Khădah mŭt hlăm thŭn 75 leh ƀiădah Thông Long ăt mkăp jih ai tiê, klei gĭr kơ klei đĭ kyar mơ̆ng êpul êya mnuih Chăm ti alŭ Phú Thuận, să Hàm Thuận Bắc, čar Lâm Đồng. Amâo djŏ knŏng bi hmô nao êlâo hlăm klei mđĭ kyar bruă duh mkra, mkŏ mkra krĭng ƀuôn sang mrâo, Long lŏ bi lar bruă klam jing mta phŭn, hur har nao hgŭm hlăm bruă mkŏ mjing bruă kđi čar, djă pioh leh anăn bi lar dŭm boh tŭ dưn dhar kreh knhuah gru mơ̆ng mnuih Chăm. Khădah amâo mâo bruă păn klă klơ̆ng hlăm Bruă sang čư̆ êa, ƀiădah lu thŭn êgao, Long mâo mnuih ƀuôn sang hlăm alŭ đăo knang êjai mâo dŭm boh klei čiăng bi mgrăng, ruh mgaih.

 Thông Lạc, ti alŭ Phú Thuận, să Hàm Thuận Bắc brei thâo, mâo dŭm mta bruă Bruă sang čư̆ êa ka hmao thâo, Thông Long hmao hưn mthâo. Mâo dŭm klei amâo thâo bi djŏ dleh msir, ƀiădah kyua klei jih ai tiê leh anăn ngă djŏ klei bhiăn, ñu đru kơ dŭm tĭng thâo ƀuh klei blŭ mbĭt.

“Gŏ sang Thông Long mâo kơhưm tinei, bi Long jĕ giăm nanao hŏng mnuih ƀuôn sang, dŭm boh blŭ mơ̆ng ñu kyua bruă mbĭt alŭ ƀuôn kyuanăn grăp čô bi mđing hmư̆”.

 Thông Long, brei thâo, klei čiăng prŏng hĭn mơ̆ng ñu jing ƀuh mnuih ƀuôn sang hlăm ƀuôn bi mguôp sa ai hluê Knŭk kna, phung đăo mâo klei bi mpŭ kơ hdơ̆ng pô, ƀuh mnuih ƀuôn sang bi mguôp sa ai, ñu hơ̆k mơak êdi.

“Kâo nao mtrŭt mjhar mnuih ƀuôn sang hluê ngă hdră êlan mơ̆ng Đảng, klei bhiăn Knŭk kna, amâo mâo ngă soh hŏng hdră bhiăn lăn čar. Hlăm buôn mâo klei amâo thâo bi djŏ plah wah dŭm gŏ sang mâo ăt mbĭt hŏng êpul gĭt gai alŭ nao msir boh klei truh kơ knhal tuč”.

Ăt msĕ hŏng Thông Long, dŭm thŭn giăm anei, Huỳnh Cứng, k’iăng khua êpul gơ̆ng kiă klei đăo Balamon čar Lâm Đồng amâo djŏ knŏng hluê ngă jăk bruă klam hlăm klei hdĭp, klei đăo, ƀiădah lŏ hur har nao hgŭm hlăm dŭm hdră bruă ti alŭ wăl, jing kdrông mkŏ plah wah bruă Knŭk kna leh anăn mnuih ƀuôn sang.

Hŏng bruă klam jing k’iăng khua kiă Quản hạt Bắc Bình (alŭ wăl Bắc Bình, Bình Thuận hđăp), Huỳnh Cứng jing kmeh gơ̆ng hlăm gru hmô “Khua kiă klei đăo Balamôn nao hgŭm răng mgang klei êđăp ênang - kyua klei êđăp ênang ƀuôn sang”. Dŭm klei đru mguôp mơ̆ng ñu đru mđĭ klei bi mguôp plah wah Bruă sang čư̆ êa, êpul kahan ksiêm leh anăn mnuih ƀuôn sang Chăm.

 Huỳnh Cứng brei thâo, bruă răng mgang klei êđăp ênang jing bruă klam mbĭt mơ̆ng grăp čô mnuih ƀuôn sang, čiăng răng mgang klei êđăp ênang gŏ sang, êpul êya leh anăn buôn sang.

“Kâo pô srăng gĭr mbĭt hŏng Bruă sang čư̆ êa alŭ wăl, Êpul khua kiă kriê  alŭ Phan Hiệp mtrŭt mjhar mnuih ƀuôn sang răng mgang klei êđăp ênang brei jăk siam hĭn. Đăm brei ôh anak čô pô êdei anăp lĕ hlăm dŭm klei amâo jăk msĕ si mtiŏ êdeh, yua matŭi…sơnăn amâo mâo jăk ôh”.

Mnuih Chăm čar Lâm Đồng mâo êbeh 43.000 čô, hdĭp lu hĭn ti 9 să mâo: Tuy Phong, Liên Hương, Bắc Bình, Hồng Thái, Hàm Thuận Bắc, Hàm Thuận, Tân Thành, Sơn Mỹ leh anăn Tánh Linh. Êpul êya mnuih Chăm ti Lâm Đồng mâo dua êpul khua kiă klei đăo phŭn nao mbĭt hŏng klei đăo diñu mâo Êpul gơ̆ng khua kiă klei đăo Balamon leh anăn Êpul gơ̆ng klei đăo Islam čar Lâm Đồng.

Táo Thị Mộng Quyên, khua dhar bruă mặt trận să Bắc Bình brei thâo, phung khua kiă klei đăo hlăm mnuih Chăm hruê anei, amâo djŏ knong đru djă pioh knhuah gru dhar kreh djuê ana, ƀiădah lŏ jing êpul bruă yuôm bhăn hlăm hâo hưn, mtrŭt mjhar mnuih ƀuôn sang mđĭ kyar bruă duh mkra, mkŏ mjing klei hdĭp dhar kreh, răng mgang klei êđăp ênang leh anăn bi kjăp klei bi mguôp djuê ana.

“Dinu ăt bi êdah bruă klam pô hŏng sa čô khua kiă klei đăo. Êngao kơ bruă mtrŭt mjhar hluê ngă hdră bruă bi lông ktưn ti alŭ wăl, lŏ dưi bi lar bruă klam răng mgang klei êđăp ênang leh anăn msir boh klei ti nah gŭ. Đa đa phung khua kiă klei đăo ăt nao hgŭm hlăm êpul bi mgrăng ti alŭ, jing pô msir dŭm klei amâo thâo bi djŏ hlăm gŏ sang ăt msĕ mơh găp djuê, alŭ ƀuôn”.

Bơ̆k bâo kơ bruă klam phunug khua kiă klei đăo mnuih Chăm ti alŭ wăl, Võ Ngọc Hiệp, khua Bruă sang čư̆ êa čar Lâm Đồng mñă ktang:

“Hlăm bruă ktuê dlăng klei hưn ăt msĕ mơh bi trông hŏng phung hgŭm ti alŭ wăl ƀuh êpul êya mnuih Chăm, leh anăn wăt phung sư, phung khua kiă klei đăo, phung djă bruă jih ai tiê đăo knang hlăm klei gĭt gai mơ̆ng Đảng, klei ktrâo lač mơ̆ng Bruă sang čư̆ êa alŭ wăl, đăo knang hlăm dŭm hdră êlan mơ̆ng Đảng, mơ̆ng anăn klei sa ai hlăm bruă mă êlâo hĭn jing gĭr ktưn hlăm klei hdĭp tlaih ƀun, ƀrư̆ hruê ƀrư̆ đĭ kơ mdrŏng”.

Hŏng bruă klam pô, phung khua kiă klei đăo dôk mbĭt hŏng êpul kiă kriê dŭm alŭ, ƀuôn mâo êpul êya mnuih Chăm mơ̆ng čar Lâm Đồng ngă jăk dŭm hdră bruă ti alŭ wăl, bi mguôp dŭm êpul êya mnuih ƀuôn sang, đru mguôp hlăm hdră bruă mkŏ mjing Bruă sang čư̆ êa alŭ wăl dua gưl ƀrư̆ hruê ƀrư̆ kjăp ktang.