VOV4.Êđê- Hlăm dŭm mlan yan bhang không mrâo êgao êpul bruă djŏ tuôm, bruă sang čư̆ êa dŭm alŭ wăl, anôk bruă pô dliê leh anăn mnuih ƀuôn sang čar Kon Tum  gĭr jih ai tiê ngă sa blư̆ 2 bruă klam yuôm bhăn, anăn jing bruă gang mkhư̆ klei pui ƀơ̆ng leh anăn kriê dlăng răng mgang mnơ̆ng hlăm dliê.

Mơ̆ng êlâo kơ wưng Tết Nguyên đán Tân Sửu truh kơ ară anei êpul djă bruă lehanăn dŭm anôk bruă kriê dlăng dliê kmrơ̆ng, bruă sang čư̆ êa, yang ƀuôn, mnuih ƀuôn sang hlăm bruă kriê dlăng dliê kmrơ̆ng ti čar Kontum dôk ksiêm dlăng na nao huĭ dah mâo hĕ klei pui ƀơ̆ng. Ayŏng A Cường, ti ƀuôn Đak Kon, să Đak Rơ Nga, kdriêk Đak Tô brei thâo: Mnuih ƀuôn sang tŭ mă leh bruă kriê dlăng 270 ha dliê kmrơ̆ng mơ̆ng knơ̆ng bruă dliê kmrơ̆ng Đak Tô, dưi tŭ mă prăk mơ̆ng bruă kriê dlăng dliê kmrơ̆ng, kyuanăn hmei srăng mâo bruă klam hŏng dliê:

“Hmei dôk ksiêm dlăng 24/24 mmông huĭ dah mâo hĕ klei pui ƀơ̆ng dliê, hlăm wưng tết ăt nao ksiêm dlăng lehanăn êngao wưng Tết ăt ksiêm dlăng mơh huĭ dah mâo klei truh pui ƀơ̆ng dliê, grăp hruê mâo nanao bruă hiu ksiêm dlăng lehanăn jih jang mnuih mâo klei bi mlih bruă hiu ksiêm dlăng anei.” 

Ti knông lăn Ia H’Drai, anôk mâo 88 êbâo ha dliê lehanăn lăn dliê, Nguyễn Quốc Tuấn, khua hlăm bruă kriê dlăng dliê kmrơ̆ng ti kdriêk, brei thâo: “Kyua mâo adiê mđiă ktang sui leh anăn không kƀah êa kyuanăn klei pui ƀơ̆ng dliê jing ênưih êdi. Hmei ăt kñăm hlăm dŭm anôk mâo klei ênưih pui ƀơ̆ng hĭn lehanăn tui ksiêm dlăng hrue mlam mtam. Phung pô dliê ăt mâo dŭm êpul êya hlăm bruă răng mgang dliê kmrơ̆ng, Êpul êya anăn mâo bruă klam kriê dlăng dliê lehanăn mdrơ̆ng hŏng klei pui ƀơ̆ng dliê tơdah mâo. Êngao kơ hdră êlan bi mguôp hŏng dŭm êpul êya, bruă sang čư̆ êa hlăm dŭm alŭ wăl, Dŭm čô pô dliê lŏ tui ngă djŏ mdră mtrŭn dưi mâo klei ksiêm dlăng leh tui si 4 hdră êlan mprăp tơdah mâo klei pui ƀơ̆ng dliê.”

Bruă ngă ksiêm dlăng lehanăn răng mgang dliê ti čar KonTum hlăm dŭm hruê mmông leh êgao amâo djŏ ôh mjêč hjăn ti anôk lăn dliê. Hlăm dŭm klei bi kƀĭn trông kơ dŭm bruă răng mgang dliê kmrơ̆ng, ăt dưi bi êdah klă mngač ai tiê, anăn jing klei gĭr tĭr mơ̆ng dŭm čô khua gĭt gai ăt msĕ si dŭm anôk bruă djŏ tuôm hlăm bruă răng mgang ênhă dliê lehanăn lŏ wĭt pla dliê. Ti anôk bi kƀĭn bi mklĭn bruă ngă răng mgang, đĭ kyar kmrơ̆ng dliê thŭn 2020, dưi bi êdah leh dŭm bruă klam hlăm thŭn 2021 lehanăn dŭm thŭn kơ anăp. Khua bruă Đảng čar Kon Tum Dương Văn Trang mñă klă: Srăng jao bruă klam kơ dŭm anôk bruă Đảng nah gŭ, anôk bruă djŏ tuôm, alŭ wăl, pô dliê lehanăn srăng bi kmhal dŭm čô knuă druh, Đảng Viên ngă soh hŏng hdră răng mgang dliê kmrơ̆ng:

“Jih jang anôk bruă Đảng nah gŭ srăng mâo na nao dŭm bruă ngă gĭt gai, ktrâo êlan hlăm bruă răng mgang dliê kmrơ̆ng čiăng mâo boh tŭ dưn lehanăn pô gĭt gai dŭm anôk bruă Đảng nah gŭ srăng mâo klei ktrâo êlan, tơdah mâo bruă ngă ka djŏ, pô gĭt gai anăn srăng gui bruă klam êlâo hĭn. Bruă sang čư̆ êa čar, Bruă sang čư̆ êa kdriêk, Bruă sang čư̆ êa să, dŭm čô pô dliê mâo bruă klam  răng mgang dliê kmrơ̆ng srăng mkŏ mkra dŭm hdră êlan, gĭt gai klei nao ksiêm dlăng na nao. Tơdah mâo klei lu klei soh srăng gui bruă klam ti anăp bruă Đảng čar, ngă klei bi kmhal kơ dŭm cô knuă druh, Đảng Viên tơdah ngă soh hŏng hdră êlan ngă bruă răng mgang dliê kmrơ̆ng.”

Čar Kon Tum dôk mâo klei gĭr tĭr hlăm bruă ksiêm mgang giăm 549.000 ha dliê kmrơ̆ng, êbeh 61.600 ha dliê mrâo pla lehanăn dưm klei kñăm hlăm 5 thŭn ti anăp srăng lŏ dưi pla truh 15.000 ha dliê mrâo. Čiăng dưi ngă klei anei, sa hlăm dŭm bruă klam yuôm bhăn čar Kon Tum dôk mĭn tĭng jing lŏ bi lar dŭm boh tŭ dưn mơ̆ng hdră brei ngăn prăk hlăm bruă kriê dlăng dliê, răng mgang lehanăn lŏ mđĭ kyar dliê.

                                                    Pô mblang: H’Nêč Êñuôl