VOV4.Êđê - Ti Hà Nội, Knơ̆ng bruă mnuih ngă bruă Việt Nam mkŏ mjing leh Knăm bi hdơr 135 thŭn Hruê Quốc tế mnuih mă bruă (01/5/1886 – 01/5/2021), mtrŭt mjhar Mlan Mnuih ngă bruă. Nao lehanăn blŭ hrăm ti knăm anei, Khua lăn čar Nguyễn Xuân Phúc lač klă, hlăm hdră mđĭ kyar mơ̆ng Đảng, Knŭk kna lehanăn mnuih ƀuôn sang drei mâo klei mđing dlăng kơ mnuih ngă bruă lehanăn dŭm êpul bruă công đoàn. Boh nik leh 30 thŭn mlih mrâo, mnuih ngă bruă hlăk dôk mă bruă hlăm lu mta bruă, hdră bruă duh mkra, jing êpul ba akŏ hlăm hdră bruă bi mrâo mrang ala čar lehanăn hluê ngă klei čang hmăng mơ̆ng djuê ana. Khua lăn čar bi mni kơ dŭm gưl bruă Công đoàn hluê ngă leh kjăp Asăp gĭt gai mơ̆ng Anôk kriê dlăng bruă Đảng mâo nanao klei gỉr ktưn, mĭn mrâo pŏk hluê ngă bruă ba wĭt klei tŭ dưn čiăng kơ giăm 10 thŭn êgao Mlan mnuih ngă bruă klă sĭt jing hruê m’ak kơ jih jang mnuih ƀuôn sang, mnuih mă bruă hlăm kluôm ala čar. Khua lăn čar bi mni kơ dŭm klei mĭn mrâo mơ̆ng phung đoàn viên, mnuih mă bruă hlăm kluôm ala čar kyua klei đĭ hriê kơ prŏng mơ̆ng anôk bruă duh mkra, êpul êya bruă lehanăn klei đĭ kyar mơ̆ng lăn čar. Mbĭt anăn mtă kơ êpul bruă công đoàn brei pral čih mkra hdră ngă bruă mơ̆ng anôk bruă Công đoàn Việt Nam hluê ngă jăk Hdră mtrŭn Klei bi kƀĭn tal 13 mơ̆ng Đảng rơ̆ng klei klă, tŭ dưn./.

Hlăm klei bi kƀĭn, bi ala kơ êpul gĭt gai mlan bruă ngă kơ klei êđăp ênang, bi mdoh bruă mă gưl dlông, khua phŭn bruă mnuih mă bruă lehanăn knap mñai Đào Ngọc Dung mâo leh klei mtrŭt mjhar kơ mlan bruă ngă kơ klei êđăp ênang, bi mdoh bruă mă thŭn 2021 hŏng kŏ: “mđĭ klei čih yap, ksiêm dlăng dŭm klei mâo, klei hmăi kơ klei êđăp ênang, bi mdoh bruă mă lehanăn klei nao hgŭm bruă êđăp ênang bruă bi mdoh bruă mă”. Mkŏ mkra mlan bruă ngă êđăp ênang lehanăn bi mdoh hlăm bruă mă thŭn 2021. Anôk bruă klei mă bruă Việt Nam gĭt gai leh kơ dŭm anôk bruă lŏ mđĭ hĭn bruă hâo hưn, mkŏ mkra dŭm klei bi lông lehanăn mđĭ boh tŭ dưn dŭm bruă ngă mơ̆ng mnuih ƀuôn sang kơ bruă êđăp ênang lehanăn bi mdoh bruă mă nao mbĭt hŏng bruă gang mkhư̆ klei ruă Covid-19. Êngao kơ năn, lŏ mđĭ klei đĭ kyar hlăm ênoh, mđĭ hnơ̆ng lehanăn boh tŭ dưn hlăm klei bi mdoh bruă mă hlăm dŭm anôk duh mkra, mâo klei pah mni kơ dŭm čô mnuih mă bruă mâo klei thâo, mâo hdră êlan bi mlih klei mkŏ mkra, bi mlih klei găl hlăm bruă mă, mđĭ hnơ̆ng mkŏ mkra mnơ̆ng dhơ̆ng lehanăn klei êđăp ênang - bi mdoh hlăm bruă mă. Mđĭ hĭn klei bi mguôp hlăm bruă ksiêm dlăng kơ bruă klei êđăp ênang bi mdoh bruă mă.

H’Nêč – H Zawut pô mblang