Tlam 9/11, Khua knŭk kna Japon Takaichi Sanae gĭt gai leh knăm drông kdrưh kơăm Khua gĭt gai Đảng, Khua lăn čar Tô Lâm. Leh knăm drông, Khua knŭk kna Japon leh anăn Khua gĭt gai Đảng, Khua lăn čar ngă khua êpul gưl dlông dua ala čar mkŏ mjing klei bi trông. Việt Nam leh anăn Japon  klă sĭt mkŏ mjing klei bi hgŭm thŭn 1973. Găn êbeh 50 thŭn mkŏ mjing klei bi hgŭm plah wah Việt Nam leh anăn Japon amâo mdei dưi mđĭ leh anăn đĭ kyar kluôm hlăm djăp mta bruă. Japon jing nanao sa hlăm dŭm ƀĭng hgŭm bruă duh mkra yuôm bhăn mrô sa leh anăn jing ala čar đru ODA lu hĭn kơ Việt Nam.

Ƀrư̆ hruê mâo lu anôk bruă duh mkra Japon hlăm dŭm mta bruă kdrăp mrâo, boh nik klei thâo anak mnuih mkra mjing AI, mđing leh anăn pŏk mlar bruă ngă ti Việt Nam. Dưi lač klei bi hgŭm Việt Nam-Japon dôk hlăm wưng đĭ kyar jăk siam hĭn, đăo knang kđi čar ktang. Japon sa ai hŏng Việt Nam kơ lu mta bruă hlăm klei bi kƀĭn dua tĭng leh anăn lu tĭng. Gưl Khua gĭt gai Đảng, Khua lăn čar Tô Lâm nao čhưn ti Japon dưi čang hmăng srăng mđĭ kyar bruă hlue ngă klei kuôl kă, ƀuăn rơ̆ng dưi mâo plah wah khua gĭt gai dua ala čar jing dŭm hdră bruă bi hgŭm klă sĭt hlăm dŭm mtta bruă. Mơ̆ng anăn, gưl nao čhưn srăng đru mguôp jăk hlăm bruă  hlue ngă dŭm klei kñăm đĭ kyar mơ̆ng grăp ala čar, ăt msĕ mơh hlăm klei êđăp ênang, bi hgŭm leh anăn mđĭ kyar  ti krĭng wăl leh anăn dlông rŏng lăn.