VOV4.Êđê - Tlam hruê 11/5, hlăm klei bi kƀin trực tuyến 10 kdriêk, ƀuôn prŏng hlăm čar, Lê Ngọc Tuấn, khua bruă sang čư̆ êa čar Kon Tum, khua êpul gĭt gai bruă gang mkhư̆ klei ruă tưp covid -19 čar Kon Tum mñă klă, srăng Mprăp kơ anôk mă bruă, anôk huă ƀơ̆ng leh anăn hdĭp mda kơ dŭm čô ba anăp hlăm bruă gang mkhư̆ klei ruă tưp Covid-19.

Ti anăp klei dleh ksiêm dlăng mơ̆ng klei ruă tưp, čar Kon Tum dưi mâo 4 anôk gak, êpul lu dhar bruă hlăm 3 bĭt êlan dơ̆ng prŏng mrô 14, 24 leh anăn 40B. mbĭt anăn hlăm 2 bĭt anôk ti knông lăn mâo boh taih 292km knông hŏng ala čar Lào leh anăn Campuchia, êpul lĭng kahan bi mguôp hŏng knơ̆ng bruă gĭt gai lĭng kahan čar rơ̆ng kơ 70 êpul êya, anôk gak, mdrơ̆ng hŏng klei ruă Covid-19. Snăn bruă gang mkhư̆ klei ruă tưp Covid-19 ăt adôk kmô, khua čar Kon Tum mtă kơ dŭm kdriêk, ƀuôn prŏng srăng ba yua dŭm čô muih mâo leh, mbĭt hŏng anăn mâo klei nao blei mnơ̆ng dhơ̆ng yua hlăm anôk mă bruă, anôk huă ƀơ̆ng kơ dŭm čô mnuih nao gang mkhư̆ klei ruă tưp. Êngao kơnăn khua kiă kriê dŭm kdriêk, ƀuôn prŏng dưi blei mnơ̆ng yua êlâo, leh hưn mdah srăng mâo klei bi lar boh tŭ dưn hlăm klei yua leh anăn mâo klei yua sui čiăng mprăp kơ bruă gang mkhư̆ klei ruă tưp covid-19 hlăm alŭ wăl.

H Zawut pô mblang