Êlan bêtông găn ƀuôn Ka Đô, să Ka Đô, čar Lâm Đồng hruê anei amâo djŏ knŏng mkŏ dŭm boh sang hŏng kdrăn lŏ ôh ƀiădah lŏ atăt nao hlăm wăl mkra mjing êlâo dih bŏ hŏng klei kdlŭt kdlăt grăp yan hjan. Dua nah êlan, dŭm wăl sang ñuăl mtah mda bi mkŏ mbĭt, bi êdah kơ sa krĭng pla mjing dôk grăp hruê bi mlih.

Gŏ êsei Ma Ren jing sa hlăm dŭm gŏ êsei ba akŏ hlăm hdră bi mlih bruă pla mjing hluê gru hmô krĭp.Mơ̆ng 5 sào amrêc̆, djam mtam pla hlăm sang ñuăl, mguôp hŏng rông êbeh 50 drei ŭn dliê mtlai leh anăn giăm pluh drei êmô mtlai mă kđeh, grăp thŭn gŏ sang ñu mâo prăk mnga hlăm brô 500 êklăk prăk leh tĭng jih prăk bi liê.Blŭ nao mbĭt hŏng mă bruă, Ma Ren jing mnuih mâo kơhưm êdah êdi mơ̆ng Lâm Đồng, ñu ba akŏ hlăm lu mta bruă mơ̆ng ƀuôn sang, mơ̆ng myơr lăn lehanăn mtrŭt mjhar mnuih ƀuôn ngă bruă myơr êlan, truh kơ ba yua lehanăn mđĭ lar dŭm gru hmô mkra mjing mrâo mrang. Ma Ren brei thâo:

"Kâo pô mbĭt hŏng dŭm êpul êya  kreh mtrŭt mjhar mnuih ƀuôn sang mkŏ mkra êlan klông, alŭ wăl mtah, doh, siam, čiăng kơ digơ̆ jhŏng bi mlih mnơ̆ng pla snăn pô srăng nao êlâo hluê ngă.Tơdah ƀuh boh tŭ dưn kơh mnuih ƀuôn sang đăo leh anăn hluê ngă, truh kơ ară anei lu gŏ sang dưn yua hdră mnêč mrâo mrang, hnơ̆ng mâo boh mnga lu hĭn, hnư hrui wĭt ăt hơĭt kjăp hĭn hŏng êlâo dih".

Klei đru mguôp mơ̆ng phung mâo kơhưm msĕ si Ma Ren hlăk lŏ dơ̆ng lar bra ti lu ƀuôn êlan mơ̆ng Lâm Đồng Ti să Đam Rông 2, Khua bruă Đảng alŭ 2 Kon Yông K’Khiếp jhŏng kmlăn pla mjing boh kruĕ msăm hruê amâo mâo asăr, durian leh anăn makka hlăm 5ha kphê, ba prăk mnga êbeh 1 êklai prăk grăp thŭn Mơ̆ng gru hmô anei, lu gŏ êsei mnuih ƀuôn sang bi mlih bruă pla mjing, dưn yua kdrăp mrâo mrang. Truh kơ ară anei, kluôm să mâo êbeh 478ha pla mjing hŏng kdrăp mrâo mrang, mkŏ mjing 14 mrô knăl krĭng pla mjing leh anăn 11 hdră bi hgŭm pla mjing, đru mđĭ boh tŭ yuôm mnơ̆ng lŏ hma lehanăn mjing hdră duh ƀơ̆ng hơĭt kjăp, Ayŏng Kon Yông K’Khiếp lač:

"Jing đảng viên sơnăn pô ngă êlâo, gĭr hriăm mjuăt mđĭ kyar bruă mkra mjing, pla kphê, pluă durian, boh kruĕ hruê̆, makka, mđĭ klei hdĭp mda gŏ sang. Tơdah gru hmô ba wĭt boh tŭ dưn, mnuih ƀuôn sang srăng đăo knang leh anăn hluê ngă.Klei mơak hĭn jing ƀrư̆ hruê ƀrư̆ mâo lu gŏ êsei ba yua gru hmô pla pluă, klei hdĭp dưi mkra mđĭ klă sĭt".

Dưi lač, mnuih mâo kơhưm mjing ai lar bra amâo djŏ hŏng klei blŭ ôh ƀiădah hŏng dŭm gru hmô mkra mjing tŭ dưn. Êjai mnuih ƀuôn sang đăo knang leh anăn hluê ngă, dŭm hdră êlan đru mơ̆ng Knŭk kna ăt mđĭ lar boh tŭ dưn.

Wưng thŭn 2021 - 2026, hnơ̆ng ênoh gŏ êsei ƀun lu tĭng mơ̆ng čar hrŏ leh mơ̆ng 9,33% trŭn adôk 3,33%, bi knar hŏng hrŏ giăm 50.000 gŏ sang ƀun, Ară anei kluôm čar mâo 80 să djăp hnŏng čuăn krĭng ƀuôn sang mrâo, 3 să djăp ênoh čuăn ƀuun sang mrâo mđĭ hnơ̆ng. Hlue si Bùi Ngọc Sơn, K’iăng Khua Knơ̆ng bruă djuê ana leh anăn klei đăo čar Lâm Đồng, kluôm čar ară anei mâo hlăm brô 880 čô mâo kơhưm hlăm mnuih ƀuôn sang djuê ana ƀiă leh anăn Klei đăo, jing êpul kmeh gơ̆ng hrăm mbĭt hŏng bruă sang čư̆ êa ba dŭm hdră êlan hlăm klei hdĭp.

"Bruă klam mơ̆ng phung mâo kơhưm hlăm wưng êgao jing yuôm bhăn snăk hlăm bruă đru mguôp hlăm klei mđĭ kyar bruă duh mkra ala ƀuôn krĭng mnuih djuê ƀiă leh anăn čư̆ čhiăng.Diñu amâo djŏ knŏng jing kdrông mkŏ ba hdră êlan mtrŭn mơ̆ng Đảng, Knŭk kna truh hŏng Mnuih ƀuôn sang ƀiădah lŏ klă anăp ngă klei bi hmô, ba akŏ hlăm hdră mđĭ kyar bruă duh mkra, mkŏ mkra dŭm gru hmô duh mkra tŭ dưn. Mơ̆ng ai lar bra mơ̆ng dŭm gru mngač anei, lu gŏ êsei mnuih ƀuôn sang ti Lâm Đồng jhŏng hluê ngă, đru mguôp prŏng êdi hlăm bruă bi hrŏ ênoh gŏ sang ƀun ƀin, giăm ƀun ti alŭ wăl krĭng taih kbưi, krĭng mnuih djuê ƀiă leh anăn krĭng čư̆ čhiăng tŭ dưn êdi.”

Êlan bêtông ti Ka Đô hruê anei amâo djŏ knŏng pŏk êlan mŭt hlăm wăl mkra mjing ôh ƀiădah lŏ pŏk dŭm hdră êlan mă bruă mrâo kơ ƀuôn sang. Hdră ala čar kñăm mkŏ mjing ai dưi, bi phung mâo kơhưm mkŏ klei đăo knang. Tơdah phung nao êlâo dưi mjing klei đăo knang hŏng dŭm bruă ngă klă klơ̆ng, mnuih ƀuôn sang srăng tui hlue. Leh anăn anăn yơh jing tur knơ̆ng čiăng kơ dŭm ƀuôn êlan krĭng mnuih djuê ƀiă ti Lâm Đồng mđĭ kyar bruă duh mkra, kpưn đĭ tlaih mơ̆ng ai dưi pô.