Ti dŭm sang hră ti ƀuôn hgŭm Tiến Thành (krĭng wăl ƀuôn prŏng Phan Thiết, Bình Thuận hđăp), dŭm klei dleh dlan hlăm bruă yua hdră mrô dôk dưi ruh mgaih čiăng ba klei tŭ dưn klă sĭt hĭn. Jih jang sang hră gưl sa, gưl dua mâo leh adŭ mtô tin học dưi mprăp măi  tính čiăng ksiêm dlăng anăn hdruôm hră găl ênưih hĭn. Phung nai yua leh kdrăp mrâo hâo hưn hlăm klei mkra mjing klei čih, mkŏ mjing hră mtô điện tử. Hrô kơ yua jhưng jŭ hla krei kô̆, mmông mtô mơ̆ng nai  Doãn Kim Trúc, nai mtô sang hră gưl sa Đức Long, ƀuôn hgŭm Tiến Thành dưi yua ênoh mrô hŏng dŭm kdrăp, rup, video jăk siam snăk.

 “Kâo pô ăt msĕ snăn mơh, tơdah dưi hriăm ƀiădah mâo rup, jing jăk hĭn, ƀuh khăp hĭn. Đa đa hđeh sang hră ka mưng ôh hŏng sang hră gưl sa, snăn bruă ngă anăn đru kơ phung hđeh ênưih hriăm hĭn”.

Sang hră gưl sa Đức Long, ƀuôn hgŭm Tiến Thành mâo dua sang hră, kyua mâo tur knơ̆ng mrô kyua anăn dŭm bruă kriê dlăng knuă druh, nai mtô, phung mă bruă leh anăn hđeh sang hră ăt găl ênưih hĭn hlăm dŭm êpul hla pŏk web ala ƀuôn.

Võ Thanh Long, Khua sang hră gưl sa Đức Long, ƀuôn hgŭm Tiến Thành brei thâo:

“Sang hră dôk yua dŭm kdrăp ba yua hlăm klei ngă bruă msĕ si: kdrăp kriê dlăng tur knơ̆ng mrô, kdrăp hrui mă prăk mơ̆ng phung amĭ ama leh anăn phung amĭ ama mơĭt leh prăk mơ̆ng kdrăp anei. Sang hră mđĭ thiăm mkŏ dăp msĕ si sang dlăng hră pă boh măi tíng kơ hđeh sang hră hlăm mmông hlăp lêñ ksiêm dlăng hâo hưn kơ phung hđeh brei duah thiăm hlăm Google čiăng thâo thiăm.”

Dŭm sang hră mkăn ti ƀuôn hgŭm Tiến Thành ăt ba yua leh kdrăp mrô mơ̆ng bruă kriê dlăng hđeh sang hră, jao klei ngă, čih mkra hră mtô truh kơ mkŏ mjing klei mtô bi hriăm hlăm adŭ. Boh nik, bruă ba yua kdrăp mtrang leh anăn kdrăp mnơ̆ng điện tử hlăm grăp mmông hriăm đru kơ klei mtô jing jăk hĭn, mđĭ klei dưi mŭt klei hriăm leh anăn klei phung hđeh dưi hdơr.

Phạm Thái Hùng, K’iăng Khua sang hră gưl dua Nguyễn Đình Chiểu brei thâo, êlâo dih dŭm ênoh mrô sang hră lu jing pioh hŏng mơar snăn ară anei jih jang dưi yua ênoh mrô leh anăn pioh hlăm kdrăp mơ̆ng VNPT.   

 “Sang hră ăt dôk ksiêm dlăng mâo ya kdrăp tŭ dưn, êlưih leh anăn hgăm, ksiêm dlăng tơdah mâo klei găl snăn kriê dlăng boh klei hđeh ba đĭng blŭ hlăm sang hră čiăng ngă klei hriăm si ngă. Kyua phung hđeh sang hră tinei ăt adôk lu klei dleh dlan, amâo djŏ grăp gŏ sang mâo đĭng blŭ thâo mĭn sơăi kơ anak pô yua hlăm klei hriăm hră ôh. Ƀiădah tơdah djăp klei găl kơ phung hđeh mkra klei hriăm hlăm măi tính amâodah đĭng blŭ srăng dưi bi hrŏ lu kdrêč mkăn.”

 Dŭm sang hră ti Tiến Thành čang hmăng, čiăng kơ bruă bi mlih mrô klă sĭt leh anăn tŭ dưn hĭn, bruă djŏ tuôm brei lŏ dơ̆ng mkŏ mjing klei mtô bi hriăm mđĭ klei thâo, klei dưi ba yua kdrăp phần mềm kơ phung nai. Mbĭt anăn mâo hdră msir hŏng dŭm phần mềm yua liê prăk. Êngao anăn, tur knơ̆ng mrô kơ mnuih ƀuôn sang hnưm bi leh, djŏ klă čiăng kơ dŭm sang hră bi leh hră mơar sang hră mrô.