruă ksiêm dlăng AND. Leh ngă ruê̆ bruă kuai mă, dua klang kleh lĭng kahan djiê êngiă mbĭt hŏng mnơ̆ng yuôm dưi ba wĭt ti wăl msat lĭng kahan djiê êngiă Krông Bông. Bruă bi kƀĭn tŭ jing 2 klang kleh phung djiê êngiă jing boh tŭ mơ̆ng klei bi mguôp kjăp plah wah êpul lĭng kahan hŏng gưl bruă Đảng, bruă sang čư̆ êa alŭ wăl, boh nik jing dŭm klei hưn yuôm bhăn mơ̆ng mnuih ƀuôn sang mkăp brei. Djăp klei hâo hưn, wăt tơdah điêt, dưi jing anôk yuôm bhăn đru bi mklă anôk dơr lĭng kahan djiê êngiă, đru ba phung ayŏng wĭt hŏng ƀĭng kahan leh anăn ƀuôn sang.

Ară anei êpul K51 lŏ dơ̆ng pŏk phai anôk ksiêm dlăng ti krĭng čư̆ Jŭ hluê hŏng dŭm klei hưn mơ̆ng mnuih ƀuôn sang, hŏng klei gĭr tui duah, bi kƀĭn djăp klang lĭng kahan djiê êngiă dôk ti kdrăn mblah đưm, đru ngă jăk hdră êlan đru kơ lĭng kahan leh anăn klei bhiăn "Mnăm êa hdơr kơ hnoh", "hdơr knga tla ai" mơ̆ng djuê ana.

Hdră êlan mơ̆ng Hdră bruă 500 hruê mlam tui duah klang phung djiê êngiă ăt dôk nanao. Leh anăn srăng lŏ mâo lu blư̆ đĭng blŭ dơ̆ng kwang ti krah dap kngư. Leh anăn ti anôk mkŏ nah dih, phung lĭng kahan K51 ti čar Dak Lak, lŏ dơ̆ng djă kdô, nao ngă bruă. Kyua hŏng diñu, anăn amâo djŏ jing bruă klam ôh, ƀiădah jing asăp mđĭ ai mơ̆ng ai tiê./.