Ti hdră bruă Sang hră gưl tlâo čiêm rông phung hđeh mnuih djuê ana ƀiă mlir gưl hriăm gưl 1 leh anăn gưl dua Sa Loong, să Sa Loong, dŭm êtuh čô mnuih mă bruă dưi mbha lu êpul, hrăm mbĭt pŏk ngă dŭm hdră bruă.

Ti dlông dŭm pruê̆ sang hriăm, mnuih mă bruă bi leh čuôr, ti gŭ, dŭm êpul phung mkra êa mil mjêč bi leh dŭm mtih knhal tuč. Hlăm dŭm adŭ hriăm, kdrăp ƀăng bhă, pui kmlă mtrang mngač, êñan, leh anăn dŭm kdrăp mnơ̆ng dôk dưi mkŏ dăp mđrăm mbĭt.

Anôk bruă rŭ mdơ̆ng hdră anei dôk pŏk ngă 5 êpul sang hră, 1 bĭt anôk sang phung nai bi kƀĭn, 1 êpul mkra mlih mbĭt hŏng dŭm mta bruă nah tluôn Hlue si hdră kčah, 5 êpul sang hriăm srăng ba jao êlâo kơ hruê 30/7; êpul Sang bi kƀĭn phung nai bi leh êlâo hruê 10/8; sang lu mta bruă leh anăn dŭm bruă adôk mĭn tĭng bi leh mơ̆ng hruê 15 – 20/8.

Adiê hjan sui hruê ngă hmăi truh kơ hdră rŭ mdơ̆ng. Čiăng msir mghaih, phung ngă mkra sang ƀaih gang ti lu krĭng, mbĭt anăn tiŏ nao thiăm mnuih mă bruă đru. Ară anei anôk dôk rơ̆ng hlăm brô 220 čô mnuih mă bruă, mă bruă hlăm brô 11h grăp hruê. Nguyễn Văn Nhất, K’iăng khua anôk bruă 29/7, hlăm Knơ̆ng bruă 319, Phŭn bruă lĭng kahan, bi mklă, anôk mă bruă bi mklă anei jing bruă klam kđi čar yuôm bhăn kyua anăn bi kƀĭn jih hnơ̆ng ai dưi, kdrăp yua čiăng rơ̆ng djŏ hdră kčah:

"10 hruê êgao, hjan lu êdi, Anôk bruă mphŭn pŏk ngă dŭm hdră msir mgaih, msĕ si guôm ƀaih jih jang dŭm anôk ti êngao. Bi hŏng anôk lăn dăp tur, êpul êya ngă leh leh anăn hlăk dôk mkra dua boh sang ƀaih, grăp boh sang hlăm brô 60 met, čiăng dưi ngă bruă hlăm klei hjan. Mĭn tĭng truh hruê 15/8 srăng bi leh jih jang adŭ hriăm leh anăn anôk dôk".

Ti Sang hră Knŭk kna čiêm rông phung hđeh mnuih djuê ƀiă mlir gưl sa–gưl dua Dục Nông, pô ngă bruă ăt dôk tiŏ nao mơ̆ng 250 truh kơ 270 čô mnuih ngă bruă nanao 3 blư̆ hlăm grăp hruê.

Hluê si hdră kčah, êlâo kơ hruê 31/7 srăng ba jao 7 êpul mta bruă mâo 3 êpul sang hră gưl 2, 3 êpul sang hriăm gưl 1 leh anăn sang phung nai bi kƀĭn; dŭm mta bruă mkăn msĕ si sang huă ƀơ̆ng, sang dôk srăng bi leh êlâo hruê 15/8.

Thượng tá Vũ Thanh Khương, Khua bruă Đảng, Khua êpul gơ̆ng kiă kriê knơ̆ng bruă duh mkra mnia mblei 319 Miền Trung (dôk hlăm êpul bruă mrô 319, Phŭn bruă lĭng kahan) brei thâo, kdrêč tal êlâo mơ̆ng hdră bruă dưi ngă leh. Ară anei dŭm êpul ngă bruă mđing kơ hdră bruă bi leh msĕ si măl êa mil, mkŏ dưm ƀăng bhă, kdrăp mnơ̆ng, mkra hŏng msei, boh tâo êñan leh anăn dŭm hdră bruă mkăn. Thượng tá Vũ Thanh Khương ƀuăn srăng ngă djŏ hdră kčah leh anăn hnơ̆ng jăk hdră bruă.

"Gir ktưn jao jih jang bruă kơ pô duh bi liê, ba yua êlâo kơ thŭn hriăm mrâo. Ară anei, hlăm anôk ngă bruă, pô ngă bruă kreh tiŏ nao mơ̆ng 250–270 čô mnuih mă bruă ngă bruă 3 blư̆ , lŏ mđĭ mmông mă bruă nanao. Knŏng hlăm mmăt mlam, grăp mmăt mâo mơ̆ng 50–80% čô mă bruă čiăng gĭr bi leh bruă knuă djŏ hŏng hdră kčah".

Hluê si Anôk kriê dlăng hdră duh bi liê Yŭ Quảng Ngãi, 4 bĭt sang hră knông lăn mâo Rờ Kơi, Sa Loong, Dục Nông lehanăn Mô Rai dưi ktuê dlăng nanao hlăm grăp hruê. Anôk kriê dlăng dăp knuă druh hdră mnêč dôk ti grăp anôk bruă čiăng hmao ruh mgaih klei dleh dlan, boh nik hlăm klei yan adiê amâo găl jăk.

Truh kơ ară anei, anôk hriăm Rờ Kơi mâo hlăm brô 90% hnơ̆ng hriăm, Dục Nông mâo 87%, Sa Loong mâo 82%, bi Mô Rai mâo 68%, jih jang dôk mŭt hlăm wưng bi leh. Võ Đại Tân, Khua êpul kiă kriê bruă duh bi liê Yŭ Quảng Ngãi brei thâo, mta kñăm jing ba yua jih 4 anôk sang hră hlăm klei mđrăm mbĭt êlâo kơ knăm pŏk thŭn hriăm 2026–2027, đru hluê ngă tŭ dưn Hdră mtrŭn mrô 71 mơ̆ng Phŭn bruă kđi čar kơ klei êdah kdlưn mđĭ kyar bruă sang hră leh anăn mtô bi hriăm, ƀrư̆ ƀrư̆ bi hrŏ êwang kpleh klei găl hriăm hră plah wah krĭng dleh dlan hŏng dŭm krĭng mkăn.

"Anei jing hdră bruă amâo djŏ knŏng ktưn bi leh ƀiădah brei bi leh čiăng rơ̆ng klei găl mtô bi hriăm phung hđeh, kyua anăn, klei kpĭ kơ hruê mmông jing prŏng snăk, boh nik hlăm wưng yan adiê dleh dlan.Anôk kriê dlăng ăt gĭr truh kơ hruê 31/7 srăng klă klơ̆ng bi leh dŭm hdră bruă rŭ mdơ̆ng, pơ̆ng čuôr leh anăn lŏ dơ̆ng mtrŭt bi pral čiăng kơ đa đa sang hră bi leh êlâo kơ hruê 15/8. Jih jang dŭm sang hră brei dưi mprăp djăp ênŭm, rơ̆ng mkăp kơ thŭn hriăm mrâo hluê si klei mtă mơ̆ng Gưl dlông".