VOV4.Êđê- Mâo êbeh 3.000 klei găl dưi mă bruă kơ phung đoàn viên, êdam êra, mnuih mă bruă čar Kon Tum hlăm Hruê mă bruă lehanăn mphŭn čô̆ kơ bruă thŭn 2021 mâo Knơ̆ng bruă mnuih ngă bruă, kahan êka êkeh lehanăn yang ƀuôn bi hgŭm hŏng bruă Đoàn čar Kon Tum mkŏ mjing hruê 27/4, ti ƀuôn prŏng Kon Tum.  Nao ti Hruê mă bruă lehanăn mphŭn čô̆ kơ bruă thŭn 2021, dŭm êtuh čô đoàn viên, êdam êra, mnuih mă bruă čar Kon Tum mâo đru kčĕ kơ hdră ruah bruă hriăm lehanăn bruă srăng mă.

Hlăm ênoh anei, mâo lu mnuih mă bruă dưi duah leh bruă mă djŏ guôp mơ̆ng 52 anôk bruă ruah mnuih nao ngă bruă. Khădah hmăi mơ̆ng klei ruă Covid 19, ƀiădah hlăm thŭn 2020 lehanăn giăm 4 mlan akŏ thŭn 2021, anôk bruă mnuih ngă bruă, kahan êka êkeh lehanăn yang ƀuôn čar Kon Tum ăt dưi msir mghaih bruă mă kơ êbeh 3.000 čô mnuih mâo bruă mă h’ĭt kjăp hlăm ala čar, 178 čô mnuih nao mă bruă mâo wưng kčah kơ ala tač êngao mbĭt anăn mkŏ mjing hdră đru kčĕ duah bruă mă kơ êbeh 10.000 čô đoàn viên, êdam êra, mnuih mă bruă ti krĭng ƀuôn sang./.

Pô mblang: H’Nêč Êñuôl