Pô bi ala Lê Hữu Trí (êpul mơ̆ng Khánh Hòa) lač, dŭm mta phŭn mơ̆ng hdră bhiăn êjai hlue ngă ăt adôk gun kpăk. Pô bi ala akâo lŏ thiăm mbŏ klei mblang mơ̆ng boh blŭ amâodah klei čuăn klă klơ̆ng čiăng bi mklă mta phŭn ngă soh (čŏng ngă amâodah amâo thâo) leh anăn hnơ̆ng kjham mơ̆ng klei ngă soh ti Mta 2, mbĭt hŏng klei čuăn bi mklă klei bi hrŏ hnơ̆ng tŭ dưn ti Mta 9 čiăng dưi ba yua bi sa hnơ̆ng. Kơ klei kčah mtrŭn kơ hdră phat mkra leh anăn hdră msir mghaih boh jhat, lu phung bi ala akâo ka đĭ sa hnơ̆ng tơdah ka mâo klei tĭng dlăng klei hmăi tui si mta bruă leh anăn êpul tŭ klei hmăi.

Snăn brei mđing ba yua klă sĭt hdră msir lŏ krŭ wĭt klei msĕ aguah tlam, ruh mgaih anôk ngă soh, msir mghaih klei čhŏ djhan, tla wĭt ênoh prăk soh hŏng klei bhiăn; mbĭt anăn bi mklă ti wưng čiăng lui hră dưi ngă bruă amâodah mdei ngă bruă. Kơ hruê mmông msir mghaih klei ngă soh hŏng hdră bhiăn, pô bi ala Mai Phương Hoa (êpul Ninh Bình) akâo ya mta bruă mĭn tĭng sui hruê mmông bi kmhal truh 3 thŭn snăn brei ksiêm dlăng bi nik, djŏ guôp hŏng boh sĭt, đăm lŏ sui hruê mmông amâo čiăng ôh. Djŏ tuôm kơ hnơ̆ng bi kmhal prăk, hră čih Hdră bhiăn msir mghaih klei ngă soh hŏng hdră bhiăn kčah mtrŭn hnơ̆ng bi kmhal prăk lu êdi hlăm klei bi kmhal klei ngă soh hŏng hdră bhiăn jing 1,5 êklai prăk hŏng mnuih leh anăn 3 êklai prăk hŏng êpul êya. Snăn, hnơ̆ng lu êdi đĭ 1,5 blư̆ mkă hŏng hdră bhiăn ară anei. Pô bi ala lač, brei ksiêm dlăng, bi mklă klă klơ̆ng mơ̆ng lu mta kơ hnơ̆ng đŭ bi kmhal anei, čiăng rơ̆ng klei kpă mơ̆ng hdră bhiăn, amâo hmăi lu đei kơ klei hdĭp, bruă duh mkra mnia mblei mơ̆ng mnuih ƀuôn sang, anôk bruă duh mkra.