VOV4.Êđê- 3 mlan akŏ thŭn 2021, prăk hrui wĭt ba čhĭ mnơ̆ng kơ ala tač êngao mơ̆ng Dak Lak knŏng mâo 95 êklăk USD, mâo 14,6% hdră kčah thŭn leh anăn hrŏ êbeh 20% mkă hŏng wưng anei thŭn dih. Sa hlăm dŭm mta phŭn ngă kơ mnơ̆ng dhơ̆ng ba čhĭ kơ ala tač êngao mơ̆ng Dak Lak hrŏ lu jing kyua hmaĭ mơ̆ng klei ruă Covid-19 tar rŏng lăn, dŭm knơ̆ng bruă hô̆ pui mdiăng mnơ̆ng dhơ̆ng container huâng čiăng jao kơ phung ba čhĭ mnơ̆ng kơ ala tač dưm mnơ̆ng.

Jing sa hlăm dŭm knơ̆ng bruă dôk tuôm hŏng klei dleh dlan kyua amâo dưi ba čhĭ mnơ̆ng dhơ̆ng kơ ala tač êngao, Nguyễn Xuân Lợi, khua gĭt gai knơ̆ng bruă duh bi liê lehanăn mđĭ kyar An Thái brei thâo: Ară anei, mâo lu gưl mnơ̆ng dhơ̆ng truh leh mmông ba jao kơ tuê ƀiădah adôk mâo klei dôk guôn hô̆ pui mdiăng nao. Amâo djăp Container lehanăn ênoh đĭ lu hĭn mơh. Lač klă mngač: Ênoh prăk čiăng nao truh ala čar Mi, Châu Âu đĭ truh kơ 3 blư̆ mkă hŏng êlâo, ênoh prăk klei dŭ mdiăng nao truh kơ dŭm ala čar alŭ wăl Ngŏ dhŭng Châu Á ăt đĭ truh kơ 25-40%

“Kƀah Container ngă kơ bruă dŭ mdiăng jing dleh hĭn lehanăn ngă truh kơ lu bruă mkăn. Tal sa jing bi kdung hruê mông dưm mnơ̆ng dhơ̆ng hlăm kdrŭn hô̆ pui ngă truh kơ ênoh prăk ăt đĭ, hruê mmông mưn mnuih mă bruă jing sui hĭn, kyuanăn prăk mưn jing đĭ mơh. Truh kơ hruê anei, knơ̆ng bruă thâo klă prăk mnga srăng trŭn lehanăn năng ai srăng lŏ brei thiăm prăk amâo ênŭm.”

Mnuih mă bruă Knơ̆ng bruă ba čhĭ mnơ̆ng kơ ala tač êngao 2-9 Dak Lak dưm mnơ̆ng hlăm hjiê bi ê ăt êlâo kơ ba čhĭ kơ ala tač êngao

Ăt lĕ hlăm klei anăn, Lê Đức Huy, k’iăng khua gĭt gai knơ̆ng bruă TNHH sa čô khua bruă mnia blei mơ̆ng ala tač êngao 2-9 brei thâo, hlăm 3 mlan akŏ thŭn anei, 2 mta mnơ̆ng dhơ̆ng ba chĭ kơ ala tač êngao mơ̆ng knơ̆ng bruă jing tiu lehanăn kphê mâo klei hrŏ kjham, hrŏ truh kơ 60% mkă hŏng thŭn leh êgao. Knơ̆ng bruă mâo leh lu klei hngah kơ dŭm hdră čiăng blei mnơ̆ng dhơ̆ng mơ̆ng ala tač êngao kyua mâo dưi mâo hô̆ pui mdiăng ba. Mâo wăt dŭm hră mơar dưi bi klă mơ̆ng thŭn leh êgao ƀiădah ka dưi ba truh mnơ̆ng dhơ̆ng kyua dôk guôn hô̆ pui mdiăng ba.

“Mơ̆ng jih thŭn 2020 truh kơ kŏ thŭn 2021 lehanăn truh kơ ară anei jing ênoh Container huâng amâo mâo ôh hlăm dŭm ala čar Châu Á snăn truh kơ ênoh đĭ hô̆ pui mơ̆ng Châu Á nao truh kơ Châu Mi lehanăn Châu Âu đĭ truh kơ 4 blư̆, lu hĭn  jing 6 blư̆. Mâo leh mnơ̆ng dhơ̆ng, tuê ăt čiăng kơ mnơ̆ng dhơ̆ng, ƀiădah leh ksiêm dlăng kơ ênoh prăk dŭ mdiăng mơ̆ng hô̆ pui, jih 2 nah mâo klei tŭ ư srăng bi kdung, kơyudah tơ dŭ mdiăng sơnăn amâo mâo djăp prăk ôh, mâo dŭm hră mnơ̆ng dhơ̆ng diñu mđuê̆ mơ̆ng 3 mlan tal 1 truh kơ tlâo mlan tal 3.”

Huỳnh Ngọc Dương, k’iăng khua gĭt gai knơ̆ng bruă tuh tia čar Dak Lak brei thâo. Alŭ wăl ară anei mâo 21 knơ̆ng bruă čhĭ mnia kơ tač êngao, hlăm 3 mlan akŏ thŭn anei, hnơ̆ng klei čhĭ mnia dưi mâo hlăm ƀrô 95 êklăk USD, hlăm ƀrô 14,6% mkă hŏng hdră êlan mâo leh lehanăn trŭn 20% mkă hŏng wưng anei thŭn 2020. Kyua klei čhĭ mnia ti êlan knông lăn mâo klei dleh dlan, čiăng dưi đru kơ dŭm knơ̆ng bruă, knơ̆ng bruă tuh tia mnia mblei čar Dak Lak ăt mtrŭt mjhar dŭm bruă bi mguôp, pŏk lar anôk mnia blei, kñăm hlăm klei ba yua kdrăp mrâo mrang điển tử kơ dŭm knơ̆ng bruă. Mbĭt hŏng anăn lŏ mă bruă hŏng phŭn bruă tuh tia mkŏ mjing hdră êlan mtrŭt mjhar bruă mnia blei čiăng dŭm knơ̆ng bruă hlăm čar dưi nao hlăm klei čhĭ mnia hŏng ala čar tač êngao ăt msĕ hŏng bruă tui duah dŭm êpul bruă duh mkra čiăng hrăm mbĭt tui duah hdră êlan djŏ:

“Hmei mâo leh klei mă bruă hŏng jing jang knơ̆ng bruă tuh tia hluê êlan knông lăn krĭng dưr, tui hluê anăn diñu srăng hưn brei dŭm klei mrâo, mnơ̆ng dhơ̆ng čiăng ti băng jang knông lăn čiăng dưi hmao mâo dŭm mnơ̆ng dhơ̆ng anei. Hlăm bruă mkăn hmei mâo leh klei blŭ hrăm hŏng dŭm knơ̆ng bruă ti dŭm băng jang  knông lăn srăng dưi đru kơ dŭm kơ̆ng bruă čar Dak Lak dưi mưn hjiê, mañ hjiê, đru hlăm bruă pŭ mđuê̆ tơdah mâo klei kpăk êgŭn êjai dôk ba jao mnơ̆ng dhơ̆ng ti băng jang knông lăn.” 

Pô mblang: Y-Khem Niê