Knơ̆ng bruă sang čư̆ êa čar Lâm Đồng mtă kơ dŭm knơ̆ng, dhar bruă leh anăn bruă sang čư̆ êa 124 să, ƀuôn hgŭm, wăl krah Phú Quý ktuê dlăng kjăp dŭm klei hưn răng, hưn brei răng kơ klei yan adiê ngă; hmao hâo hưn kơ mnuih ƀuôn sang čiăng pral thâo gang mkhư̆, rơ̆ng klei êđăp ênang kơ mnuih leh anăn ngăn drăp. Êpul bruă djŏ tuôm kƀĭn ksiêm dlăng dŭm krĭng mnuih ƀuôn sang dôk ktuê hang ksĭ, ktuê hnoh krông, hnoh êa, krĭng êngăp êa leh anăn dŭm krĭng huĭ srăng êngăp êa, êa lêč, klưh hroh lăn. Anôk bruă gĭt gai lĭng kahan răng mgang klei êđăp ênang čar mkŏ mjing klei ngă bruă 24/24 mmông, krơ̆ng kjăp bruă tŭ mă klei hâo hưn klei truh mơ̆ng yan adiê ngă hluê hŏng êlan đĭng blŭ 112; mprăp djăp ênŭm êpul êya, kdrăp mnơ̆ng, mnơ̆ng yua hluê si hdră êlan "4 tinăn mtam", mprăp pŏk ngă bruă đru dŏng tơdah mâo klei truh.

Ti anăp klei arưp aram hjan prŏng, Bruă sang čư̆ êa čar Dak Lak ba mdah leh asăp mtrŭn mrô 6, mñă kơ dŭm anôk bruă, alŭ wăl čŏng hluê ngă hdră êlan gang mkhư̆, bi mdrơ̆ng hŏng hjan prŏng, êa lip lêč leh anăn klưh hroh lăn. Čar mtă kơ dŭm alŭ wăl ksiêm dlăng dŭm anôk arưp aram ktuê hnoh êa, hnoh krông, krĭng nah gŭ, alŭ wăl mâo klei arưp aram klưh hroh lăn čiăng čŏng mbĕ đuê̆ mnuih ƀuôn sang.

Dŭm êpul lĭng kahan, kahan ksiêm mprăp ênŭm mnuih mă bruă, kdrăp yua đru dŏng, ngă anôk găk răng ti dŭm anôk, ktang phĭt amâo mâo bruă mnuih ƀuôn sang leh anăn êdeh êdâo nao ti anôk arưp aram. Khua gĭt gai čar Dak Lak mñă kơ pô knơ̆ng kdơ̆ng êa, ngă djŏ hdră êlan bi êran, bi kna, rơ̆ng klei êđăp ênang kơ anôk bruă leh anăn krĭng nah tluôn. Bruă sang čư̆ êa să leh anăn dŭm anôk bruă djŏ tuôm čŏng pô mâo hdră nah tluôn, mnơ̆ng ƀơ̆ng huă leh anăn ênoh prăk đru kơ mnuih ƀuôn sang êjai mbĕ đuĕ mjêč kyua klei yan adiê ngă.