Mơ̆ng hrue 2/6, dŭm boh ƀuôn hgŭm, alŭ wăl knơ̆ng bi mkŏ mjing mkă dlăng klei suaih pral kơ phung hđeh kgŭ 6 thŭn; mđĭ hĭn klei hâo hưn, mtrŭt mjhar mnuih ƀuôn sang nao bi mkă dlăng klei suaih pral djŏ hŏng asăp mtrŭn. Dŭm boh sang hră mâo bi hgŭm hŏng dŭm boh sang êa drao, anôk bruă mdrao mgŭn mkŏ mjing bruă mkă dlăng klei suaih pral kơ phung hđeh hriăm hră, ngă bi leh ênoh kčah jao.

Čiăng kơ bruă mkă dlăng djŏ si hdră dăp, čar Lâm Đồng lŏ bi liê leh truh 200 êklai prăk ngă bruă mkă dlăng klei suaih pral amâo mâo mă prăk ôh kơ êbeh 3,24 êklăk čô mnuih hlăm thŭn 2026. Hlăm anăn, mta kñăm truh jih mlan 6 jing mâo mkă dlăng kơ giăm 1,26 êklăk čô mnuih, ênoh adôk srăng bi leh êlâo kơ hrue 31/12/2026.