Ti Gia Lai, Knơ̆ng bruă sang čư̆ êa čar mrâo ksiêm dlăng bruă klam  mjêč thŭn 2026, hlăm anăn bi mklă bi liê anôk bruă nah gŭ knơ̆ng kdơ̆ng êa jing sa hlăm dŭm bruă klam phŭn mơ̆ng bruă lŏ hma, krĭng ƀuôn sang. Tlâo hdră bruă knơ̆ng kdơ̆ng êa hnơ̆ng prŏng hŏng ênoh prăk bi liê hlăm brô 810 êklai prăk srăng dưi pŏk ngă hlăm wưng 2026-2030 kñăm msir mgaih klei čiăng kơ êa mkra mjing leh anăn hdĭp mda kơ krĭng nah Yŭ čar, anôk adôk lu klei găl mđĭ kyar bruă lŏ hma ƀiădah anôk bruă nha gŭ knơ̆ng kdơ̆ng êa ka ngă djŏ klei čiăng.

 Hlue si hdră kčah, hdră bruă knơ̆ng kdơ̆ng êa Djang ti să Kbang rơ̆ng êa krih kơ êbeh 800 ha lăn lŏ hma leh anăn mkăp êa yua grăp hruê kơ hlăm brô 3.500 čô. Ênao mgơ̆ng êa Ka Tung ti să Tơ Tung duh êa krih kơ 1000 ha lăn mkra mjing leh anăn mkăp êa yua kơ êbeh 2.600 gŏ êsei mnuih ƀuôn sang. Ênao mgơ̆ng êa Đăk Trau Dle ti să Kon Chiêng rơ̆ng êa krih kơ 600 ha lăn lŏ hma, mbĭt anăn đru gang mkhư̆ êa lip. Cao Thanh Thương, Khua Knơ̆ng bruă lŏ hma leh anăn wăl hdĭp mda čar Gia Lai brei thâo:

“Ênoh êa krih kơ lăn mkra mjing lŏ hma  krĭng nah Yŭ čar Gia Lai mâo êbeh 12% kyua anăn čiăng mđĭ kyar klei găl, mjing krĭng mkra mjing prŏng kơ čar leh anăn krĭng wăl snăn brei kƀĭn bi liê anôk bruă knơ̆ng kdơ̆ng êa nah gŭ. Hlăm hdră ntrŭn Klei bi kƀĭn Bruă Đảng čar Gia Lai wưng 2025-2030 kƀĭn ksiêm dlăng bi liê anôk bruă knơ̆ng kdơ̆ng êa nah gŭ čiăng mđĭ lar klei găl leh anăn lăn duh kơ klei mđĭ kyar bruă lŏ hma, boh nik hlăm bruă pla mjing čiăng mkra mjing êlam leh anăn ba čhĭ kơ ala tač êngao."”

Hlăk êjai Gia Lai kƀĭn bi liê dŭm hdră mgơ̆ng êa čiăng pral mkăp phŭn êa sui snăn ti Dak Lak, bruă gang mkhư̆ klei yan adiê ngă dôk mjêč pŏk ngă ti anăp klei đăo knăl yan adiê amâo jăk hlăm yan hjan. Mơ̆ng akŏ thŭn truh ară anei, Dak Lak mâo leh 9 gưl yan adiê ngă mâo adiê hjan prŏng, angĭn   đrŭng leh anăn grăm kmlă, ngă 1 čô djiê, 85 boh sang jhat rai, ênoh luč liê hlăm brô 2,86 êklai prăl.

Mŭt hlăm yan hjan, kluôm čar mâo êbeh 80 anôk klưh hroh, hlăm anăn 12 anôk mâo bi mklă huĭ hyưt brei mjêč msir mgaih. Năng mđing, wăt tơdah mŭt hlăm yan hjan, klei huĭ kƀah êan ăt mâo bruă djŏ tuôm hưn brei răng kyua kdrăp knơ̆ng kdơ̆ng êa ară anei mrâo mkăp êa krih kơ hlăm brô 23% ênhă lăn lŏ hma, lu ênhă adôk ăt jưh knang hlăm phŭn êa čŏng mâo. K’iăng Khua Knơ̆ng bruă sang čư̆ êa čar Dak Lak Nguyễn Thiên Văn mtă:

“Hŏng dŭm knơ̆ng, dhar bruă alŭ wăl djŏ tuôm mơ̆ng klei đăo tĭng, čŏng pô mkŏ mjing hdră êlan, klei hâo hưn truh hŏng mnuih ƀuôn sang, mprăp kơ kdrăp yua, phung ngă bruă, jih jang klei găl čiăng êdi mơ̆ng dŭm dhar bruă, êpul bruă truh kơ klei sa ai mơ̆ng dŭm êpul anei ti sa alŭ wăl mâo knhuah sa anăn, mâo hdră êlan hlăm klei gĭt gai. Êjai mâo klei truh srăng ngă hdră bi mdrơ̆ng găl guôp, bi hrŏ klei hmăi kơ asei mlei ăt msĕ mơh ngăn dŏ mơ̆ng Knŭk kna leh anăn mnuih ƀuôn sang.”

Bruă Gia Lai mtrŭt mđĭ duh bi liê dŭm knơ̆ng kdơ̆ng êa hnơ̆ng prŏng, êjai anăn Dak Lak mđĭ hin dŭm hdră êlan bi mdrơ̆ng hŏng klei yan adiê ngă brei ƀuh Lăn Dap Kngư dôk bi mlih klei mĭn bi mdrơ̆ng jing bi djŏ guôp hŏng klei mlih yan adiê. Knơ̆ng kdơ̆ng êa, mbĭt hŏng klei thâo đăo knăl, hưn brei răng leh anăn gang mkhư̆ klei yan adiê ngă, srăng jing tur knơ̆ng yuôm bhăn čiăng rơ̆ng klei êđăp ênang kơ mnuih ƀuôn sang, rơ̆ng kơ klei đĭ kyar bruă lŏ hma hơĭt kjăp hlăm wưng yan adiê ƀrư̆ hruê ƀrư̆ amâo mâo jăk leh anăn dleh đăo knăl.