Lăn Dap Kngư truh leh yan hjan. Ti anôk rŭ mdơ̆ng sang hră Knŭk kna rông ba mlir gưl hriăm ti să knông lăn Thuận An, čar Lâm Đồng ai êwa mă bruă dôk mjêč êdi. Nguyễn Thành Long, khua êpul ngă bruă brei thâo, ară anei mâo hlăm brô 270 čô mă bruă, kỹ sư mbĭt hŏng 20 êdeh êdâo, masin dưi mbha jing lu êpul mjêč pơ̆ng tôl, mdơ̆ng mtih, hli lăn ti mkra êlan hlăm sang hră, bi tiŏ êran hŏng mnĭt mmông čiăng rơ̆ng djŏ hŏng hdră kčah. Khădah tuôm hŏng klei kƀah mnuih mă bruă, ênoh mnơ̆ng yua đĭ mơ̆ng 20-30%, phung ngă bruă ăt mbruă tiŏ nao phung mă bruă, bi hơĭt klei mkăp brei čiăng rơ̆ng djŏ hdră kčah, gĭr bi leh hdră djŏ mmông kčah.

“Hruê hjan hme tô, măl matit leh anăn măl êa mil hlăm lam, bi hruê amâo mâo hjan hmei mă dŭm mta bruă nah êngao, pơ̆ng čuôr, rơ̆ng djŏ hŏng hdră kčah. Klă klơ̆ng, sang S1 dưi bi leh  70%, S7 leh leh leh anăn akŏ hruê kăm êdei srăng kpơ̆ng tôl, bi S10 dôk mdơ̆ng sang tal 2, 3, bi mnư̆ dưi ngă leh. Hmei srăng gĭr truh hruê 30/7 ti anăp srăng ba jao hdră bruă anei.”

Hà Sỹ Sơn, Khua êpul kiă kriê hdră duh bi liê leh anăn rŭ mdơ̆ng mrô 3 čar Lâm Đồng, pô duh bi liê hdră brei thâo, kluôm čar mâo 5 sang hră Knŭk kna rông ba mlir gưl hriăm. Hlăm anăn, mâo 2 sang hră ti să knông lăn Thuận An leh anăn Quảng Trực mphŭn čô knhal jih thŭn 2025 dôk tiŏ nao jih hnơ̆ng phung mă bruă, mă bruă hruê mlam čiăng djŏ hŏng hdră kčah. Ti anăp klei mnơ̆ng yua đĭ yuôm, kƀah mnuih mă bruă, yan adiê dleh ksiêm dlăng. Êpul ngă bruă ksiêm dlăng hluê grăp mlan, đa đa hluê hruê kăm, mbĭt anăn mkra mlih ênoh ênil čiăng brei čan đruy kơ phung ngă bruă, gĭt bi leh bruă mkŏ mkra êlâo hruê 30/7.

 “Êpul kiă kriê hdră mbĭt hŏng dŭm anôk rŭ mdơ̆ng ngă bruă klă čiăng ksiêm dlăng grăp hruê, grăp hruê kăm čiăng duah hdră êlan mtrŭt mđĭ klei ngă bruă, gĭr bi mâo djŏ hŏng hdră kčah. Bi hŏng dŭm kdrăp mtô leh anăn hriăm mbĭt hŏng dŭm kdrăp mnơ̆ng yua mkăn, hmei ngă leh hră kuôl kă blei yua hŏng dŭm anôk mkăp brei, diñu ăt bi tiŏ êran čiăng mkra mjing, blei mnia kdrăp yua čiăng leh rŭ mdơ̆ng srăng nao dưm mtam. Mta kñăm jing djăp mta dưi bi leh êlâo kơ wưng mŭt hlăm thŭn hriăm mrâo.”

Mbĭt hŏng anôk rŭ mdơ̆ng dôk bi tiŏ êran hŏng hdră kčah, bruă mprăp kơ mnuih mă bruă leh anăn ruah phung hđeh sang hră dôk dưi ngă mjêč. čiăng rơ̆ng kơ klei mtô bi hriăm êjai sang hră ngă bruă, knơ̆ng bruă sang hra mơar čar Lâm Đồng bi mguôp hŏng dŭm să dăp phung nai mtô. Mbĭt anăn dŭm să čŏng pô ngă hdră êlan ruah hđeh sang hră djŏ klei čuăn, djŏ pô leh anăn mkŏ mjing hdră êlan ruah phung mă bruă, phung kiă kriê, đru nah tluôn êjai mâo Bruă sang čư̆ êa čar Lâm Đồng bi klă hdră êlan.

Hồ Sĩ Hải, Khua adŭ bruă dhar kreh - yang ƀuôn să Quảng  Trực brei thâo, Sang hră Knŭk kna rông ba mlir gưl hriăm ti să leh rŭ mdơ̆ng săng drông hlăm brô 900 čô hđeh sang hră, hŏn 18 adŭ gưl 1 leh anăn 12 adŭ gưl 2. Ară anei să bi mlih leh 32 čô nai mtô, bi 19 čô adôk srăng ruah hŏng hră kuôl kă, mbĭt hŏng 10 anôk bruă kiă kriê, bruă Knŭk kna, nah tluôn, hdră mnêč…srăng dưi ruah hlăm wưng kơ anăp.

“Čiăng mkŏ dăp phung hđeh sang hră mâo djăp klei găl hlăm sang hră Knŭk kna rông ba, hmei ngă bruă hrŏng ruah hđeh sang hră hŏng hdră ngă hră ksiêm dlăng truh hŏng jih jang gŏ sang mâo anôk hlăm ênuk thŭn nao sang hră, dôk hriăm ti dŭm sang hră ti alŭ wăl să. Hŏng tur knơ̆ng anei, tơdah mâo klei čiăng, phung hđeh srăng nao hriăm ti sang hră Knŭk kna rông ba. Hmei hluê si dŭm klei čuăn, hdră bhiăn čiăng ruah djŏ pô. Ară anei mâo êbeh 90% phung amĭ ama djăp klei găl lŏ wĭt mơĭt hră ksiêm dlăng, hmăng hmưi phung anak dưi nao hriăm ti sang hră Knŭk kna rông ba.”

Mơ̆ng hdră êlan găl guôp mơ̆ng Đảng, Knŭk kna mbĭt hŏng klei gĭr mơ̆ng phung duh bi liê, dŭm anôk ngă bruă leh anăn alŭ wăl, hlăm brô 1.800 čô hđeh sang hră krĭng knông lăn čar Lâm Đồng srăng hnưm dưi nao hriăm, huă ƀơ̆ng hlăm sang hră siam, mâo djăp kdrăp yua. Dŭm sang hră mrâo amâo djŏ knŏng đru kơ klei hmăng hmưi phung hđeh sang hră krĭng knông lăn, ƀiădah lŏ đru mkŏ mjing mnuih mă bruă hlăm êdei anăp, hrăm mbĭt mkŏ mjing knông lăn Lâm Đồng ƀrư̆ hruê ƀrư̆ mdrŏng siam, mrâo mrang, jing anôk hơĭt kjăp ti krĭng knông lăn ala Čar./.