Leh sa thŭn hluê ngă, čar Lâm Đồng bi leh bruă bi kjăp phung mă bruă mơ̆ng čar truh nah gŭ. Leh mkŏ dăp, dŭm anôk bruă hrŏ lu, hlăm anăn êpul bruă Đảng hrŏ 66,6%, êpul bruă knŭk kna hrŏ 61,9%, kluôm čar bi leh bruă ktrâo ruah gưl bruă Đảng nah gŭ, khua Êpul gơ̆ng bruă ƀuôn sang, Bruă sang čư̆ êa ti 124 să, ƀuôn hgŭm, anôk bruă knơ̆ng leh anăn tiŏ nao êbeh 730 knuă druh, phung mă bruă knŭk kna kơ nah gŭ.

Mbĭt hŏng bruă mkŏ dăp, čar mtrŭt mđĭ klei mlih mrâo hră mơar knŭk kna, bi mlih mrô, bi hrŏ hlăm brô 30% hră mơar, 100% bruă knŭk kna online kluôm čar dưi mâo hlăm jar. Bruă drông mnuih ƀuôn sang, msir klei kčŭt hưn dưi rơ̆ng kjăp, bruă kđi čar yang ƀuôn, lĭng kahan, klei êđăp ênang dưi krơ̆ng kjăp.

Bi klă klei ngă bruă, Y Thanh Hà Niê Kđăm, Khua hlăm bruă Đảng gưl dlông, khua bruă Đảng čar Lâm Đồng mñă ktang, klei bi kjăp bruă knŭk kna alŭ wăl 2 gưl jing bruă klam mjêč, sui, amâo djŏ knŏng bi hluh ai dưi mđĭ kyar ƀiădah lŏ mđĭ hĭn hdră bhiăn leh anăn bruă klam mơ̆ng pô ba anăp. Ƀiădah, êngao kơ dŭm boh tŭ dưn ăt čiăng dlăng klă adôk mâo lu klei dleh dlan, lông dlăng, klei kƀah čiăng dưi ksiêm duah, mgaih msir.

“Êngao kơ dŭm boh tŭ dưi mâo, êpul mă bruă mâo leh klei hơĭt ƀiădah ka klă sĭt kluôm dhuôm wăt gưl čar leh anăn să. Bruă dăp knuă druh đa đa anôk adôk ngĭ ngơ̆, đa đa anôk dôk kƀah, ka ênŭm. Hnơ̆ng jăk knuă druh ka mtăp mđơr, boh nik jing gưl să. Đa đa anôk ka thơ̆ng kơ bruă, ka jăk thâo msir bruă knuă. Bruă mkŏ kah mbha leh anăn ba yua klei čih pioh ka sa hnơ̆ng. Mkŏ mjing klei čih pioh mbĭt đru kơ klei gĭt gai adôk êmưt. Bruă mkŏ mkra leh anăn ai ba yua ka djăp klei čuăn.

Blŭ gĭt gai hlăm klei kƀĭn, Khua hlăm bruă Đảng gưl dlông, Khua phŭn bruă kiă kriê bruă knuă Đỗ Thanh Bình bi myuôm ai tiê čŏng pô, ktang phĭt mơ̆ng Lâm Đồng hlăm bruă ngă gru hmô mrâo, boh nik jing tiŏ nao knuă druh kơ gưl nah gŭ leh anăn mtrŭt klei mbha klei dưi, mbha gưl. Ƀiădah, alŭ wăl ăt dôk tlă anăp hŏng klei kpĭ prŏng kyua alŭ wăl prŏng, mnuih ƀuôn sang lu, lu knuă druh mă bruă kbưi hŏng sang gŏ, êjai ênoh mnuih mă bruă, kdrăp mrâo leh anăn hdră êlan ka hmao tiŏ klei čiăng hlăm boh sĭt.

Khua hlăm bruă Đảng gưl dlông, Khua phŭn bruă kiă kriê bruă knuă Đỗ Thanh Bình lač, hlăm wưng kơ anăp, khua gĭt gai čar Lâm Đồng čiăng lŏ ksiêm dlăng, bi kjăp mnuih mă bruă, mđĭ hnơ̆ng jăk knuă druh, mtrŭt mđĭ klei bi mlih hră mơar knŭk kna, bi mlih mrô, mđĭ klei mbha gưl nao mbĭt hŏng ksiêm dlăng leh anăn mă klei ư ai mơ̆ng mnuih ƀuôn sang, knơ̆ng bruă jing giê mkă klei ngă bruă mơ̆ng bruă knŭk kna dua gưl.

“Ti anăp adôk lu bruă klam ktrŏ čiăng kơ Lâm Đồng srăng lŏ mlih mrâo ktang, klă klơ̆ng hĭn, bi lar ai tiê bi mguôp, čŏng pô, ktang hlăm klei mă bruă. Kñăm msir dŭm klei dleh dlan, kpăk gun čiăng ba bruă knŭk kna 2 gưl ngă bruă ƀrư̆ hruê tŭ dưn hĭn, bi mâo djăp klei čiăng đĭ kyar pral leh anăn hơĭt hlăm wưng kơ anăp. Phŭn bruă kiă kriê bruă knuă srăng bi mguôp kjăp, mbĭt hŏng čar čiăng msir klei dleh dlan, čiăng ba bruă knŭk kna 2 gưl ngă bruă ƀrư̆ hruê tŭ dưn hĭn, klă klơ̆ng hĭn.”