Ti să Tuy An Đông, kahan ksiêm, lĭng kahan mbĭt hŏng Bruă sang čư̆ êa alŭ wăl tiŏ nao êdeh êdâo, kdrăp yua đru kơ dŭm gŏ sang mâo sang dôk hlăm hdră ktuê hang ksĭ mbĕ đuĕ truh ti anôk dôk mrâo. Khădah sang ka leh ôh, lu gŏ sang ăt čŏng pô mbĕ đuĕ, ba jao anôk ala čiăng kơ hdră hnưm ngă. Phạm Chí Bảo, ti să Tuy An Đông brei thâo, gŏ sang sa ai ba jao anôk ala hŏng klei hmăng hmưi êlan hnưm dưi bi leh, mkŏ mjing klei găl kơ êlan klông leh anăn alŭ wăl đĭ kyar.

 “Pô ăt čiăng hnưm ba jao anôk ala kơ Knŭk kna mkra êlan klông siam.

Čiăng rơ̆ng kơ hdră ba jao anôk ala hŏng boh taih êbeh 22km dôk ngă bruă, dŭm alŭ wăl dôk bi lar bruă klam nao êlâo mơ̆ng knuă druh, đảng viên. Gŏ sang Nguyễn Văn Hiếu, knuă druh să Tuy An Đông, jing sa hlăm dŭm gŏ sang čŏng mbĕ đuĕ wăt kơ klei tĭng mkă ka leh ôh:

 “Gŏ sang mrâo tĭng dlăng ƀiădah ăt mđĭ ai anak čô tŭ ư ba jao anôk ala hnưm čiăng kơ phung ngă bruă hluê ngă hdră mơ̆ng Bruă Đảng čar leh anăn Bruă sang čư̆ êa čar”.

Ară anei hdră duh bi liê bruă Knŭk kna ti alŭ wăl čar Dak Lak dôk êmưt kyua kpăk ruh mgaih anôk ala. Bi ti êlan dơ̆ng ktuê hang ksĭ mâo hlăm brô 1.500 gŏ sang hmăi kơ lăn ala, sang dôk. Kyuanăn, hdră bruă 30 hruê mlam dưi bi klă jing bruă klam phŭn mơ̆ng dŭm să, ƀuôn hgŭm dôk hdră găn nao. Mbĭt hŏng hâo hưn, dŭm alŭ wăl lŏ hluê ngă hdră đru, pah mnia hŏng dŭm gŏ sang ba jao anôk ala hnưm. Trần Văn Biên, khua Bruă sang čư̆ êa să Tuy An Đông brei thâo:

"Hâo hưn mkŏ mjing klei đăo knang hŏng mnuih ƀuôn sang leh anăn hâo mdah dŭm hdră êlan, klei pah mni hluê si klei bi klă mrô 26 mơ̆ng Bruă sang čư̆ êa čar, hlăm anăn mâo boh klei đru kơ dŭm gŏ sang ngă êlâo jing 8 - 15 êklăk prăk.”

Čar Dak Lak mdưm mta kñăm bi leh bruă ruh mgaih anôk ala êlan dơ̆ng ktuê hang ksĭ êlâo kơ hruê 31/8/2026. Bi kdrêč giăm 1km nah Dưr kan An Hải găn să Tuy An Đông bi leh êlâo kơ hruê 30/6 kơ anăp.

Čiăng rơ̆ng kơ hdră, dŭm anôk bruă srăng ngă lu hdră êlan. Nguyễn Khoa Anh, bi ala êpul kriê dlăng dŭm hdră rŭ mdơ̆ng alŭ wăl Ngŏ Dak Lak brei thâo:

 “Alŭ wăl ba jao anôk ala, êpul kiă kriê hdră srăng brei phung nao ngă bruă mtam, čiăng rơ̆ng hnơ̆ng jăk hdră.”

Hŏng klei gĭr mơ̆ng Bruă sang čư̆ êa leh anăn klei sa ai mnuih ƀuôn sang, hdră bruă mkŏ mjing klei mlih sĭt ti dŭm alŭ wăl ktuê hang ksĭ. Anôk ala dưi jao hruê anei srăng đru mkŏ mjing ktuê êlan ksĭ mrâo mrang, pŏk wăl anôk đĭ kyar mrâo kơ bruă duh mkra êa ksĭ Dak Lak hlăm wưng kơ anăp./.