VOV4.Êđê - Khădah dah ka mâo ôh mnuih ruă, ƀiădah ti anăp klei dleh dưi ksiêm dlăng mơ̆ng klei ruă tưp Covid-19, hruê mbruê 17/5, khua bruă sang čư̆ êa čar Kon Tum mâo klei bi mklă srăng mđĭ klei răng hlăm bruă gang mkhư̆ klei ruă tưp Covid-19 truh kơ hnơ̆ng kdlưn hĭn. Tui hluê anăn, srăng mđĭ hnơ̆ng klei răng mơ̆ng 12 mmông mmăt hruê 18/5 hlăm alŭ wăl.

Mbĭt hŏng bruă mtă kơ dŭm knơ̆ng, dhar bruă djŏ tuôm mâo klei mjêč mkŏ mjing bruă tui ngă jăk dŭm hdră êlan gang mkhư̆ klei ruă tưp, bruă sang čư̆ êa brei mnuih ƀuôn sang guôm ƀô̆ mta tơdah kƀiă đuê̆ mơ̆ng sang lehanăn dôk hlăm anôk mâo lu mnuih, tui ngă djŏ hdră êlan 5 klei bhiăn hlăm bruă gang mkhư̆ klei ruă mơ̆ng phŭn bruă mdrao mgŭn. Bruă sang čư̆ êa čar Kon Tum ăt mtă kơ bruă sang čư̆ êa 10 kdriêk, ƀuôn prŏng hlăm čar srăng mtrŭt mjhat kơ jih bruă kđi čar, dŭm êpul êya hlăm bruă ksiêm dlăng alŭ wăl, gŏ sang, mnuih ƀuôn sang čiăng dưi hmao ƀuh dŭm čô mnuih mâo klei đing jing mâo klei ruă tưp lehanăn dưi mâo dŭm hră êlan gang mkhư̆ klei ruă hŏng klei hmar.