Êbeh 1 mlan anei, dŭm hruê knhal jih hruê kăm, ti Anôk bruă Hdră bruă să Hàm Thuận, čar Lâm Đồng, êpul kdŏ mmuñ leh anăn mdah kdrăp djuê ana Chăm hur har hriăm mjuăt. Ayŏng Thông Đinh Đương, brei thâo, anei jing gưl tal êlâo ñu nao hlăm Knăm mơak dhar kreh Chăm kluôm ala, ñu ktưn hưn snăk leh anăn hơ̆k mơak:

Anei amâo djŏ knŏng jing sa Knăm mơak prŏng ôh ƀiădah lŏ jing anôk kơ phung hđeh dưi hrăm mbĭt đru mguôp ƀiă ai ktang čiăng hưn mdah dhar kreh djuê ana Chăm hmei hŏng jih jang mnuih ƀuôn sang. Bi mni kơ Đảng leh anăn Knŭk kna mjing leh klei găl kơ mnuih Chăm hlăm djăp anôk kluôm ala dưi bi kƀĭn, mđĭ ai tiê dhar kreh phung mda asei hlăm êdei anăp, hlăm bruă kriê pioh, mđĭ lar knhuah dhar kreh djuê ana Chăm. Kâo ăt msĕ si jih jang mnuih hlăm êpul ară anei dôk gĭr leh anăn jih ai tiê, čang hmăng ba klei kdŏ mmuñ jăk siam hĭn kơ mnuih ƀuôn sang.)

Hŏng akŏ ba kơ Knăm mơak jing “Kriê pioh, mđĭ lar knhuah dhar kreh djuê ana Chăm čar Lâm Đồng hlăm ênuk mrâo”, êpul Lâm Đồng srăng hgŭm hlăm lu boh phŭn jăk siam kñăm hưn mthâo boh êlam dhar kreh Chăm dôk mâo êpul êya kriê pioh. Hlăm anăn, bruă dhar kreh kƀĭn hlăm dŭm boh phŭn, msĕ si: rang mdah, hưn mthâo knăm mơak, klei bhiăn dhar kreh djuê ana Chăm; rang mdah hưn mthâo, dhar kreh djuê ana Chăm hlăm klei mkŏ mjing leh anăn răng mgang ƀuôn sang. Mbĭt anăn, mâo bruă rang mdah,hưn mthâo bruă djuê ana pơ̆k mñam, bruă mkra mnơ̆ng hŏng lăn čuh djuê ana Chăm; klei kdŏ mmuñ leh anăn mdah kdrăp djuê ana Chăm.

 Pô mbruă êdah kdlưn Lâm Tấn Bình ti să Bắc Bình, brei thâo, hlăm knăm mơak, êpul srăng mdah, hưn mthâo kdrêč knăm mơak, klei bhiăn “Mđĭ pô ngă khua êpul Kadhar klei đăo Bàlamôn mnuih Chăm Lâm Đồng”. Anei jing klei ngă mprăp lu snăk:

Knăm mơak mđĭ pô ngă khua Kadhar jing gưl bi kƀĭn bruă dhar kreh djuê an Chăm lu jơr, bŏ hŏng knhuah dhar kreh hlăm dŭm klei bhiăn hlăm lam leh anăn hŏng klei mmuñ hlăm klei đăo phung Gru kadhar, hlai mbĭt hŏng klei wah lač jih ai tiê phung Muk Pajuw kñăm bi mni kơ klei jăk, klei yăl dliê kơ phung Mtao mtung jing leh Yang, mơ̆ng klei kdŏ mmuñ êdu êun ênai brô̆ kanyi, mjing sa ênai jăk siam mơ̆ng klei mĭn leh anăn klei đăo mngăt ai tiê êpul êya phung đăo...”

Êngao kơ klei bi lông kơ dhar kreh djuê ana, klei kdŏ mmuñ, mjuăt asei mlei, êpul Lâm Đồng lŏ hgŭm hlăm klei rang mdah hưn mthâo, klei dhar kreh djuê ana alŭ wăl, êdah kdlưn jing rup mnuih Chăm ti Lâm Đồng hlăm klei mkŏ mjing leh anăn răng mgang ƀuôn sang, anôk kriê pioh, anôk jăk siam, dŭm knăm mơak, hưn mthâo kơ mnơ̆ng kriê pioh dhar kreh djuê ana sang Mtao Chăm.

Boh nik, êpul srăng hưn mthâo dŭm anôk truh êdah kdlưn ti Lâm Đồng, hưn mdah dŭm mta mnơ̆ng dhơ̆ng lŏ hma, mnơ̆ng dhơ̆ng OCOP êdah kldưn. Nguyễn Tú Long, K’iăng Khua Anôk bruă dhar kreh leh anăn kriê dlăng Kdrăn ƀăng kơưp čư̆ pui Dak Nông, čar Lâm Đồng brei thâo, êpul mâo 85 čô nao hlăm Knăm mơak hŏng ai tiê bi hgŭm, tui hriăm hrăm mbĭt đĭ kyar:

Ară anei bruă mprăp klă klơ̆ng jăk leh. Hlăm hdră pô jiă kma knhuah djuê ana Chăm. Thŭn anei; êpul phŭn jing ti Hàm Thuận Bắc (hđăp) mâo: čưng boh, dŭm mta klei mjuăt asei mlei êpul lu, leh anăn êpul nao hlăm klei kdŏ mmuñ leh anăn rang mdah kdrăp djuê ana. Hjăn kdrêč knăm mơak snăn êpul  hgŭm jing phung khua dlăng bruă klei đăo ti Bắc Bình (hđăp)

Knăm mơak dhar kreh djuê ana Chăm tal VI ti čar Khánh Hoà srăng mkŏ mjing mơ̆ng hruê 26 truh hruê 28-6 kơ anăp, jing wăl bi klin êa mil dhar kreh Chăm hlăm kluôm ala. Knăm mơak bi klin êbeh 700 pô mbruă, phung kdŏ mmuñ, phung mjuăt asei mlei mơ̆ng 7 čar, ƀuôn prŏng mâo: Khánh Hòa, Gia Lai, Lâm Đồng, Tây Ninh, An Giang, Dak Lak leh anăn ƀuôn prŏng Hồ Chí Minh.

Mbĭt hŏng Khánh Hòa, Lâm Đồng jing čar mâo lu mnuih ƀuôn sang Chăm hĭn kluôm ala. Hlăm wưng êgao, bruă  kriê pioh, mđĭ lar dŭm ênoh yuôm dhar kreh djuê ana jăk saim dŭm djuê ana mâo alŭ wăl mđing uêñ. Hŏng ai tiê mjĕ êrô, tui hriăm, mđĭ klei thâo săng, bruă klam êpul êya hlăm bruă kriê pioh, mđĭ lar ênoh yuôm dhar kreh djuê ana hlăm ênuk ñŭ kma leh anăn mđĭ kyar mơ̆ng lăn čar, phung kdŏ mmuñ amâo thơ̆ng leh anăn phung mbruă mnuih Chăm čar Lâm Đồng dôk hur har hriăm mjuăt leh anăn čang guôn truh Hruê kăm mơak bŏ hŏng êa mil dhar kreh mnuih ƀuôn sang pô./.