Ti krĭng ktuê hang ksĭ čar Dak Lak mâo leh adiê hjan leh anăn angĭn êbŭ mơ̆ng mmăt 8/11. Ti anăp klei đăo knăl adiê hjan prŏng srăng đĭ, mnuih ƀuôn sang dŭm krĭng tlung ktuê hang krông Ba, krông Bàn Thạch leh anăn krông Cái bi leh dŭm boh sang ñĕ kơ êa lip. Sang mâo klei găl snăn mdơ̆ng knưl hlăm sang bi kjăp, gŏ sang dleh dlan hĭn ăt yua kyâo, anôk dôk ti anôk dlông hĭn hlăm sang. Nguyễn Chánh Hướng, ti wăl Chùa, alŭ Ngọc Phước, ƀuôn hgŭm Tuy Hòa, brei thâo:

"Snăn ară anei grăp čô ăt mkra knưl mđĭ gang mkhư̆ êa lip, huĭ snăk. Grăp boh sang mâo klŭng mdiê snăn klŭm hĕ, ba ti knưl ti dlông sơăi.”

Leh gưl êa lip thŭn dih ngă kơ dŭm êtuh ton mdiê jhat rai, thŭn anei, mnuih ƀuôn sang mđing kơ klei kriê dlăng mjeh mdiê leh anăn mnơ̆ng ƀơ̆ng mkăm pioh. Mdiê dưi dưm hlăm lu tal kdô ksu, kă kjăp leh anăn mđĭ ti anôk dlông. Êdeh p’phŭt, kdrăp điện tử, čhum ai, mŭng abăn,… ăt dưi kă hŏng kdô ksu čiăng mkhư̆ klei jhat rai tơdah êa mŭt hlăm sang. Ti dŭm krĭng huĭ êngăp êlam, bi ktlah hjăn, lu gŏ sang pral mprăp mnơ̆ng ƀơ̆ng huă djăp yua mơ̆ng 5 truh 7 hruê. Trần Tấn Mạnh, ti să Tây Hòa, brei thâo:

Mprăp mơ̆ng êa mnăm truh kơ dŭm mta mnơ̆ng ƀơ̆ng, dưm ti anôk thu  huĭ kƀah mnơ̆ng hlăk êjai adiê hlĭm hjan giăm truh."

Mơ̆ng klei mprăp mơ̆ng grăp gŏ sang truh kơ hdră msir mơ̆ng bruă sang čư̆ êa alŭ wăl, hdră “ tinăn” lŏ dơ̆ng dưi bi mklă jing bruă klam phŭn. Anôk bruă gĭt gai gang mkhư̆ sơ wil čar Dak Lak mtă kơ dŭm alŭ wăl mkŏ mjing hdră msir hŏng klei găl grăp krĭng, grăp gưl hnơ̆ng yan adiê ngă. Đỗ Hữu Huy, Khua Knơ̆ng bruă sang čư̆ êa čar Dak Lak mñă klă bruă klam mơ̆ng bruă sang čư̆ êa nah gŭ hlăm klei mkŏ mjing mdrơ̆ng hŏng yan adiê ngă:

Kâo mtă jing pă tinăn mtam: Gĭt gai tinăn, êpul tinăn, kdrăp mnơ̆ng tinăn leh anăn bruă đru nah tluôn tinăn, dăp bi jăk čiăng mâo hdră msir djăp ênŭm. Khua Knơ̆ng bruă sang čư̆ êa dŭm să, ƀuôn hgŭm jing pô đua klam kluôm, brei gĭt gai ti anôk mâo klei truh. Mbha bruă ngă bi kjăp ti grăp alŭ, anôk êdu awăt.”

Yan adiê ngă ƀrư̆ hruê ƀrư̆ dleh ktuê dlăng, đăo knăl. Klei mprăp mơ̆ng grăp gŏ sang, hŏng hdră msir mdrơ̆ng pral mơ̆ng bruă sang čư̆ êa nah gŭ, srăng đru mkhư̆ klei kdjăt, bi hrŏ klei kpĭ kơ êpul đru dŏng leh anăn bi hrŏ klei luč liê tơdah adiê hjan êa lip truh.