VOV4.Êđê- Hlăm ênoh giăm 357 êbâo čô mnuih ti čar Kon Tum hruê mgi, 23-5 ngă klei dưi, klei êngiê mơ̆ng pô hlăm hră mplĕ ruah pô bi ala Quốc hội gưl XV leh anăn HĐND dŭm gưl, wưng thŭn 2021-2026, mâo dŭm êbâo čô mnuih jing phung dưi yap jing mnuih Việt Nam leh. Diñu anei êlâo dih jing phung hiu dôk leh anăn bi dôk ung mô̆ amâo mâo hră bi mklă hlăm krĭng knông lăn Vịêt Nam – Lao, ƀiădah ară anei dưi yap jing mnuih Vịêt Nam hluê si klei kuôl kă plah wah knŭk kna dua ala čar. Êlâo kơ hruê ruah khua, pô čih klei mrâo Khoa Điềm, dôk jưh ti Lăn Dap Kngư nao leh ti kdriêk knông lăn Ngọc Hồi, čar Kon Tum bi tuôm hŏng phung anei leh anăn mâo klei čih.

Giăm truh kơ hruê ruah khua ngă pô bi ala Quốc Hội gưl 15 lehanăn HĐND dŭm gưl wưng thŭn 2021-2026, ung mô̆ ayŏng A Vơi lehanăn amai Y Quên, mnuih djuê ana Jeh Triêng dôk ti ƀuôn Đak Si, să Đak Dŭk, kdriêk Ngọc Hồi lŏ mâo klei mơak hĭn. Mbĭt hŏng bruă kih waih pưk sang, dua ung mô̆ ba kă hla čhiăm gru ala čar hrah ti anăp sang. Amai Y Quên brei thâo, jih 2 ung mô̆ ară anei mâo 27 thŭn, jih dua čô diñu mâo amĭ ama hriê mơ̆ng ala čar Lào dôk ti ƀuôn Đak Si mơ̆ng hlăk diñu dôk hđeh. Thŭn 2012, hŏng klei mtô mjuăt mơ̆ng bruă sang čư̆ êa lehanăn knơ̆ng bruă klei bhiăn hlăm alŭ wăl, jih 2 čô diñu mâo klei bi mklă yap jing mnuih Việt Nam lehanăn truh kơ klei bi kuôl jing ung mô̆. Hruê ruah khua 23/5, dua čô ung mô̆ nao plĕ hră gưl tal dua, bi sĭt klei dưi kơ pô lehanăn klei dưi êngiê mơ̆ng pô, sơnăn hlăm ai tiê diñu mơak sơnăk.

“Anei jing gưl tal 2 ung mô̆ hmei nao mplĕ hră ruah khua. Ung mô̆ kâo ƀuh klei mơak sơnăk. Êlâo dih ka mâo klei tŭ yap jing mnuih Việt Nam, ƀuh arăng nao mplĕ hră hmei ênguôt sơnăk. Dŭm hruê leh êgao mâo khua ƀuôn leh anăn knuă druh hlăm bruă sang čư̆ êa să nao hâo hưn kơ klei bhiăn hlăm bruă ruah khua, bi êdah kơ dŭm čô mgơ̆ng asei kơ ung mô̆ hmei thâo. Lehanăn hmei ăt nao ti sang roong hlăm ƀuôn čiăng lŏ thâo klă hĭn. Jih dua ung mô̆ hmăng hmưi truh kơ hruê ruah khua anăn sơnăk. ”

Gŏ sang A Vơi leh anăn Y Quyên yuôl hla čhiăm gru čar kwar hruê ruah khua

            Hlăm hruê ruah khua 23/5 ti să Đak Dŭk, kdiêk Ngọc Hồi, čar Kon Tum mâo kluôm ênŭm 410 čô mplĕ hră jing mnuih mơ̆ng ala tač êngao dưi tŭ yap jing leh mnuih Việt Nam mơ̆ng thŭn 2009 truh kơ thŭn 2020. Dŭm čô anei dôk hlăm 2 ƀuôn Đak Si lehanăn Đak Răng. Ƀloong Keo, jing sa čô mnuih ƀuôn sang ti ƀuôn Đak Si brei thâo, jing jang hmei dưi tŭ yap leh jing mnuih Việt Nam mâo sơăi klei êđăp ênang hlăm klei hdĭp, nao ruah khua jing bruă ngă yuôm bhăn dưi bi mklă mơ̆ng mnuih ƀuôn sang čiăng bi êdah bruă klam pô hŏng ala čar Việt Nam:

  “Tal êlâo hĭn jing Đảng, knŭk kna mâo klei uêñ mĭn lehanăn mprăp brei anôk dôk, anôk ƀơ̆ng huă kơ hmei, hmei mâo klei kriăng hlăm klei mă bruă, mâo pưk sang dôk jăk. Mnuih ƀuôn sang ti nei ngă jăk dŭm bruă hlăm klei êđăp ênang. Dŭm hdră êlan, hdră mtrŭn mơ̆ng Đảng, klei bhiăn ala čar Việt Nam dưi mâo klei hluê ngă djŏ. Mnuih ƀuôn sang dưi bi mklă jing mnuih Việt Nam mâo klei hơ̆k mơak hlăm mmông djă hră mplĕ ruah khua.”

Ung mô̆ A Vơi leh anăn Y Quyên dlăng klei hâo hưn kơ klei ruah khua ti Sang Roong ƀuôn sang

 Phạm Hải Châu, k’iăng khua bruă Đảng kdriêk, khua bruă sang čư̆ êa kdriêk, khua kiă kriê dhar bruă ruah khua ti kdriêk Ngọc Hồ, čar Kon Tum brei thâo, čiăng đru kơ dŭm čô mplĕ hră jing mnuih mơ̆ng ala tač êngao mâo klei bi mklă jing mnuih Việt Nam leh dưi thâo sang kluôm ênŭm kơ klei dưi, bruă klam ruah khua mơ̆ng pô, bruă sang čư̆ êa lehanăn dŭm êpul êya hlăm kdiêk mơ̆ng kŏ thŭn 2021 truh kơ ară anei hluê ngă jăk leh bruă hâo hưn hŏng hdră êlan “Nao truh grăp boh sang, bi tuôm hŏng grăp čô mnuih”. Kdriêk Ngọc Hồi ngă leh klei hâo hưn kơ bruă ruah khua, mâo klei uêñ mĭn hĭn kơ dŭm čô mnuih mơ̆ng ala tač êngao mâo klei bi mklă jing mnuih ƀuôn sang Việt Nam:

            “Phung hâo hưn lehanăn dŭm êpul êya knuă druh nao truh kơ grăp boh sang lehanăn hâo hưn hŏng boh blŭ mnuih ƀuôn sang hlăm alŭ wăl, čiăng kơ mnuih ƀuôn sang dưi thâo săng kơ klei bhiăn ruah khua ăt msĕ hŏng klei dưi, bruă klam jing sa čô mnuih Việt Nam hlăm bruă nao ruah khua jing Pô bi ala Quốc Hội gưl 15 lehanăn HĐND dŭm gưl. Hlăm klei hâo hưn klă mngač, mâo rup klă mngač lehanăn mblang klă, mnuih ƀuôn sang mâo klei hur har, klei đăo knang hlăm klei gĭt gai mơ̆ng Đảng lehanăn ngă djŏ klei dưi ruah khua mơ̆ng pô.”

Pô mblang: Y-Khem Niê