Êbeh 70 thŭn leh, khua mduôn Y Yơng Niê Kdăm ƀuôn Ea M’Droh, să Ea M’Droh, čar Dak Lak, ăt jih ai tiê hŏng dŭm bruă mbĭt ƀuôn sang. Hlăm dŭm mmông bi kƀĭn ƀuôn, dŭm klei yăl dliê grăp hruê, ñu khăng mñă kơ mnuih  ƀuôn sang djă pioh klei bi hgŭm mguôp, hlue ngă hdră bhiăn, kriê dlăng bruă hriăm hră phung anak čô. Hlăk êjai klei hdĭp mâo lu klei amâo thâo bi djŏ, ñu hgŭm mblang, đru kơ dŭm gŏ sang duah klei blŭ sa ai. Ayŏng Y Knap, khua ƀuôn Ea M’Droh brei thâo, dŭm bruă ngă phung khua mduôn jing klei thâo yuôm bhăn čiăng kơ phung mda asei tui hriăm hlăm hdră ngă bruă klam nah gŭ.

“Kâo pô tŭ ư snăk klei đru mguôp khua mduôn Y Yơng hlăm klei hâo hưn mtô mblang kơ klei ƀi hgŭm ƀuôn sang ăt msĕ mơh hlăm dŭm bruă ngă hâo hưn mtô mblang hdră bhiăn kơ klei hdĭp ala ƀuôn, bruă msir mgaih klei  amâo thâô bi djŏ, bi grăng hlăm ƀuôn sang. Hŏng mnuih ƀuôn sang snăn klei blŭ phung khua mduôn jing yuôm bhăn snăk. Anăn ăt jing sa klei čiăng kơ phung mda asei msĕ si tui hriăm leh anăn hlue ngă”.

Ƀuôn Ea M’Droh lŏ dưi thâo hŏng anăn pia jing Ƀuôn Cháy, mguôp hŏng dŭm thŭn mlan mnuih ƀuôn sang sa ai tui hlue cách mạng, ƀuôn sang pui ƀơ̆ng hlăm klei bi blah. Ƀuôn ară anei mâo 307 gŏ êsei hŏng giăm 1.300 čô mnuih ƀuôn sang, lu jing mnuih Êđê. Mơ̆ng krĭng lăn tŭ lu  klei  luč liê, Ƀuôn  Cháy hruê anei mâo leh ktuê êlan prŏng siam, lu gŏ sang đĭ kyar mkra mjing kphê, grăp knhuang mđĭ prăk hrui wĭt.

 Jing mnuih siă suôr hŏng krĭng krŭ kdơ̆ng hlăk đưm, khua mduôn Y Yơng ƀuh klei bi mlih mơ̆ng ƀuôn sang leh hruê lăn čar hluh lir. Găn lu bruă klam, khua mduôn Y Yơng mñă nanao mnuih ƀuôn sang kriê pioh knhuah dru klei bi hgŭm, mbĭt anăn mđing hĭn kơ klei hdĭp ară anei.

“Mtrŭt mjhar mnuih ƀuôn sang dŭm hdră êlan mơ̆ng Đảng leh anăn knŭk kna. Msĕ si hruê anei, kâo mtrŭt mjhar mnuih ƀuôn sang ƀuh klei soh pô jing amâo hlue ngă, amâo krơ̆ng kjăp knhuah hdĭp jăk sian. Mơ̆ng leh bi mŭt truh ară anei jing mtrŭt mjhar mnuih ƀuôn sang, boh nik phung mda asei, kriê dlăng kơ diñu tui hriăm hlue si hdră êlan mơ̆ng Đảng leh anăn hdră bhiăn Knŭk kna.”

Să Ea M’Droh, Ea Mnang leh anăn Quảng Hiệp. Hlăm 2 thŭn êgao, mơ̆ng Hdră kñăm ala čar bi hrŏ ƀun kjăp, alŭ wăl đru 76 drei êmô mđai kơ 38 gŏ êsei mnuih ƀuôn sang. Kluôm să hrŏ leh 55 gŏ êsei ƀun, hlăm anăn mâo 44 gŏ êsei mnuih djuê ƀiă. Hlue si Trần Doãn Tới, Khua dlăng bruă Đảng să Ea M’Droh, dŭm hdră êlan mơ̆ng Knŭk kna dôk dưi pŏk ngă giăm hŏng klei čiăng grăp gŏ sang. Êngao kơ bruă sang čư̆ êa leh anăn dŭm êpul hgŭm, khua mduôn, khua ƀuôn, phung mâo kơhưm mâo bruă klam yuôm bhăn hlăm klei hlak mblang bruă dleh dlan ti nah gŭ, hâo hưn  mtrŭt mjhar, mjing klei sa ai mơ̆ng mnuih ƀuôn sang.

“Khua mduôn mđĭ lar ai tiê krŭ kdơ̆ng, lŏ dơ̆ng jing klei mkŏ mơ̆ng Đảng leh anăn bruă sang čư̆ êa alŭ wăl, mâo klei đru mguôp prŏng hlăm bruă ba hdră mtrŭn, hdră êlan mơ̆ng Đảng hlăm klei hdĭp hlăm dŭm klei bi kƀĭn ƀuôn, mtô mblang kơ phung anak čô. Đru mguôp hlăm hdră mkŏ mjing kđi čar ti alŭ, ƀuôn, mđĭ kyar bruă duh mkra ala ƀuôn leh anăn boh nik kriê pioh leh anăn mđĭ lar knhuah dhar kreh mnuih ƀuôn sang tinei. Anei jing gru mngač kơ phung mda asei ăt msĕ mơh mnuih ƀuôn sang hlăm ƀuôn tui hlue.”

Amâo djŏ knŏng yua klei blŭ, phung khua mduôn, phung mâo kơhưm hlăm dŭm ƀuôn sang Dak Lak lŏ mguôp hŏng bruă mtrŭt mjhar êpul êya hŏng klei mđĭ  kyar bruă duh mkra, mkra mđĭ klei hdĭp. Ti alŭ Phước Tân, să Tây Sơn,  La O Lanh, djuê ana Chăm, thŭn anei 74 thŭn, ăt gĭr mă bruă mkra mjing leh anăn hgŭm hlăm bruă mbĭt. Ñu mtrŭt mjhar mnuih ƀuôn sang bi hgŭm, bi grăng klei amâo thâo bi djŏ hlăm êpul êya, mbĭt anăn kriê dloăng, ba yua hdră mnêč leh anăn yua tŭ dưn lăn ala. La O Lanh lač, čiăng kơ mnuih ƀuôn sang đăo knang leh anăn hlue ngă snăn ñu pô brei bi hmô ngă êlâo, blŭ mâo mbĭt bruă ngă.

“Jing phung mâo kơhưm brei bi hmô, ba anăp kơ mnuih ƀuôn sang, hlăm êpul êya mnuih ƀuôn sang. Kâo khua thŭn leh ƀiădah ăt hgŭm mkra mjing čiăng mtrŭt mjhar mnuih ƀuôn sang bi hrŏ ƀun, gĭr mtrŭt mjhar hâo hưn čiăng kơ mnuih ƀuôn sang hlue ngă, hrăm mbĭt tlaih ƀun kjăp.”

           Dak Lak ară anei mâo 1.546 alŭ, ƀuôn, êpul mnuih ƀuôn sang hŏng 1069 čô mnuih mâo kơhưm hlăm êpul êya. Hŏng klei bi mguôp, thâo săng leh anăn mâo ƀruă klam hŏng ƀuôn sang, êpul anei mđĭ lar bruă klam mkŏ bruă sang čư̆ êa hŏng mnuih ƀuôn sang, đru gru hmô alŭ wăl 2 gưl hnưm ngă bruă tŭ dưn. Lương Nguyễn Minh Triết, Khua dlăng bruă Đảng čar Dak Lak bi mklă, hlăm wưng đĭ kyar mrâo, khua mduôn, khua ƀuôn, mnuih mâo kơhưm jing êpul yuôm bhăn hlăm bruă mkra mđĭ klei bi hgŭm djuê ana.

“Êpul mnuih mâo kơhưm hlăm êpul êya, khua mduôn, khua ƀuôn jing phung giăm mnuih ƀuôn sang hĭn, thâo săng mnuih ƀuôn sang hĭñ leh anăn ăt mâo klei blŭ tŭ dưn hŏng mnuih ƀuôn sang hĭn. Čar ăt čang hmăng êpul anei lŏ dơ̆ng mđĭ lar ai tiê bi hmô, păn kjăp boh klei mnuih ƀuôn sang. Klă sĭt jing klei mkŏ đăo knang plah wah gưl bruă Đảng, bruă sang čư̆ êa leh anăn mnuih ƀuôn sang čiăng mtrŭt mjhar mnuih ƀuôn sang hlue ngă hdră êlan mơ̆ng Đảng, hdră bhiăn Knŭk kna, mbĭt anăn lač kơ klei blŭ sĭt leh anăn klei čang hmăng mnuih ƀuôn sang hŏng Đảng  leh anăn knŭk kna dŭm gưl.”

Hdră mtrŭn 307 mơ̆ng Knŭk kna, mâo klei dưn yua mơ̆ng mlan 9 thŭn anei, lŏ dơ̆ng bi mklă klơ̆ng hdră êlan hŏng phung mâo kơhưm hlăm krĭng mnuih djuê ƀiă, boh nik bruă mkăp klei hâo hưn, mbŏ klei thâo mtrŭt mjhar êpul êya. Anei jing tur knơ̆ng kơ dŭm alŭ wăl lŏ dơ̆ng mđing uêñ, mđĭ lar bruă klam phung mâo kơhưm, đru diñu mâo thiăm klei găl hrăm mbĭt hŏng mnuih ƀuôn sang hlăm klei mđĭ kyar bruă duh mkra, bi hrŏ ƀun leh anăn mkŏ mjing klei hdĭp ƀuôn sang ƀrư̆ jăk siam hĭn.