Čar Dak Lak mâo lu klei găl êdah êdi msĕ si krĭng pla mjing kphê mơ̆ng Việt Nam, mđing truh anôk bruă kphê mơ̆ng tar rŏng lăn. Dak Lak bi anôk bi kƀĭn mơ̆ng êlan knhal bruă duh mkra Dưr - Dŭng leh anăn Ngŏ - Yŭ, mâo klei găl mđĭ kyar bruă logistics, bruă duh mkra êa ksĭ, mkra mjing êlam, pui kmlă doh leh anăn bruă lŏ hma, mnơ̆ng hlăm dliê. Anei ăt jing tur knơ̆ng čiăng kơ čar bi klă mta kñăm mđĭ kyar GRDP kah knar êbeh 11% sa thŭn hlăm wưng 2026 - 2030.

Čuăl mkă tal anei bi klă bruă klam gru hmô đĭ kyar “3 krĭng - 2 êlan knhal - 2 anôk bruă - 3 kiêng đĭ kyar” mđing truh mkŏ wĭt wăl naôk bruă duh mkra hluê êlan bi mguôp kjăp, ba yua jih hnơ̆ng klei găl mâo grăp alŭ wăl. Mbĭt anăn, čar kñăm kơ 3 klei kdlưn hĭn mâo klei kreh knhâo mrâo mrang leh anăn bi mlih mrô, mnuih mă bruă leh anăn hdră êlan, bruă mkŏ mkra mrâo mrang.

Bi trông hlăm klei kƀĭn, aduôn Đào Bảo Minh, khua hlăm bruă Đảng čar, khua Êpul gơ̆ng bruă ƀuôn sang ƀuôn hgŭm Tuy Hòa brei thâo, bruă mkŏ mjing klei čuăl mkă mâo dŭm alŭ wăl bi mguôp ksiêm dlăng čuăng mkŏ mjing “sa wăl anôk čuăl mkă krip”, bi lar jih hnơ̆ng klei găl mơ̆ng grăp alŭ wăl.

“Grăp alŭ wăl hluê si boh sĭt čuăl mkă hmei ksiêm duah leh anăn hmăng hmưi, mĭn tĭng klei đĭ kyar hlăm wưng kơ anăp leh anăn hmei ba dŭm klei mĭn anei hlăm klei čuăl mkă. Êjai čuăl mkă dưi bi klă srăng mkŏ mjing boh kdrut čiăng kơ hmei ngă tur knơ̆ng hŏng klei čuăl mkă anăn, hmei mâo klei duh bi liê leh anăn klei đĭ kyar. Mơ̆ng gưl dlông, mơ̆ng čar leh anăn wăl klei gĭr mơ̆ng alŭ wăl.”

Hlăm klei čuăl mkă bi klă bruă mđĭ mđĭ kyar bruă hiu čhưn ênuê jing sa hlăm dŭm bruă duh mkra phŭn mơ̆ng čar Dak Lak. Kyuanăn, hlăm klei čuăl mkă, knơ̆ng bruă dhar kreh mjuăt ktang asei mlei leh anăn hiu čhưn ênguê bi mguôp kjăp hŏng dŭm anôk bruă, hlăm anăn bi myuôm klei čuăl mkă dŭm anôk hiu čhưn ênguê mơ̆ng čar. Trần Hồng Tiến,  khuaknơ̆ng bruă dhar kreh mjuăt ktang asei mlei leh anăn hiu čhưn ênguê čar Dak Lak brei thâo, lu anôk hiu čhưn ênguê phŭn dưi bi klă, mơ̆ng wăl anôk hiu čhưn ênguê vịnh Xuân Đài, čư̆ čhiăng Xuân Hoà truh kơ dliê Knŭk kna mkuôm Yŏk Đôn, ênao Lăk, dŭm anôk hiu čhưn ênguê wăl mnơ̆ng hdĭp, hiu čhưn ênguê êpul êya, bruă lŏ hma leh anăn ƀuôn bruă đưm.

“Leh mâo Khua Knŭk kna bi klă čuăl mkă čar, hmei lŏ dơ̆ng đru kčeh ba hlăm dŭm hdră êlan mđĭ kyar bruă hiu čhưn ênguê leh anăn hluê ngă dŭm hdră êlan čuăl mkă nao djŏ êlan”.

Hluê si Đỗ Thái Phong, k’iăng khua Bruă sang čư̆ êa čar Dak Lak, klei êdah êdi mơ̆ng gưl čuăl mkă anei jing mkŏ mjing wăl anôk đĭ kyar prŏng hŏng klei mkŏ krĭng plah wah Ngŏ leh anăn Yŭ. Hlăm anăn nah Ngŏ srăng mđing kơ bruă tuh tia, mkra mjing mnơ̆ng hlăm êa ksĭ leh anăn bruă hiu čhưn ênguê êa ksĭ bi nah yŭ srăng mđing kơ bruă lŏ hma kdrăp mrâo mrang, mkra mjing êlam, pui kmlă doh. Anei jing du boh kdrŭt bi đru čiăng mkŏ mjing boh tŭ bruă duh mkra mrâo mơ̆ng Dak Lak.

“Klei čuăl mkă tal anei jing tur knơ̆ng hdră bhiăn jing yuôm sơnăk. Grăp hdră tă mđĭ kyar bruă duh mkra ala ƀuôn, lĭng kahan - klei êđăp ênang mơ̆ng čar hlăm wưng kơ anăp srăng djŏ hŏng klei čuăl mkă čar”.

Hluê si klei čuăl mkă, mơ̆ng ară anei truh thŭn 2030, Dak Lak čiăng iêo jak hlăm brô 676.000 êklai prăk duh bi liê ala ƀuôn čiăng mđĭ kyar dŭm hdră boh kdrŭt kơ êlan klông, logistics,, kdrŭn ksĭ, tač êdeh phiơr, anôk bruă tuh tia leh anăn dŭm anôk bruă hnơ̆ng prŏng. Anei ăt jing wưng Dak Lak kñăm msir mgaih dŭm klei kpăk kơ bruă mkŏ mkra, mkŏ krĭng leh anăn wăl anôk đĭ kyar čiăng mkŏ mjing tur knơ̆ng kơ klei đĭ kyar wưng sui.

Čuăl mkă mkra mlih čar Dak Lak amâodjŏ knŏng pŏk wăl anôk đĭ kyar mrâo ƀiădah lŏ bi êdah klei hmăng hmưi kpưn đĭ mơ̆ng alŭ wăl hlăm wưng đĭ kyar mrâo. Hŏng hdră tă wưng sui, klei mĭn mlih mrâo leh anăn klei gĭr ngă bruă, Dak Lak dôk mkŏ mjing tur kjăp čiăng hriăm mbĭt hŏng lăn čar mŭt hlăm ênuk kpưn đĭ mơ̆ng djuê ana.