VOV4.Êđê - Mơ̆ng akŏ thŭn truh ară anei ti čar Kon Tum mâo leh 15 čô hđeh djiê mngăt hlăm êa pap mñai êdi. Hnơ̆ng phung hđeh djiê mngăt hlăm êa mâo lu brei bruă sang čư̆ êa, bruă djŏ tuôm alŭ wăl ngă bi klă mta phŭn leh anăn mâo hdră msir gang mkhư̆ tŭ dưn.

Mâo leh giăm sa mlan êgao mơ̆ng hruê 3 čô hđeh sang hră adŭ 5B, sang hră gưl sa Nguyễn Ngọc Bá, să Hoà Bình, ƀuôn prŏng Kon Tum djiê kyua mngăt hlăm êa, khădah, Đinh Công Hoàng, khua bruă Đảng nah gŭ lehanăn khua alŭ 5 ăt ka jih mơh klei kdjăt. Đinh Công Hoàng brei thâo, anôk mâo klei mngăt hlăm êa kơ 3 čô hđeh anăn jing sa ƀlŭng êa ti mnuôr anôk phưi êa mơ̆ng anôk mkăp êa Ia Băng. Truh kơ ară anei tơdah găn ti anôk anei ăt lŏ bi ƀuh klei hyưt huĭ kyua klei mngăt hlăm êa anăn: “Hruê anăn giăm mmăt leh nao hiu duah anak, duah čô. Leh hmư̆ klei arăng lač phung hđeh nao hlăp êlêñ ti đang ksu. Truh kơ đang ksu jĕ ƀlŭng êa anăn ƀuh êdeh wai jơ̆ng lehanăn čhum ao diñu lui ti năn, anăn lŏ iêu mthưr kơ găp djuê trŭn duah hlăm ƀlŭng êa anăn. Êa tăp k’ŭt đuič ƀiădah mâo buh jih tlâo čô mgăt hlăm anăn. Kdjŏng jih sa blư̆ sơnăn yơh. Kâo ênguôt dhuôt hlăm ai tiê amâo mâo lŏ thâo blŭ ôh.

Tĭng mơ̆ng kŏ thŭn truh kơ ară anei, ti čar Kon Tum mâo 15 čô hđeh mngăt hlăm êa. Hlăm anăn ti ƀuôn prŏng Kon Tum mâo 8 čô, kdriêk Đak Glei mâo 4 čô, kdriêk Dak Tô 3 čô leh anăn sa čô ti kdriêk Đak Hà. Klei anei brei ƀuh boh phŭn truh kơ klei mngăt êa kơ hđeh ti čar Kon Tum jing klei thâo săng hlăm yang ƀuôn kơ bruă gang mkhư̆ klei mngăt êa kơ hđeh ka kluôm êlam ôh, ƀiă klei duh mĭn, klei kriê dlăng kơ phung hđeh leh anăn lu hđeh amâo mâo thâo luê êa ôh. Ti anăp bruă hlăm alŭ wăl čar Kon Tum mâo lu klei mngăt hlăm êa mơ̆ng phung hđeh, Vũ Văn Đam, k’iăng khua anôk bruă răng mgang, kriê dlăng phung hđeh lehanăn klei mtăp mđơr mniê êkei, knơ̆ng bruă mnuih mă bruă lehanăn phung knap mñai čar Kon Tum brei thâo, anôk bruă anei dôk mđĭ lar bruă hâo hưn lehanăn hưn mthâo truh kơ dŭm anôk bruă čar Kon Tum čiăng gĭt gai bruă anei:Hmei lŏ mđĭ hĭn leh bruă hâo hưn čiăng mđĭ klei thâo săng kơ grăp gŏ sang, phung hđeh lehanăn yang ƀuôn srăng hrăm mbĭt răng mgang phung hđeh dêč đuê̆ kơ klei mgăt êa. Čar Kon Tum mâo leh hră klei gĭt gai mtrŭn kơ bruă sang čư̆ êa dŭm kdriêk, ƀuôn prŏng srăng duah ksiêm dlăng dŭm anôk mâo êa krông, ênao êa, blŭng êa lehanăn hnoh êa ka mâo ôh mdă bi knăl jing anôk êa êlam leh anăn amâo jăk. Ăt hâo hưn čiăng mđĭ klei thâo săng kơ mnuih ƀuôn sang msĕ si pô kiă kriê dŭm anôk mâo êa anăn.

Mbĭt hŏng bruă hâo hưn čiăng mđĭ klei thâo săng kơ bruă gang mkhư̆ klei mngăt êa kơ phung hđeh, bruă sang čư̆ êa lehanăn dŭm anôk bruă djŏ tuôm čar Kon Tum ăt dôk mđĭ bruă mtô klei luê êa kơ phung hđeh. Khădah boh tŭ dưn ăt dôk ƀiă kyua ti čar Kon Tum mâo ƀiă êdi anôk bi hriăm luê êa, hlăm anăn dŭm anôk bi hriăm luê êa hlăm sang hră mơ̆ng phŭn bruă sang hră mơar kiă kriê dôk kƀăh prăk kăk čiăng dưi ba yua.