Ti adŭ dôk mkă dlăng mrô 02, Aê mdrao Võ Hồng Khắc,  Khoa Vật lý trị liệu kơrŭ wĭt klei suaih pral, Sang êa drao amâo mâo jăk kŏ dlô čar Daklak (ƀuôn hgŭm Thành Nhất, čar Daklak) mâo mkă dlăng kčĕ brei, lehanăn čih ênoh êa drao kơ mnuih ruă. Aê mdrao Khắc brei thâo, klei mdrao mgŭn kơ mnuih ruă amâo mâo jăk kŏ dlô amâo mâo dưi jưh đei kơ hdră leh mâo hlăm hdră mdrao ôh, ƀiădah hlue ngă tui si klei mưng kjăp leh hlăm hdră mdrao mnĭ anei, kyuadah ênưih tuôm lĕ nanao hlăm klei amâo mâo jăk:“Hlăm klei dôk mdrao hmei bi mâo hdră ksiêm dlăng bi nik mnuih ruă, nao mŭt hlăm grăp boh adŭ mnuih ruă, mđĭ ai, mkă dlăng hlăm 8h grăp aguah, hmei dơ̆ng nao yơh truh hlăm grăp boh adŭ ksiêm dlăng lăn lehanăn mđĭ ai hlăm klei ƀơ̆ng huă aguah, si ngă mnăm êa drao leh hĕ, dôk mâo klei bi ƀuh, bi mhuĭ mơ̆. Hlăm klei mkă dlăng čuă êmuh mâo lu mnuih ruă amâo mâo dưi krơ̆ng ôh ai tiê pô ngă klei jhŏng bi kdơ̆ng hŏng nai êa drao tăp năng.”

 Kbưi hŏng Khoa Vật lý trị liệu lŏ kơrŭ wĭt klei suaih pral hlăm brô 50 met, jing sa đrông sang kjăp, mâo mnư̆ mnang, nai êa drao Phan Đình Tài hlăk dôk mkă dlăng hnơ̆ng êrah đĭ, lehanăn đru kơ sa čô mnuih ruă mnăm êa drao bi djŏ. Ti mra ñu adôk gru êka mâo mnuih ruă kĕ hlăk thŭn dih:“Hrue 4/8/2025, êjai kâo nao mkă hnơ̆ng êrah đĭ kơ sa čô mnuih ruă jing êkei, ñu hlăk đĭ ai tiê amâo mâo dưi krơ̆ng ôh klei mĭn, ñu kjač kĕ ti mra kâo, hiêk čhum ao kâo msĕ mơh. Kâo mâo klei huĭ mơh mmông anăn, mbĭt hŏng lu mnuih mă lehanăn djă kơ̆ng hĕ ñu, kâo nao plah čhum ao, rao hĕ anôk êka lehanăn mdei msăn bhiâo lŏ dơ̆ng nao mă bruă.”

Êbeh dua thŭn dôk mdrao mgŭn ti Khoa Vật lý trị liệu kơrŭ wĭt klei suaih pral, mơ̆ng sang êa drao mdrao klei amâo mâo jăk klei mĭn čar Daklak, Nguyễn Văn Tôn (ƀuôn hgŭm Đray Bhăng, čar Daklak) mâo leh âe mdrao Khắc lu nai êa drao mkăn bi dlăng kriê, tui ksiêm hlăm grăp hrue. Ñu kbiă hriê mơ̆ng klei khŏ kpiê, ngă luič klei mĭn, mâo lu blư̆ amâo mâo thâo săng ôh ya klei pô ngă. Ñu amâo mâo hdơr ôh dŭm blư̆ mâo phung aê dmrao, nai mdrao gĭr ktĭr mdrao mgŭn, răng kriê hlăm klei msĕ si bi čĭk, kñăm mâo klei êđăp ênang êjai mă bruă. Tôn lač, tơdah amâo mâo ôh klei thâo pap, lehanăn knhuah jih ai tiê hlăm klei mdrao mgŭn mơ̆ng phung nai aê mdrao, năng ai mmông anei ñu, amâo mâo thâo ôh si ñu srăng jing. Hlăm klei mơak ƀuh klei ruă pô hdjul leh, dơ̆ng kbiă wĭt yơh mơ̆ng sang êa drao, Tôn mgei ai tiê lač:“Kâo ƀuh phung nai aê mdrao ti sang êa drao jih ai tiê hur har, hlăm anăn mâo aê mdrao Khắc lehanăn nai mdrao Tài kđiăm êdi hlăm klei mkă dlăng, čuă êmuh lehanăn mđĭ ai kâo. Kâo čang hmăng kâo srăng dưi kăm lui klei mnăm kpiê, lŏ kơrŭ wĭt klei mĭn jăk, pral dưi wĭt hŏng găp djuê.”

 Sang êa drao mdrao klei amâo mâo jăk klei mĭn čar Daklak mkŏ mjing mơ̆ng thŭn 2008, hŏng 100 boh jhưng đih, mdrao kơ 100 čô mnuih ruă dôk đih mdrao ti sang êa drao. Thŭn 2025, êngao kơ êbeh 20.000 gưl čô mnuih ruă nao mkă dlăng. Sang êa drao lŏ kiă kriê truh 17.000 čô mnuih mâo klei bi knăl amâo mâo jăk kŏ dlô, klei ñŭt kƀla huĭ hyưt, lehanăn kreh bi kñhăk, tui si hdră ala čar kñăm kơ bruă mdrao mgŭn. Lu mnuih ruă dưi mdrao hlao, lŏ wĭt jăk hŏng găp djuê, kyua mâo phung aê nai mdrao jih ai tiê mơ̆ng mnuih mă bruă tinei. Siămdah, kyua bruă knuă, sang êa drao ăt tuôm nanao hŏng lu klei dleh dlan kơ mnuih mă bruă, kơ hnơ̆ng đru mdul, kơ klei bi kah mơ̆ng yang ƀuôn. Aê mdrao Nguyễn Thị Luyến, K’iăng khua kiă kriê sang êa drao akâo kơ dŭm hdră kñăm mđĭ hĭn boh tŭ mơ̆ng bruă mkă dlăng lehanăn mdrao mgŭn mnuih ruă hlăm wưng tinăp:“Ară anei, knơ̆ng bruă sang čư̆ êa čar Daklak mâo leh hdră êlan iêo jak ba yua hŏng phung aê mdrao, ti ênoh đru thiăm 5% ênoh prăk ƀơk hlăm grăp mlan, bi hŏng mnuih mkăn msĕ si nai mdrao, lehanăn kỹ thuật viên ka mâo ôh klei dưi dưn anăn. Hlăm sang êa drao mdrao mnuih khŏ, tui si kâo, anôk mă bruă jing dôk hlăm klei dleh dlan, suăi êmăn, kyuanăn sang êa drao mâo klei akâo kơ knơ̆ng bruă sang čư̆ êa čar bi mlih hdră êlan đru kơ nai mdrao lehanăn kơ kỹ thuật viên lehanăn mnuih mă bruă mkăn bi dưi dưn sơăi klei đru msĕ. Mơ̆ng anăn, kơh diñu srăng hơĭt ai tiê mă bruă hŏng sang êa drao, lŏ dơ̆ng dlăng kriê lehanăn mdrao mgŭn mnuih ruă.”

 Grăp hrue leh êgao, êpul phung nai aê mdrao ti sang êa drao mdrao mnuih mâo klei ruă amâo mâo jăk kŏ dlô čar Daklak ăt gĭr ktĭr hŏng sang êa drao hlăm klei mă bruă ktrŏ, anôk huĭ hyưt amâo mâo thâo ôh si klei jhat srăng truh hŏng pô, kyua mâo lu blư̆ mnuih ruă bi kdơ̆ng. Kyuanăn, hŏng bruă klam lehanăn klei hur har jih ai tiê mơ̆ng nai aê mdrao, diñu ăt gĭr ktir păn kjăp bruă knuă pô, jih ai tiê dlăng kriê mdrao mgŭn lu mnuih ruă ƀrư̆ ƀrư̆ hơĭt, dưi lŏ hƀuê wĭt klei mĭn, lŏ mâo wĭt hŏng găp djuê lehanăn ƀuôn sang./.