VOV4.Êđê -   Ti anăp klei ruă Covid-19 dleh ktuê dlăng, đaŏ knăl, čiăng pral gang mkhư̆, Knơ̆ng bruă sang čư̆ êa čar Kon Tum bi mklă mjưh mdei dŭm bruă ngă amâo yuôm ôh mơ̆ng krah mlam hruê 6/5. Hluê anăn, Knơ̆ng bruă sang čư̆ êa čar Kon Tum mtă kơ dŭm knơ̆ng, anôk bruă hlăm čar, Knơ̆ng bruă sang čư̆ êa 10 kdriêk, ƀuôn prŏng mơ̆ng krah mlam hruê 6-5 amâo mkŏ mjing ôh klei bi kƀĭn, bruă ngă bi kƀĭn lu mnuih amâo tŭ dưn. Dŭm anôk bruă mnia blei amâo tŭ dưn, ênưih tưp lar klei ruă Covid-19 brei mjưh mdei.

Hŏng dŭm anôk bruă mnia blei mnơ̆ng čiăng yua aguah tlam mkăn dưi brei ngă bruă ƀiădah brei ngă bi jăk dŭm hdră gang mkhư̆ klei ruă Covid-19, amâo bi kƀĭn lu mnuih. Ngă bi jăk bruă truă čhiăm guôm ƀô̆, mkă hnơ̆ng hlơr asei mlei, rao kngan bi doh hŏng êa drao mdjiê kman amâo dah kƀu… ti anôk lu mnuih leh anăn dŭm anôk bruă. Bruă sang hră mtô bi hriăm čar Kon Tum ăt bi mklă mlih hruê mmông ksiêm dlăng hnơ̆ng hriăm gưl II thŭn hriăm 2020-2021 dŭm gưl hriăm hnưm hĭn 1 hruê kăm mkă hŏng hdră kčah tal êlâo.

H Zawut pô mblang