Dua hruê leh ƀuôn Nhin bi mŭt mbĭt hŏng alŭ Nghĩa Hưng 1 leh anăn Nghĩa Hưng 2 jing alŭ Nghĩa Hưng 2, să Biển Hồ, ayŏng Siu Ayun, pô mâo kơhưm hlăm ƀuôn, mbĭt hŏng khua alŭ nao ksiêm dlăng dŭm bĭt êlan mnuih ƀuôn sang čiăng hnưm mâo êlan bêtông. Leh bi mŭt mbĭt, mnuih ƀuôn sang amâo djŏ knŏng uêñ mĭn kơ anăn ƀuôn mrâo, ƀiădah mâo wăt dŭm bruă kơ mnuih ƀuôn sang dưi hnưm msir amâodah hơăi. Ayŏng Siu Ayun brei thâo, êjai mrâo hmư̆ hdră êlan bi mŭt mbĭt hŏng 2 alŭ mâo lu hĭn jing mnuih Yuăn, lu mnuih ƀuôn sang hlăm ƀuôn tuôm ngĭ ngơ̆ kơ klei mdê knhuah gru, klei hdĭp aguah tlam. Ƀiădah hŏng lu klei blŭ hrăm, hâo hưn leh anăn mtrŭt mjhar, mnuih ƀuôn sang thâo săng, bruă mkŏ dăp amâo mâo bi luč ôh knhuah gru ƀuôn sang, ƀiădah mkŏ mjing klei găl brei dŭm êpul êya bi mguôp, bi đru hrăm mbĭt đĭ kyar.

Msĕ mrâo anei hmei ăt čiăng êmưh, ăt akâo kơ klei êlan klông ƀuôn. Khua alŭ ară anei mâo klei thâo lu hĭn, mbruă hĭn, leh anăn mda asei hĭn, pô iêo đĭng blŭ sa blư̆ hlŏng hmư̆ yơh. Kâo hmăng hmưi mơ̆ng khua alŭ truh kơ mặt trận ngă bruă kơ mnuih ƀuôn sang, jĕ hŏng mnuih ƀuôn sang hĭng đru kơ mnuih ƀuôn sang lu hĭn.”

Klei hmăng hmưi mnuih ƀuôn sang jĕ hŏng bruă knŭk kna, bruă knŭk kna jĕ hŏng mnuih ƀuôn sang ăt mdưm klei čuăn mrâo hŏng êpul knuă druh nah gŭ. Hŏng ayŏng Đỗ Văn Túc, khua alŭ Nghĩa Hưng 2, să Biển Hồ, leh 15 thŭn dơ̆ng ngă khua alŭ, wưng păn bruă mrâo anei lu klei kpĭ hĭn. Leh bi mŭt mbĭt, alŭ mâo êbeh 600 gŏ êsei, êbeh 2400 čô mnuih ƀuôn sang. Alŭ wăl prŏng 3 blư̆ mkă hŏng êlâo dih. Tơdah ăt kiă kriê hŏng hdră hđă srăng dleh dưi thâo klei čiăng, klei hmăng hmưi mơ̆ng mnuih ƀuôn sang. Kyuanăn, leh dưi bi kluôm, anôk bruă leh anăn Êpul bruă swil alŭ mâo leh hdră êlan klă klơ̆ng kơ grăp mta bruă, mbha alŭ wăl jing dŭm êpul ƀuôn sang, mbha bruă klam knuă druh grăp êpul. Mĭn tĭng, grăp hruê kăm, Êpul bruă swil klă nao nao kƀĭn hŏng grăp êpul hŏng mnuih ƀuôn sang, mbĭt anăn rơ̆ng kơ dŭm êpul online čiăng tŭ mă, msir klei hưn pral hĭn.

Alŭ wăl prŏng, klei blŭ leh anăn dhar kreh mdê mdê. Anăp anei čiăng ba yua kdrăp mrô hlăm klei hdĭp mnuih ƀuôn sang, alŭ wăl anôk mnuih Yuăn si ngă, anôk mnuih djuê ƀiă si ngă, si srăng ngă čiăng đru kơ mnuih ƀuôn sang leh anăn bi leh bruă klam, jing dŭm klei tal êlâo kâo dôk mĭn. Leh pô mă klei bi klă srăng mkŏ mjing hdră êlan mtam. Êlâo dih pô kiă kriê alŭ wăl điêt pô ngă mdê, bi ară anei alŭ wăl prŏng sơnei srăng mkŏ mjing dŭm mta kñăm, hdră êlan klă klơ̆ng nao mbĭt hŏng alŭ wăl prŏng, ênoh mnuih ƀuôn sang lu”.

Mơ̆ng 40 alŭ ƀuôn êlâo dih, leh mkŏ dăp,să Biển Hồ adôk 23 anôk bruă, hrŏ 42,5%. Mbĭt hŏng bi khuăt, alŭ wăl ăt bi kluôm êpul phung mă dlăng bruă nah gŭ, khua ƀuôn hluê êlan bi klă kơ klei hriăm, klei thâo leh anăn ai dưi bi găl guôp hŏng kdrăp mrâo mrang hlăm klei gĭt gai, kiă kriê.

Hlăm hnơ̆ng kluôm čar, truh hruê 2/7, Gia Lai bi leh bruă mkŏ dăp mơ̆ng 2.693 adôk 1.400 alŭ, ƀuôn, hrŏ 1.293 anôk, knar hŏng 48,01%.

Nguyễn Thanh Vũ, K’iăng khua knơ̆ng bruă kiă kriê bruă knuă čar Gia Lai brei thâo, bi hrŏ alŭ ƀuôn jing mta kñăm mơ̆ng klei mkŏ dăp. Klei yuôm hĭn jing mđĭ hnơ̆ng jăk  knuă druh nah gŭ čiăng kơ bruă knŭk kna nao klă hŏng alŭ wăl, đru kơ mnuih ƀuôn sang jăk hĭn êjai hnơ̆ng kiă kriê prŏng hĭn. Čar dôk lŏ dơ̆ng bi kluôm êpul bruă, mbĭt anăn ksiêm dlăng, bi klă leh anăn mkŏ mjing hdră êlan mtô bi hriăm êpul khua dlăng bruă nah gŭ, khua ƀuôn hluê êlan bi mâo djăp klei čuăn kiă kriê ti nah gŭ hlăm wưng mrâo.

"Hluê si hdră mtrŭn mrô 185/2026/NĐ-CP hruê 26/5/2026 mơ̆ng knŭk kna kơ ênoh čuăn, leh anăn mâo klei mtô bi hriăm hluê hdră tă mơ̆ng gưl dlông. Bi hŏng phung anei brei mâo klei hriăm jih gưl 3 kơ dlông. Tal dua jing bruă ba yua kdrăp mrâo hâo hưn. Khua dlăng bruă nah gŭ srăng dưi yua hră điện tử, anei jing sa kdrêč hlăm klei bi mlih mrô. Bi hŏng êpul anei, grăp thŭn srăng mâo dŭm hdră êlan mtô bi hriăm. Leh bi kluôm êpul bruă, čar srăng mâo hdră êlan bi hriăm brei ayŏng adei hnưm mâo klei hơĭt leh anăn ngă bruă hlăm wưng kơ anăp găl guôp hĭn.”

Leh mkŏ dăp alŭ ƀuôn, Gia Lai bi khuăt mkrah wah ênoh anôk bruă ti nah gŭ. Dŭm klei tŭ dưn mơ̆ng hdră êlan anei amâo djŏ knŏng dưi mkă hŏng ênoh anôk bruă hrŏ, ƀiădah lŏ jing bruă mkŏ mjing êpul knuă druh nah gŭ djăp klei thâo, bi mlih hdră kiă kriê čiăng đru kơ mnuih ƀuôn sang jăk hĭn.