Hdră mâo klei hgŭm mơ̆ng êbeh 100 anôk bruă duh mkra Việt Nam leh anăn Russia hlăm bruă êa pui êwa čuh, mnia blei, bi liê, hiu čhưn ênguê, êdeh phiơr leh anăn kdrăp mrâo. Sa hlăm dŭm klei mñă yuôm bhăn mơ̆ng Hdră jing Knăm mđup brei hră mơar bi hgŭm plah wah anôk bruă dua ala čar ti anăp klei bi mklă mơ̆ng Khua knŭk kna Lê Minh Hưng leh anăn khua gĭt gai dua tĭng.

Năng mđing jing dŭm hdră mtrŭn bi hgŭm hlăm bruă êa pui êwa čuh plah wah PetroVietnam leh anăn Zarubezhneft, mbĭt anăn hưn mdah lu hră mơar bi hdơr bi hgŭm hlăm dŭm bruă êa pui êwa čuh, kreh knhâo, kdrăp mrâo, mđĭ kyar anôk bruă nah gŭ, mlih mrô, mdrao mgŭn, hiu čhưn ênguê leh anăn bi liê. Dŭm klei kuôl kă bi trông hlăm hdră đru pŏk mlar klei bi hgŭm bruă duh mkra plah wah Việt Nam leh anăn Russia; mjing tur knơ̆ng kơ bruă pŏk ngă dŭm hdră bruă klă klơ̆ng, ba klei tŭ dưn klă sĭt kơ anôk bruă duh mkra leh anăn bruă duh mkra dua ala čar hlăm wưng kơ anăp.