Tui si êpul kiă kriê bruă rŭ mdơ̆ng čar Dak Lak, tlâo mta bruă hlăm dŭm boh să Ƀuôn Đon, Ia Rvê, leh anăn Ia Lốp mâo bi leh ênŭm sơăi êbeh 80% hnơ̆ng čuăn, leh anăn phung ngă bruă hlăk dôk bi leh jih jang bruă mkra mjing, mkŏ mkra kdrăp mă bruă leh anăn  gĭr bi leh êlâo hruê 6/8.

Čiăng rơ̆ng hnơ̆ng, Anôk kriê dlăng hdră bruă pŏk ngă hdră bruă mjêč "70 hruê mlam amâo mdei, amâo mjưh", brei phung knuă druh păn kjăp anôk mă bruă; Anôk bruă gĭt gai lĭng kahan čar Dak Lak ăt ba nao êpul  nao đru ngă bruă. Mbĭt hŏng anăn, Êpul kiă kriê bruă rŭ mdơ̆ng dôk bi leh hră mơar duh bi liê kơ sang hră knŭk kna rông ba mlir gưl să Ea Bung. Võ Văn Lợi, K’iăng khua kiă kriê êpul kriê dlăng hdră bruă duh mkra ala ƀuôn leh anăn tuh tia mkra mjing čar Daklak brei thâo:

“Hŏng jih jang dŭm anôk bruă, dưi găn leh klei dleh dlan kơ mnuih mă bruă, klei dleh kơ yan adiê, dleh dlan kơ klei dŭ mdiăng čiăng mkăp kơ hdră êlan kluôm. Ară anei 3 boh sang hră bi leh êbeh 80% hnơ̆ng dŭm mta bruă. Hŏng hnơ̆ng anei snăn srăng mâo dŭm mta bruă hlăm hruê 15 mlan 7 srăng bi leh jih jang dŭm hdră bruă, mâo wăt mkŏ dưm dŭm kdrăp mtô bi hriăm. Rơ̆ng kơ klei hlue ngă klei gĭt gai mơ̆ng Phŭn bruă kđi čar ăt msĕ mơh bruă Đảng čar, Êpul gơ̆ng bruă ƀuôn sang leh  anăn Knơ̆ng bruă sang čư̆ êa”.

Čar Lâm Đồng ăt dôk ngă bruă rŭ mdơ̆ng 5 sang hră Knŭk kna rông ba mlir gưl hriăm ti dŭm să knông lăn mâo Quảng Trực, Thuận An, Tuy Đức, Thuận Hạnh leh anăn Đắk Wil, hŏng ênoh prăk bi liê êbeh 1.140 êklai prăk. Dŭm alŭ wăl dôk gĭr bi leh dŭm hdră djŏ amâodah hnưm hĭn hŏng hdră kčah, rơ̆ng kơ klei đru hlăm klei mtô leh anăn bi hriăm mơ̆ng akŏ thŭn hriăm mrâo.

Hlăm anăn, dua sang hră Knŭk kna rông ba mlir gưl hriăm ti dŭm să knông lăn Quảng Trực leh anăn  Thuận An dôk mtrŭt bi pral.Truh kơ ară anei, sang hră dơ̆ng dưi bi leh, phung ngă bruă dôk mđĭ ênoh mnuih mă bruă, kdrăp yu, mđĭ mmông mă bruă čiăng bi leh êlâo kơ hruê 15/8, hnưm hĭn 15 hruê mkă hŏng hdră kčah. Lê Thị Bích Liên, Khua knơ̆ng bruă sang hră mơar čar Lâm Đồng, brei thâo:

“Knơ̆ng bruă sang hră mơar mă bruă hŏng să lu blư̆ leh anăn bi tŭ ư hŏng să hdră êlan bi kna phunug hđeh sang hră leh anăn knơ̆ng bruă ngă leh hdră êlan dăp hđeh sang hră. Bi phung nai knơ̆ng bruă sang hră mơar hưn mdah leh kơ bruă tĭo nao phung nai mơ̆ng Bình Thuận leh anăn Lâm Đồng bi mbŏ kơ 2 sang hră knông lăn”.

Bruă mjêč bi leh dŭm sang hră Knŭk kna rông ba ti dŭm să knông lăn alŭ wăl Lăn Dap Kngư amâo djŏ knŏng bi mâo djăp klei čiăng ti anăp kơ thŭn hriăm mrâo, ƀiădah lŏ bi êdah klei uêñ mĭn mơ̆ng Đảng leh anăn Knŭk kna hŏng bruă sang hră mơar krĭng knông lăn.