Bruă sang čư̆ êa čar Gia Lai mrâo ba mdah hdră êlan bi mlih tuôr aê mdrao wĭt mă bruă mâo wưng kčah ti dŭm anôk mdrao mgŭn să, ƀuôn hgŭm čiăng mđĭ hĭn bruă mdrao mgŭn nah gŭ leh anăn mđĭ hnơ̆ng kriê dlăng klei suaih pral mnuih ƀuôn sang. Hlue si hdră kčah, thŭn 2026 čar mĭn tĭng tiŏ nao 38 čô êa mdrao mơ̆ng dŭm sang êa drao, anôk mdrao mgŭn Knŭk kna kơ bruă đru kơ 30 să, ƀuôn hgŭm mâo klei čiăng mđing tal êlâo.

Ară anei kluôm čar mâo 135 anôk mă bruă mdrao mhŭn hŏng hlăm brô 370 anôk mdrao, ƀiădah ăt adôk 4 anôk ka mâo aê mdrao leh anăn 76 anôk ka dưi dăp êa mdrao mă bruă. Bruă mlih tuôr êa mdrao srăng đru rơ̆ng boh tŭ dưn klei mkă dlăng, mdrao klei ruă, đru bi hrŏ klei kpĭ kơ nah dlông hŏng dŭm klei ruă kreh mâo. Phung aê mdrao lŏ dơ̆ng nao hgŭm mtô kơ phung mdrao mgŭn nah gŭ. Hdră êlan mđing tal êlâo dŭm alŭ wăl krĭng tlaih kbưi, knông lăn leh anăn krĭng mnuih djuê ƀiă.

Bruă mdrao mgŭn čar Dak Lak dôk pŏk ngă Mlan ngă bruă ksiêm dlăng klei suaih pral grăp gưl kơ mnuih ƀuôn sang hlue si Hdră mtrŭn mrô 72 mơ̆ng Anôk dlăng bruă đảng gưl dlông. Hdră pŏk ngă leh anăn ksiêm mkă dlăng kơ phung khua thŭn dưi mkŏ mjing hrăm mbĭt ti ƀuôn hgŭm Tân An, ƀuôn hgŭm Tuy Hòa, să Krông Bông leh anăn să Đồng Xuân kñăm mă klei thâo êlâo kơ pŏk ngă hlăm kluôm čar mơ̆ng hruê 1/7.

Dŭm anôk mdrao mgŭn mprăp leh djăp mnuih mă bruă, kdrăp mnơ̆ng leh anăn kdrăp duh kơ bruă ksiêm mkă dlăng klei suaih pral. Êpul mđing tal êlâo mâo mnuih khua thŭn, mnuih mâo ai hŏng lăn čar, mnuih amâo jăk asei mlei, gŏ êsei ƀun, gŏ êsei giăm ƀun, mnuih mâo klei ruă amâo thâo hlao, mnuih djuê ƀiă leh anăn mnuih ƀuôn sang krĭng dleh dlan. Knơ̆ng bruă mdrao mgŭn mkŏ mjing leh hdră kčah klă klơ̆ng, mbha bruă klam kơ dŭm anôk bruă, rơ̆ng hdră dưi pŏk ngă tŭ dưn ti 102 să, ƀuôn hgŭm ti čar.