VOV4.Êđê - Djŏ tuôm kơ pô ruă Covid 19 ti čar Dak Lak, aguah hruê 13/5, Knơ̆ng bruă mdrao mgŭn čar Kon Tum brei thâo, Anôk bruă ksiêm dlăng klei ruă tưp čar bi mklă leh anôk čhĭ mnơ̆ng ti alŭ wăl ƀuôn prŏng Kon Tum, anôk mnuih ruă Covid 19 mrô 3237 čar Dak Lak mjưh ôtô blei mnơ̆ng hlăm ktuê êlan mơ̆ng Đà Nẵng wĭt kơ ƀuôn prŏng Ƀuôn Ama Thuôt hlăm hruê 6/5/2021. 

Leh mâo bi mklă anôk čhĭ mnơ̆ng mâo F0 Dak Lak mŭt blei, êpul djŏ tuôm čar Kon Tum hluê ngă leh hdră kwang dar êjai, hluê ngă hdră krih êa drao bi mdjiê kman ti anôk čhĭ mnơ̆ng mâo F0, F1 weh; truh mlam hruê 12/5 mkŏ mjing leh hdră bi ktlah 9 čô jing F1. Mbĭt anăn mâo bi mklă leh 202 čô jing F2, brei bi ktlah ti sang lehanăn ngă hră m’ar ksiêm dlăng klei suaih pral 40 čô jing F3. Ară anei, phung F1 at suaih pral, amâo mâo klei bi êdah mơ̆ng klei ruă Covid 19. Boh tŭ ksiêm dlăng tal 1 mơ̆ng Anôk bruă ksiêm dlăng klei ruă tưp čar Kon Tum hưn, 9 čô F1 amâo ƀuh ôh kman Sar CoV2 leh gưl ksiêm dlăng./.

H Nêč pô mblang