VOV4.Êđê- Aguah 9-4, K’iăng Khua knơ̆ng bruă sang čư̆ êa čar Lâm Đồng Phan Văn Đa mâo leh mmông bi tuôm leh anăn mă bruă hŏng khua bi ala Phần Lan Kari Kahiluoto.  Hlăm mmông bi tuôm, Khua bi ala Kari Kahiluoto bi trông, hưn mthâo dŭm klei mâo leh anăn klei găl bi hgŭm mơ̆ng Phần Lan hŏng Lâm Đồng msĕ si kriê dlăng êa doh leh anăn bi doh wăl hdĭp mda, msir mgaih djah djâo…

Khua bi ala ăt lač kơ bruă mđĭ klei bi hgŭm kơ hdră msir mgaih êa mơ̆ng Phần Lan hlăk mđing dlăng ti ƀuôn prŏng Bảo Lộc leh anăn bi êdah klei čang hmăng čar mđing dlăng mđĭ hluê ngă hdră bruă anei hlăm wưng kơ anăp. K’iăng Khua Knơ̆ng bruă sang čư̆ êa čar Lâm Đồng Phan Văn Đa bi mni lač jăk kơ gưl nao čhưn leh anăn bi trông kơ klei găl bi hgŭm mơ̆ng Khua bi ala leh anăn êpul bi hgŭm. Ñu ăt brei thâo, Lâm  Đồng ară anei hlăk gĭr ktưn mđĭ klei đĭ kyar hlăm lu mta bruă, hlăm anăn , mâo dŭm mta bruă čar Lâm Đồng hlăk čiăng klei đru kơ klei thâo leh anăn klei bi hgŭm duh bi liê mơ̆ng Phần Lan msĕ si mkŏ mjing ƀuôn prŏng thâo mĭn ti Đà Lạt leh anăn Bảo Lộc, kriê dlăng êa jua, msir mgaih êa djah yua aguah tlam, kriê dlăng răng mgang dliê hŏng kdrăp mrâo.

Pô mblang: H’Zawut Ƀuôn Yă