Hluê anăn, Knŭk kna dôk ba mdah 20 mta klei ba mdah kơ Anôk bruă kƀĭn ala ksiêm bi mklă. Khua anôk bruă kƀĭn ala Trần Thanh Mẫn brei thâo, mơ̆ng ară anei truh kơ knhal jih thŭn, bruă mă hŏng Anôk bruă kƀĭn ala, Dhar bruă gĭt gai anôk bruă kbĭn ala, Knŭk kna lehanăn dŭm anôk bruă djŏ tuôm lu snăk. Boh nik, dŭm bruă klam čih mkra hdră bhiăn hluê ai tiê Klei bi kƀĭn pŏk ngă Hdră čih mkra hdră bhiăn wưng bruă kƀĭn ala tal 16 lehanăn hdră mprăp kơ dŭm klei bi kƀĭn ti anăp.

Mñă mơ̆ng ară anei truh kơ knhal jih thŭn, mbĭt hŏng bruă čih mkra hdră bhiăn lŏ mâo lu bruă klam yuôm bhăn kơ hdră ksiêm dlăng, hlăm anăn mâo bruă mkŏ mjing Klei bi kƀĭn trông bruă hdră bhiăn lehanăn Klei bi kƀĭn trông mơ̆ng anôk bruă kƀĭn ala kơ hdră ksiêm dlăng thŭn 2026 hlăm 3 mlan gưl 3, Khua anôk bruă kƀĭn ala mtă kơ dŭm anôk bruă ksiêm dlăng kjăp hdră bruă, mkŏ mjing lehanăn hluê ngă tŭ dưn./.