Mơ̆ng mlan 7 thŭn anei ƀuôn Tân Hạ, să Tà Năng, čar Lâm Đồng prŏng hĭn, lu mnuih hĭn, leh bi mŭt mbĭt hŏng ƀuôn Chơ Ré. Hŏng ênhă jih jang 476 ha, êbeh 309 gŏ êsei mnuih ƀuôn sang, lu jing mnuih djuê ƀiă, bruă ngă mơ̆ng Kiăng khua bruă Đảng, klam ngă Khua ƀuôn Cil K’Hạnh jing klei kpĭ hĭn. Si srăng ngă čiăng kơ mnuih ƀuôn sang dua alŭ wăl amâo lŏ mâo klei mĭn "mnuih hđăp, mnuih mrâo", ñu mbĭt hŏng Êpul bruă Mặt trận nao truh kơ grăp gŏ sang čiăng bi blŭ hrăm. Hlăm dŭm klei bi kƀĭn amâodah dŭm mmông mă bruă mbĭt, ñu dăp čiăng kơ mnuih ƀuôn sang 2 ƀuôn hđăp hrăm mbĭt, ngă sa mta bruă.

Năng mđing hĭn êdi jing gưl nao ngă bruă tal êlâo bi doh wăl hdĭp mda, mkra mđĭ êlan klông leh bi mŭt alŭ Chơ Ré hŏng alŭ Tân Hạ. Mnuih kuai lăn, mnuih pla mnga, mnuih bi doh djah djâo; grăp čô êjai ngă êjai blŭ hrăm êjai leh anăn bi dôk mbĭt mnăm êa. Dlăng kơ êlan ƀuôn Tân Hạ mrâo doh siam hĭn, amai K'Hạnh ƀuh klă klei bi mlih.

“Leh bi mŭt mbĭt, kâo mĭn klei yuôm bhăn hĭn jing amâo mâo brei mnuih ƀuôn sang mâo klei mĭn "mnuih hđăp, mnuih mrâo", ƀiădah brei dlăng jih jang jing mnuih ƀuôn sang mơ̆ng sa boh ƀuôn Tân Hạ. Kyua anăn, kâo gĭr jĕ giăm, mđing hmư̆ mnuih ƀuôn sang ti wăt dua krĭng, bruă mbĭt snăn hrăm mbĭt bi trông, hrăm mbĭt hgŭm leh anăn hrăm mbĭt kah mbha bruă klam. Pô amâo dưi ƀuah ăl mnuih ƀuôn sang bi hgŭm ôh, ƀiădah brei mjing klei găl čiăng kơ jih jang bi tuôm, thâo săng leh anăn hrăm mbĭt ngă bruă mbĭt. Tơdah leh hrăm mbĭt ngă sa bruă, hrăm mbĭt kyua klei tŭ dưn mbĭt snăn klei kbưi srăng ƀrư̆ ƀrư̆ dưi lăm lui."

Klei đăo knang truh hŏng mnuih ƀuôn sang amâo djŏ mơ̆ng dŭm klei blŭ jăk, ƀiădah dưi mkŏ mjing mơ̆ng boh tŭ dưn bruă knuă. Aduôn K’Hạnh đru kčĕ hŏng bruă sang čư̆ êa să Tà Năng pŏk adŭ mjuăt bi hriăm kơ klei kreh knhâo hdră mnêč rông mnơ̆ng, pla mjing kơ mnuih ƀuôn sang, mkŏ mjing kơ mnuih ƀuôn sang nao hriăm klei bi hmô klă sĭt… Aduôn K’Hạnh mtrŭt mjhar mnuih ƀuôn sang bi mlih dŭm ênhă ana pla mjing hnơ̆ng boh mnga ƀiă ba pla dŭm mta ana djŏ guôp hĭn. Hŏng dŭm gŏ êsei dôk dleh dlan, ñu ktrâo lač kơ mnuih ƀuôn sang dưi čan prăk hŏng ênoh prăk mnga hdjul. Truh ară anei, alŭ mâo 78 gŏ êsei čan prăk Knơ̆ng prăk Đru ba yang ƀuôn, ênoh čan êbeh 6.2 êklai prăk; ênhă djam mtam mâo giăm 8 ha, đĭ 3 ha mkă hŏng akŏ thŭn. Ƀuôn ăt tŭ mă bruă răng mgang êbeh 780 ha dliê. Knŏng hjăn amai K’Hạnh tŭ kăp rông hđeh Ka Să Ha Cường (hđeh hriăm adŭ 3) kyua klei hdĭp dleh dlan. Amai Cil Yŭ K’Im ti ƀuôn Tân hạ ƀuh kơ aduôn Cil K’Hạnh:

“Amai Cil K’Hạnh jing sa čô mniê Khua ƀuôn bi hmô, mâo nanao klei bi hmô hlăm ƀuôn sang. Anăn jing klei bi hmô hmei čiăng hriăm êdi. Kyua amai hmei thâo bĭt hdră ngă bruă, mđĭ klei thâo săng hlăm yang ƀuôn. Êlâo dih êjai amai K’Hạnh dôk ngă bruă hlăm anôk bruă mdrao mgŭn ƀuôn sang, tơdah mâo ya mta klei truh, amai gĭr jih ai tiê hlăm klei dŏng mdrao tal êlâo, đru leh kơ lu mnuih, ăt msĕ mơh đru mghaih msir hră mơar kơ phung amâo mâo thâo săng”.

Bùi Ngọc Nghiễm, Khua êpul hgŭm phung khua thŭn alŭ Tân Hạ, lač, aduôn K'Hạnh jing Khua alŭ hur har leh anăn jĕ giăm hŏng mnuih ƀuôn sang. Boh nik, leh bi mŭt alŭ, ñu bi êdah klei thâo leh anăn kơhưm pô.

“Ka bi mŭt mbĭt snăn Hạnh ti alŭ Tân Hạ hđăp jing pô hur har êdi, hur har êdi. Mơ̆ng hruê bi mŭt mbĭt, amai K’Hạnh ăt hur har, hur har snăn yơh. Ngă bruă jĕ giăm êdi hŏng mnuih ƀuôn sang. Ti dŭm anôk bi kƀĭn, K’Hạnh mâo ai tiê mkŏ mkra prŏng, mnuih ƀuôn sang bi tŭ ư êdi. Ară anei jing khua alŭ Tân Hạ leh anăn Chơ Ré hđăp jing Tân Hạ mrâo, ăt ngă bruă jih ai tiê, mnuih ƀuôn sang mrâo bi kƀĭn tŭ ư êdi mâo ênoh hră mplĕ 97, 98% lah.”

Giăm 17 thŭn ngă bruă nah gŭ, amai Cil K’Hạnh, Kiăng khua bruă Đảng hlŏng klam ngă Khua alŭ Tân Hạ, să Tà Năng, čar Lâm Đồng ƀuh klă klei bi mguôp mnuih ƀuôn sang jing ai ktang mjing djăp boh tŭ dưn. Mơ̆ng dŭm bruă ngă điêt ƀiădah klă sĭt hŏng klei hdĭp, ñu dôk ƀrư̆ ƀrư̆ đru lăm lui klei kbưi plah wah dua alŭ hđăp; čiăng kơ alŭ Tân Hạ leh bi mŭt jing êpul êya bi mguôp, mkŏ mjing klei hdĭp mrâo./.