Êjai mâo knuă druh leh anăn lĭng kahan knông lăn nao truh ti ƀuôn mtrŭt mhar brei mkŏ mjing anôk dôk, mtô ngă lŏ, rông mnơ̆ng, klei hdĭp mnuih ƀuôn sang djue ana La Hủ ti ƀuô Pha Bu, să Pa Ủ, čar Lai Châu ƀrư̆ ƀrư̆ bi mlih. Hlăm hdră anăn, mduôn Ly Xạ Pu jing sa hlăm phung nao êlâo. Amâo mâo uêñ mđiă hjan, ñu nao truh grăp sang mtrŭt mjhar ƀuôn sang lui hdră bhiăn amâo mâo djŏ, bi doh ƀuôn sang, mă bruă knuă leh anăn răng mgang êlan knông lăn.

Pô srăng gĭr mtrŭt mjhar mnuih ƀuôn sang thâo săng, ya mta dưi ngă leh anăn ya mta amâo mâo dưi ngă. Čiăng rơ̆ng kơ klei hdĭp mnuih ƀuôn sang ƀrư̆ ƀrư̆ đĭ kyar, kyuanăn pô srăng gĭr jih ai tiê brei mnuih ƀuôn sang mă bruă knuă, mâo êsei huă, djam ƀơ̆ng. Kâo knŏng thâo gĭr hâo hưn, mtrŭt mjhar mnuih ƀuôn sang mă bruă jih ai tiê.

Mơ̆ng thŭn 2020 truh kơ ară anei, mduôn Ly Xạ Pu nao hgŭm dŭm êtuh klei hâo hưn ti dŭm ƀuôn krĭng knông lăn. Dŭm klei blŭ jĕ giăm anăn bŏ hŏng bruă klam mơ̆ng ñu đru bi mlih klei thâo săng mơ̆ng mnuih ƀuôn sang La Hủ.

Ară anei, ti  dŭm ƀuôn Pha Bu, Nhú Ma, Vạ Pù amâodah Tân Biên…, lu gŏ sang thâo ngă lŏ, thâo rông mnơ̆ng, pla ana êa drao, yua đĭng blŭ thâo mĭn čiăng bi čhĭ mnia. Phung hđeh dưi nao sang hră, blŭ klei Yuăn. Čiăng kơ mnuih ƀuôn sang tŭ leh anăn hluê ngă, gŏ sang Pu bi hmô nanao hlăm mđĭ kyar klei hdĭp gŏ sang, rông ŭn êmô, pla ana êa drao ti gŭ êyui dliê.

Tuôm jing gŏ sang ƀun ƀin, gŏ sang ayŏng Phàn Lê Sa êlâo dih knŏng knang kơ ƀiă sao lŏ sa yan. Hmưi klei mduôn Ly Xạ Pu, ñu jhŏng bi mlih jing pla ana quế, sa nhân. Leh dŭm thŭn mă bruă, êbeh 3ha quế mâo leh prăk ba wĭt, đru kơ gŏ sang tlaih ƀun.

Awa Pu jing pô jih ai tiê čiăng mđĭ ai, đru kơ mnuih ƀuôn sang mơ̆ng bruă điêt truh kơ bruă dleh dlan. Ñu hur har mtô kơ mnuih ƀuôn sang dŭm klei jăk hĭn leh anăn jêñ jêñ mtrŭt mjhar mnuih ƀuôn sang ngă jăk dŭm mta bruă mơ̆ng yang ƀuôn. Hmăng hmưi hlăm wưng kơ anăp ñu mâo thiăm klei suaih pral, gĭr hriê mtrŭt mjhar jêñ jêñ čiăng mnuih ƀuôn sang thâo leh anăn hluê ngă.

Kyua klei gĭr mơ̆ng gưl bruă Đảng nah gŭ, Bruă sang čư̆ êa alŭ wăl leh anăn phung mâo kơhưm msĕ si mduôn Ly Xạ Pu, ênoh gŏ êsei ƀun mơ̆ng să hrŏ adôk 64%, alŭ wăl ăt mâo êbeh 7/19 ênoh čuăn mkŏ mkra Krĭng ƀuôn sang mrâo.

Amâo djŏ knŏng jing pô mâo kơhưm, Ly Xạ Pu, lŏ jing kdrông mkŏ plah wah gưl bruă Đảng nah gŭ, Bruă sang čư̆ êa hŏng mnuih ƀuôn sang, mbĭt hŏng êpul lĭng kahan knông lăn răng mgang klei êđăp ênang, klei dưi kiă kriê knông lăn ala čar. Đao Văn Thức, k’iăng khua Êpul gơ̆ng bruă ƀuôn sang să Pa Ủ, čar Lai Châu brei thâo:

Ly Xạ Pu jing sa čô êdah êdi hlăm bruă bi hơĭt klei hdĭp, mtrŭt mhar mnuih ƀuôn sang bi doh ƀuôn sang, mđĭ kyar klei hdĭp mda. Gŏ sang ñu jing gŏ sang bi hmô, ngă bruă rông ŭn, êmô. Ară anei ñu lŏ dơ̆ng mtrŭt mhar mnuih ƀuôn sang bi mlih mơ̆ng ênhă lŏ amâo mâo tŭ dưn, jing pla dŭm mta ana mâo ênoh čiăng mđĭ kyar klei hdĭp mda.

Êbeh leh 70 thŭn, klei suaih pral amâo lŏ msĕ hŏng êlâo, ƀiădah mduôn Ly Xạ Pu ăt nao truh ti grăp ƀuôn, lač kơ mnuih ƀuôn sang hmưi hdră êlan mrâo, mtrŭt mjhar mnuih ƀuôn sang kriăng mă bruă knuă, răng mgang dliê, knông lăn. Sa klei hdĭp jih ai tiê kyua êpul êya, pô đảng viên mnuih djuê ana La Hủ anăn dôk hluê ngă gru mngač khua gĭt gai Hồ Chí Minh hŏng dŭm bruă klă klơ̆ng hĭn. Êlah pui ti cŏng čư̆ knông lăn, ñu ăt bi mđao ai tiê mnuih ƀuôn sang ƀuôn La Hủ kiêng yŭ Lăn čar.