VOV4.Êđê- Ti čar Kon Tum hdră hâo hưn, mtô mblang kơ gưl ruah Pô bi ala Quốc hội gưl XV lehanăn HĐND dŭm gưl hlăk dôk mđĭ lar pral. Kyua ba yua lu hdră mtô mblang anăn mnuih ƀuôn sang ênưih thâo săng kơ boh tŭ lehanăn klei yuôm bhăn mơ̆ng hdră ruah khua ăt msĕ mơh klei dưi, bruă klam mơ̆ng pô hŏng bruă yuôm bhăn anei mơ̆ng djuê ana.

Hlăm dŭm hrue anei, jih jang 84 boh ƀuôn, anôk dôk ti 11 boh să, wăl krah hlăm kdriêk Đăk Hà djăp anôk mâo sơăi klei mtluk mtlak ai êwa kơ hrue mơak djuê ana, hrue ruah khua Quốc hội gưl 15, lehanăn HĐND djăp gưl. Aduôn Nguyễn Thị Thắm, Khua adŭ bruă dhar kreh- hâo hưn kdriêk Đăk Hà brei thâo, hlăm bruă hâo hưn kơ klei ruah khua tal anei, mbĭt hŏng jih jang hdră hâo hưn, kdriêk mđing dưn yua klei găl mơ̆ng kdrăp hâo hưn čiăng dưi đru kơ phung ƀuôn sang thâo ruah mă klei hâo hưn:

“Hmei ba yua kdrăp hâo hưn mrâo êjai ngă bruă anei. Phung ƀuôn sang dưi pŏk dlăng kơ jih jang klei hâo hưn bruă ruah khua mơ̆ng đĭng blŭ thâo mĭn hlăm grăp čô. Hmei lŏ hâo hư̆n hŏng Zalo; Facebook msĕ si boh klei mâo ti Đăk Hà, klei hưn mthâo kơ Đăk Hà, Đăh Hà 24h. Anăn yơh jing hla pŏk mâo dŭm anôk bruă, mơ̆ng êpul hâo hưn ngă leh, lehanăn kiă kriê bruă hâo hưn truh hŏng phung ƀuôn sang”.

 Hâo hưn ruah khua hlăm hla pŏk web hâo hưn kdriêk Đăk Hà

Bi klă bruă hâo hưn kơ klei ruah khua jing bruă čuăn kđi čar yuôm bhăn, bruă sang čư̆ êa mbĭt hŏng djăp êpul bruă djŏ tuôm hlăm kdriêk Đăk Hà mâo leh klei mđing uêñ yuôm bhăn kơ bruă anei. Aduôn Phạm Thị Thương, k’iăng khua knơ̆ng bruă sang čư̆ êa kdriêk Đăk Hà, k’iăng khua dhar bruă ruah khua kdriêk brei thâo, čiăng kơ phung ƀuôn sang ênưih mâo mă klei hâo hưn, kdriêk ngă leh klei hâo hưn kơ klei ruah khua hlue mdê bi akŏ, tui si kdrêč mdê mdê, lehanăn ngă hŏng lu hdră hâo hưn:

“Kdriêk mkŏ mjing leh lu bruă ngă, mta kñăm hlăm hdră mđung asăp, mđup rup hlăm kdriêk. Lehanăn bi lar hlăm hla pŏk điện tử, hlăm hla pŏk yang ƀuôn kdriêk mkŏ mjing leh. Dŭm anôk thơ̆ng kơ bruă anei hlăm dŭm să, wăl krah snăn bi hâo hưn hŏng êdeh, lehanăn hlăm hdră mđung asăp. Hâo hưn hŏng hdră bi mđĭ ai pano, apfič... Lehanăn kdriêk ăt mtă kjăp kơ phung knuă druh, mnuih ngă bruă lehanăn phung ƀuôn sang bi thâo săng hĭn, lehanăn păn kjăp djăp mta mtrŭn, mơ̆ng anăn pioh hlue ngă bruă čuăn ruah khua mơ̆ng pô, lehanăn čŏng pô nao ruah khua”.

 Hâo hưn ruah khua mơ̆ng kdrăp loa bi kčaĭ asăp ti kdriêk Đăk Hà

Kyua mâo ngă hŏng lu hdră, lu êlan snăn klei hâo hưn ênưih thâo săng, ênưih hdơr, mơ̆ng anăn jih jang mnuih hlăm kdriêk Đăk Hà thâo săng kơ klei ruah khua, kơ klei dưi, bruă klam mơ̆ng pô hlăm klei ruah khua. Trần Đình Vân 72 thŭn, sang ti êpul anôk dôk mrô 7, wăl krah Đăk Hà brei thâo, hlăm êpul anôk dôk anei jih jang mnuih thâo săng leh sơăi kơ klei ruah khua.

Êpul ksiêm dlăng, ktuê dlăng klei ruah khua mơ̆ng Dhar bruă mặt trận čar kwar gưl dông Việt Nam bi mni kơ bruă hâo hưn kơ klei ruah khua kdriêk  Đăk Hà

Hlăm dŭn hrue anei phung ƀuôn sang dôk bi trông kơ 8 čô pô mgơ̆ng ruah bi ala Quốc hội, 85 čô pô mgơ̆ng ruah HĐND gưl čar, 58 čô pô bi ala HĐND gưl kdriêk lehanăn phung mgơ̆ng ruah HĐND wăl krah čiăng truh ti hrue 23/5 kơ anăp dưi bi êdah yơh klei dưi, bruă klam mơ̆ng grăp čô mnuih hŏng hră pô plĕ:

“Thŭn anei mâo bruă yuôm bhăn anăn jing klei ruah phung bi ala Quốc hội, lehanăn HĐND djăp gưl. Hmei jing phung hdĭp hlăm alŭ wăl anôk dôk anei mâo klei mđing êdi, mâo mđing hmư̆ mơ̆ng lu anôk msĕ si: Hlăm hdră mđung asăp, mđup rup, ti anôk bi kƀĭn ƀuôn sang, hlăm anôk bi mguôp chi bộ, bi mguôp phung khua thŭn. Hlăm jih jang klei anăn, mơ̆ng bruă anăn bi lar truh kơ klei ruah phung bi ala Quốc hội lehanăn HĐND djăp gưl sơăi. Hmei mâo klei đăo knang srăng ruah mnuih mâo ai tiê, mâo klei thâo, mâo klei mĭn ênuah, lehanăn mâo k’hưm hŏng phung ƀuôn sang”./.

Pô mblang: Y-Khem Niê