VOV4.Êđê- Anôk bruă sang čư̆ êa čar Kon Tum mrâo mkŏ mjing Klei bi kƀĭn trực tuyến hŏng dŭm kdriêk, ƀuôn prŏng grăp gưl mlan 3 čiăng tĭng dlăng hdră mđĭ kyar bruă duh mkra – ala ƀuôn 3 mlan gưl 1, pŏk ngă bruă klam, hdră msir hlăm 3 mlan gưl 2. Hlăm 3 mlan gưl 1 thŭn 2021, khădah tlă anăp hŏng lu klei dleh dlan, lông dlăng kyua hmăi mơ̆ng klei ruă Covid 19, bruă duh mkra – ala ƀuôn čar Kon Tum ăt h’ĭt kjăp, đĭ kyar lehanăn dưi mâo lu boh tŭ dưn, rơ̆ng ngă jăk ‘’hdră kñăm mdua’’. Čiăng hluê ngă jăk dŭm mta kñăm, hnơ̆ng čuăn mđĭ kyar bruă duh mkra – ala ƀuôn thŭn 2021, hlăm 3 mlan gưl 2, Anôk bruă sang čư̆ êa čar Kon Tum ba mdah leh dŭm bruă klam phŭn. Pŏk ngă hdră kčah ngă bruă duh mkra pla mjing yan thŭn 2021, ksiêm dlăng ênhă lăn lŏ hma rơ̆ng dưi mâo djăp êa krih, mtrŭt mjhar mnuih ƀuôn sang bi mlih mnơ̆ng pla tŭ dưn, mprăp ana mjeh lehanăn dŭm klei găl mkăn čiăng ba pla 3 êbâo ha dliê lehanăn 5 êklăk ƀĕ ana kyâo mkăn ti alŭ wăl čar, gĭt ktưn dưi pla maoa 900 ha dliê./.

Pô mblang: H’Nêč Êñuôl