Ti kdrŭn ksĭ kahan Cam Ranh, phung mă bruă hô̆ mur 189 kahan êa dôk hriăm kơ dŭm hdră êlan kdơ̆ng mblah. Hŏng phung knuă druh, phung mă bruă hlăm anăn, ngă pô hô̆ mur Kilo 636 mrâo mrang amâo djŏ knŏng jing klei ktưn hưn ôh ƀiădah lŏ jing bruă klam yuôm bhăn. Hŏng anăn pia “ƀăng jŭ êa ksĭ”, hô̆ mur Kilo 636 mâo ai dưi kdơ̆ng mblah mrâo mrang, čiăng kơ knuă druh, phung mă bruă srăng thâo klă, ngă pô leh anăn ba yua tŭ dưn čiăng bi mguôp hŏng dŭm êpul bruă, răng mgang kjăp klei dưi kiă kriê êa ksĭ, plao ksĭ lăn čar Thượng tá Hàn Văn Hiếu, khua gĭt gai Hô̆ mur 182-Hà Nội brei thâo:

 "Hmei dlăng kơ bruă bi hriăm jing mta knăm, mă klei ngă bruă jing phŭn, hriăm mjuăt hlăm boh sĭt klei kdơ̆ng mblah čiăng mđĭ klei mprăp kdơ̆ng mblah, ngă pô hô̆ mur mrâo mrang, mprăp klam ngă leh anăn bi leh jăk bruă klam, răng mgang kjăp klei dưi kiă kriê êa ksĭ, plao ksĭ Lăn čar.”

Hŏng boh sĭt jing anôk bruă mdê hĭn, grăp gưl nao ti êa ksĭ jing sa klei lông dlăng. Phung knuă druh, phung hlăm hô̆ mur lu hruê mlam amâo mâo ƀuh yang hruê. Hlăm anôk kniă kniêt, kƀah êwa. Knŏng sa klei soh điêt đuč ăt hmăi truh klei êđăp ênang kơ hô̆ mur. Hluê si Nguyễn Văn Thuân, khua bruă kđi čar hô̆ mur 183 – ƀuôn prŏng Hồ Chí Minh brei thâo: Êngao kơ klei thơ̆ng kơ bruă, lĭng kahan hlăm hô̆ mur lŏ mâo knhuah kđi čar kjăp leh anăn klei mĭn kjăp čiăng ngă bruă klam hlăm gŭ êa ksĭ êlam.

 Bruă hmei ngă jing bruă klam mdê hĭn, ti hô̆ mur grăp čô msĕ sa, jih jang knuă druh, lĭng kahan bi mguôp jing sa êpul. Knŏng mâo sa čô mgei klei mĭn, kƀah klei kjăp srăng hmăi truh hŏng jih jang phung dôk hlăm hô̆ mur leh anăn hmăi klă anăp kơ bruă klam mbĭt mơ̆ng anôk bruă. Kyuanăn, êlâo kơ grăp gưl nao ngă bruă, jih jang lĭng kahan ti hô̆ mur srăng mâo klei mĭn msĕ, mbĭt mta kñăm, mkŏ mjing knhuah hdĭp kđi čar kjăp, krơ̆ng kjăp klei bi mguôp, sa ai leh anăn klei gĭr hĭn čiăng bi leh jăk grăp bruă klam dưi jao.

Ƀiă pô thâo dŭm gưl nao hlăm êa ksĭ êđăp ênang hruê anei, dŭm gưl phung mă bruă mơ̆ng Lữ đoàn 189 kahan êa găn leh lu klei dleh dlan. Mơ̆ng bruă hriăm klei blŭ tuê, bi mưng hŏng dŭm boh blŭ dleh truh kơ kdrăp mrâo mrô 1 tar rŏng lăn…Jih jang jing klei lông dlăng prŏng. Trung tá Nguyễn Đình Danh, hô̆ mur 186 - Đà Nẵng brei thâo:

 Mơ̆ng mphŭn dlăng hră mơar thơ̆ng kơ bruă, hmei hur har ksiêm duah, bi trông hluê si grăp êpul, grăp anôk bruă, leh anăn ba yua dŭm klei hriăm hlăm lăn čar bi mguôp hŏng dŭm hdră hriăm ti ala tač êngao čiăng pral thâo kơ klei hriăm. Êjai ngă bruă sĭt hlăm grăp kdrăp, hmei yua jih mmông čiăng hriăm bi êran , thâo klă hdră ba yua, bi êran leh anăn lŏ mkra wĭt dŭm kdrăp yua anăn. Kyuanăn, knuă druh, phung mă bruă dưi pral ngă pô phao ktuang, kdrăp yua mrâo mrang.

Mơ̆ng dŭm adŭ hriăm tal êlâo dôk ngĭ ngơ̆ mơ̆ng phung mă bruă hlăm hô̆ mur ti Russia, mơ̆ng dŭm hruê ti anôk bi blah, anôk masin truh ti anôk bruă bi hriăm hô̆ mur ti Cam Ranh leh anăn ti gŭ êa ksĭ êlam, truh kơ ară anei knuă druh, phung mă bruă Lữ đoàn 189 klă sĭt ngă pô dŭm hô̆ mur Kilo 636 mrâo mrang. Thượng tá Phan Thanh Quang, k’iăng khua êpul, khua kcĕ bruă, lữ đoàn hô̆ mur 189 brei thâo:

Dŭm thŭn êgao, Lữ đoàn jêñ jêñ mtrŭt mđĭ bruă mtô mjuăt kđi čar, klei mĭn, mjing tur knơ̆ng mđĭ klei mĭn gĭr ktưn leh anăn ai tiê bruă klam hlăm klei ngă bruă, kñăm kơ mtô mjuăt knhuah gru, klei ktưn hưn dưi đru bruă, duh myơr hlăm êpul bruă, bi râo klei khăp čiăng, klei hur har, klei mĭn, bruă klam mơ̆ng knuă druh, phung mă bruă hlăm klei hriăm leh anăn mă bruă. Bi lar knhuah gru “Bi mguôp, hdră bhiăn, hgăm, dưi” mơ̆ng anôk bruă lĭng kahan yang ƀuôn, knuă druh, lĭng kahan Lữ đoàn hô̆ mur 189 srăng lŏ dơ̆ng bi mguôp, čŏng pô msir klei dleh dlan, gĭr bi leh jăk bruă klam dưi jao, đru răng mgang kjăp klei dưi kiă kriê êa ksĭ, pla ksĭ Lăn čar.

Hlăm wưng ară anei, bruă klam răng mgang klei dưi kiă kriê lăn čar mơ̆ng tur êa ksĭ mơ̆ng Lữ đoàn 189 kahan êa ƀrư̆ hruê ƀrư̆ ktrŏ. 15 thŭn - sa bĭt êlan ka taih ôh ƀiădah djăp čiăng bi klă kơhưm mơ̆ng sa êpul thơ̆ng kơ bruă mơ̆ng kahan êa yang ƀuôn Việt Nam. Ti krah êa ksĭ, phung lĭng kahan hô̆ mur ăt duh myơr, gak răng êa ksĭ lăn čar. Phung lĭng kahan mdê hĭn hlăm sa anôk bruă mdê - lŏ čih kač Klei mmuñ jhŏng ktang răng mgang êa ksĭ mơ̆ng tur êa, răng mgang klei dưi kiă kriê êa ksĭ, plao ksĭ, hang ksĭ lăn čar.