VOV4.Êđê- Knăm bi jao bruă kơ khua lăn čar plah wah Khua gĭt gai Đảng, khua lăn čar êlâo dih Nguyễn Phú Trọng, kơ Nguyễn Xuân Phúc, khua hlăm phŭn bruă kđi čar, Khua lăn čar mrâo mkŏ mjing leh kdrăm k’ah ti anôk bruă khua lăn čar. Lŏ dlăng wĭt dua thŭn mkrah hlăm klei păn ngă khua lăn čar, êjai dôk găn lu klei dleh dlan, lu bruă ktrŏ, Khua gĭt gai Đảng ƀuh mâo leh lu klei gĭr ngă djăp ênŭm lehanăn tŭ jing djăp bruă čuăn, klei dưi tui si mta mtrŭn mơ̆ng hdră bhiăn phŭn, lehanăn hdră bhiăn knhŭk kna.

Ƀri wưng anei, Khua gĭt gai Đảng lač jăk kơ k’iăng khua lăn čar Đặng Thị Ngọc Thịnh, bi leh jăk bruă čuăn mâo kčah jao. Khua gĭt gai Đảng đăo knang, hŏng ai tiê mâo klei uêñ klam prŏng, Khua lăn čar Nguyễn Xuân Phúc, lehanăn k’iăng khua lăn čar Võ Thị Ánh Xuân srăng pral pai mă bruă mrâo, mâo dŭm klei kiă kriê siă suôr, pral, tŭ jing čiăng kơ adŭ bruă Khua lăn car lŏ dơ̆ng mâo klei thâo bi mguôp, sa ai tiê hrăm mbĭt, mlih mrâo hlăm klei mbruă, mkŏ mjing Đảng bộ lehanăn anôk bruă kjăp ktang kluôm ênŭm, bi leh jăk djăp mta bruă jao./.

Pô mblang: Y-Khem Niê