VOV4.Êđê- Mlan 4 mrâo êgao, Knơ̆ng bruă mặt trận čar kwar čar Kon Tum pŏk ngă klei mtrŭt mjhar kñăm bi mlih klei mĭn, hdră ngă mơ̆ng mnuih djuê ƀiă, đru kơ mnuih djuê ƀiă gĭr ktưn tlaih ƀun hơĭt kjăp”. Nao hlăm knăm pŏk ngă mâo khua gĭt gai čar, phung bi ala dŭm knơ̆ng, anôk bruă leh anăn 10 kdriêk, ƀuôn prŏng ti čar mbĭt hŏng êbeh 100 cô phung êdah kdlưn jing mnuih djuê ƀiă.

Čar Kontum mâo êbeh 53% ênoh mnuih jing mnuih djuê ƀiă hdĭp adôk lu klei dleh dlan. Mta phŭn dưi bi mklă jing kƀah klei thâo săng, klei mĭn adôk čang guôn klei đru brei mơ̆ng Knŭk kna; ka thâo ba yua kdrăp mrâo hlăm bruă pla mjing… Ară anei kluôm čar mâo êbeh 13.600 gŏ êsei ƀun jing mnuih djuê ƀiă truh giăm 94% ênoh gŏ êsei ƀun lehanăn êbeh 7.500 gŏ êsei giăm ƀun truh êbeh 90% mkă hŏng ênoh gŏ êsei giăm ƀun kluôm čar.

             Čiăng bi mlih klei mĭn, hdră ngă mơ̆ng mnuih ƀuôn sang djuê ƀiă, đru kơ mnuih djuê ƀiă gĭr ktưn kpưn đĭ tlaih kơ ƀun h’ĭt kjăp, Anôk bruă mặt trận čar Kon Tum bi mklă leh 5 bruă klam phŭn anăn jing: Hâo hưn, mtô mblang kơ dŭm hdră êlan, boh nik hdră mtrŭn kơ bruă lăn ala, bi hrŏ ƀun h’ĭt kjăp, mkŏ mkra krĭng ƀuôn sang mrâo truh kơ krĭng mnuih djuê ƀiă; Mtô mblang kơ hdră ngă bruă jăk, tŭ dưn; Ktrâo lač kơ mnuih ƀuôn sang ƀun lehanăn giăm ƀun ba yua tŭ dưn klei găl mâo mơ̆ng gŏ sang, phŭn mkăp prăk čan kñăm mđĭ kyar bruă duh mkra; Ktrâo lač kơ mnuih ƀuôn sang bi mlih dŭm mta mnơ̆ng pla, mnơ̆ng rông; Mtrŭt mjhar mnuih ƀuôn sang nao hgŭm hlăm dŭm êpul êya bruă pla ana mkra mjing êa drao, mđĭ kyar bruă ngă lŏ hma doh, ba yua kdrăp mrâo, nao hgŭm hlăm bruă pla, răng mgang lehanăn kriê dlăng dliê.

    Gru hmô pla ana êa drao ti gŭ êyu dliê krĭng mnuih djuê ƀiă ti kdriêk Kon Plông đru kơ mnuih ƀuôn sang mđĭ prăk hrui wĭt

Blŭ hrăm ti knăm anei, Nguyễn Văn Hoà – K’iăng khua bruă Đảng čar, Khua anôk bruă HĐND čar Kon Tum mtă: Dŭm gưl, dhar bruă, anôk bruă mặt trận dŭm gưl hlăm čar brei mâo hdră ngă bruă klă klơ̆ng, klă sĭt hĭn čiăng mđing dlăng kriê klei hdĭp mnơ̆ng dhơ̆ng lehanăn ai tiê klei mĭn kơ mnuih ƀuôn sang, thâo bi đru kơ mnuih ƀuôn sang tuôm hŏng klei dleh dlan hlăm klei hdĭp, boh nik jing mnuih djuê ƀiă, hdĭp ti krĭng taih kbưi… Ngă jăk hdră mtô mblang, mtrŭt mjhar, bi kjăp lehanăn pŏk mlar klei bi mguôp djuê ana. Mtô mblang mtrŭt mjhar mnuih ƀuôn sang dŭm djuê ana ƀrư̆ ƀrư̆ bi mlih klei mĭn, hdră ngă, lui hĕ klei bhiăn kthŭl mluk, thâo kơ hdră mkŏ mjing mă bruă knuă, đru kơ mnuih djuê ƀiă ƀun lehanăn giăm ƀun gĭr ktưn kpưn đĭ tlaih kơ ƀun knap h’ĭt kjăp. Nguyễn Văn Hòa lač, anei jing hdră mtrŭt mjhar prŏng mơ̆ng čar, kñăm rơ̆ng klei tŭ dưn klă sĭt brei mâo klei mđĭ lar, ba akŏ hlăm êpul knuă druh, Đảng viên lehanăn dưi bi mklă dŭm kdrêč bruă klă klơ̆ng:

“Tơdah drei mâo mta kñăm bi mlih klei mĭn, hdră ngă mơ̆ng mnuih  djuê ƀiă snăn brei drei kčưm hluê ngă mơ̆ng mnuih mâo k’hưm hlăm êpul êya ƀuôn sang. Lehkơnăn, phung knuă druh Đảng viên mnuih djuê ƀiă brei ba akŏ, hluê ngă êlâo. Jih anôk bruă kđi čar ngă bruă brei bi mklă nik hdră mĭn, hdră ngă čiăng kơ mnuih djuê ƀiă bi mlih amâodah gĭr ktưn tui ksiêm, êmuh hriăm tlaih kơ ƀun h’ĭt kjăp, đĭ mdrŏng kơ pô, kơ gŏ sang lehanăn kơ yang ƀuôn.

              Bi siñê klei bi lông hluê ngă klei mtrŭt mjhar “Bi mlih klei mĭn, hdră ngă mơ̆ng mnuih djuê ƀiă, đru kơ mnuih djuê ƀiă gĭr ktưn kpưn đĭ tlaih kơ ƀun h’ĭt kjăp’’

            Hdră mtrŭt mjhar mâo mta kñăm truh kơ thŭn 2025 mâo mơ̆ng 70% ênoh gŏ êsei mnuih djuê ƀiă ƀun, giăm ƀun bi mlih hdră mĭn, hdră ngă, ƀrư̆ bi mlih klei bhiăn kthŭl mluk, amâo lŏ čang guôn hlăm knŭk kna, gĭr asei pô kpưn đĭ tlaih kơ ƀun h’ĭt kjăp; Mâo 40% ênoh gŏ êsei thâo ba yua kdrăp mrâo hlăm bruă pla mjing; Êbeh 25% ênoh gŏ êsei mâo klei hdĭp ai tiê, mnơ̆ng dhơ̆ng dưi đĭ hĭn; Ênoh gŏ êsei ƀun, giăm ƀun jing mnuih djuê ƀiă hrŏ kah knar mơ̆ng 3 – 4 % grăp thŭn.

Mtrŭt mjhar ti knăm anei, Khua anôk bruă mặt trận čar Kontum lač klă: Hŏng klei čang hmăng đru kơ mnuih djuê ƀiă ti alŭ wăl čar mâo klei hdĭp dưi mđĭ hĭn, đru hluê ngă tŭ jing Hdră mtrŭn Klei bi kƀĭn bruă Đảng čar tal XVI, wưng thŭn 2020 – 2025 mâo kčah mtrŭn, Anôk kiă kriê bruă Đảng čar mâo leh Klei klah čŭn mrô 08 kơ hdră êlan pŏk ngă Klei mtrŭt mjhar “Bi mlih klei mĭn, hdră ngă mơ̆ng mnuih djuê ƀiă, đru kơ mnuih djuê ƀiă gĭr ktưn kpưn đĭ tlaih kơ ƀun h’ĭt kjăp’’ ti alŭ wăl čar. Hŏng boh tŭ yuôm anăn, Dhar bruă mặt trận čar mtrŭt mjhar leh knăm anei mbĭt anăn iêu mthưr dŭm gưl, dhar bruă, êpul bruă kđi čar – yang ƀuôn, mnuih djuê ƀiă, dŭm klei đăo hlăm čar hgŭm mguôp hŏng anôk bruă mặt trận hâo hưn, mtô mblang, mđĭ lar klei găl mâo, pral kdal, hŏng klei mĭn mrâo kñăm hluê ngă hdră mtrŭt mjhar.

Ti knăm mtrŭt mjhar ‘’Bi mlih klei mĭn, hdră ngă mơ̆ng mnuih djuê ƀiă, đru kơ mnuih djuê ƀiă gĭr ktưn kpưn đĭ tlaih kơ ƀun h’ĭt kjăp’’ ti alŭ wăl čar, Dhar bruă mặt trận čar Kon Tum mkŏ mjing leh Knăm bi klă Hdră hgŭm bruă pŏk ngă Knăm mtrŭt mjhar, wưng thŭn 2021- 2025 hŏng Anôk bruă sang čư̆ êa čar lehanăn bi mklă klei kuôl kă bi ktưn hluê ngă Hdră mtrŭt mjhar bi ktưn hluê ngă plah wah Anôk bruă mặt trận čar hŏng 10 kdriêk, ƀuôn prŏng./.

                                                    Pô mblang: H’Nêč Êñuôl