VOV4.Êđê- Aguah mbrue (29/3), bi hdơr 46 thŭn Hrue lăn čar mâo klei êngiê, ƀuôn prŏng Đà Nẵng mkŏ mjing Knăm bi êdah dŭm hdră mtrŭn, klei mtrŭn mơ̆ng knŭk kna, khua knŭk kna kơ bruă mđĭ kyar ƀuôn prŏng Đà Nẵng. Anăn jing, Hdră mtrŭn hlue ngă klei mklă mtrŭn mrô 119 mơ̆ng Quốc hội lông mkŏ mjing bruă sang čư̆ êa ƀuôn prŏng; mklă mklơ̆ng kơ bruă čual mkă kluôm ƀuôn prŏng, klei mtrŭn kơ hdră duh bi liê bruă rŭ mkra kdrŭn Liên Chiểu, lehanăn hdră brei klei dưi rŭ mdơ̆ng anôk bruă ngăn prăk ƀuôn prŏng Đà Nẵng.

Blŭ hrăm hlăm knăm anei, K'iăng khua knŭk kna Trịnh Đình Dũng lač, kle imklă mtrŭn mrô 119 mơ̆ng Quốc hội kơ klei lông mkŏ mjing bruă sang čư̆ êa ƀuôn prŏng, lehanăn hŏng dŭm klei bhiăn, hdră êlan hjăn kơ ƀuôn prŏng Đà Nẵng jing yuôm bhăn êdi. Anei jing knơ̆ng pioh mjing klei bhiăn pioh mđĭ kyar bruă mkŏ mjing sang čư̆ êa djŏ guôp hlăm klei mđĭ kyar ƀuôn prŏng Đà Nẵng./.

Pô mblang: Y-Khem Niê