Leh hmư̆ klei hâo mdah lehanăn dŭm klei blŭ hrăm, Khua gĭt gai Tô Lâm lač klă, bruă mdrơ̆ng hŏng yan adiê ngă mơ̆ng ară atruh kơ jih thŭn 2026 amâo mâo djŏ knŏng jing bruă čuăn knŏng mdrơ̆ng hŏng ya mta klei amâo mâo jăk, ƀiădah jing klei lông dlăng hnơ̆ng thâo mghaih msir, klei kiă kriê mơ̆ng êpul khua kiă kriê alŭ wăl. Khua gĭt gai mñă mâo 5 mta klei kčĕ prŏng, hlăm anăn ngă kjăp nanao bruă răng mgang klei hdĭp mnuih ƀuôn sang jing tal êlâo. Bi ngăn drăp dưi lŏ duah, pưk sang dưi lŏ mdơ̆ng, klei buh pla dưi lŏ kơrŭ bruă, ƀiădah klei hdĭp anak mnuih amâo mâo dưi lŏ bi hnô ôh.

Snăn jih jang hdră êlan, klei bi mklă mơ̆ng klei kiă kriê, bi dưn yua jih klei dưi, ai tiê dŏng mtlaih anak mnuih êlâo, boh nik mnuih mduôn khua lehanăn hđeh êlăk, phung mniê ba tian, mnuih amâo mâo jăk asei mlei, mnuih hdĭp hlăm krĭng huĭ hyưt, mƀĭt hŏng anăn, bruă gang mkhư̆ brei nao êlâo. Ñu mtă kơ dŭm phŭn dhar bruă, alŭ wăl brei mâo hdră kăp mdrơ̆ng hŏng klei jhat mơ̆ng El Nilno, klei không kƀah êa, klei trô̆ msĭn, klei pui ƀơ̆ng dliê, lehanăn mâo mơh dŭm hdră răng kơ angĭn êbŭ, êa lip lêč, klưh lăn, êa lip hlăm ƀuôn prŏng, klei klưh knơ̆ng kdơ̆ng êa, guê gang êa. Mâo jih hdră kơ grăp krĭng wăl, grăp êpul bruă, grăp alŭ wăl mnuih ƀuôn sang dôk anôk ênưih mâo klei kpĕ êka. Wưng anei, Khua gĭt gai Tô Lâm ăt mtă mđĭ hĭn klei đăo knăl, lehanăn klei mtă mtăn truh hŏng mnuih ƀuôn sang, hyuă kjăp klei bhiăn čuăl mkă, rŭ mdơ̆ng, răng mgang ngăn dŏ wăl hdĭp mda./.