Hlăm klei bi tuôm, Khua bruă kƀĭn ala Trần Thanh Mẫn mñă klă Việt Nam sa ai dlăng yuôm klei bi mjĕ hŏng Dhŭng Korea, čang hmăng bi hgŭm dua ala čar lŏ dơ̆ng đĭ kyar klă sĭt, tŭ dưn, hơĭt kjăp, năng hŏng klei bi mjĕ Ƀĭng hgŭm phŭn kluôm dhuôm.

Kơ hdră êlan bi hgŭm hlăm wưng kơ anăp, dua tĭng bi tŭ ư lŏ dơ̆ng bi kjăp klei đăo knang kđi čar; mđĭ hĭn klei bi hgŭm klă sĭt hlăm dŭm bruă lĭng kahan, klei êđăp ênang, bruă hŏng tač êngao; mtrŭt mđĭ klei bi hgŭm bruă duh mkra, mnia mblei, duh bi liê, mđing truh kơ mta kñăm mđĭ ênoh prăk bi mnia mblei dua nah truh 100 êklai USD hlăm thŭn 2026 leh anăn 150 êklai USD hlăm thŭn 2030 hluê hdră bi kna, klă sĭt; mđĭ hĭn klei bi hgŭm bruă kreh knhâo, kdrăp mrâo lehanăn mjing klei găl čiăng kơ Việt Nam nao hgŭm hlăm dŭm hdră bruă prŏng kơ bán dẫn, AI mơ̆ng Dhŭng Korea.