VOV4.Êđê- Aguah mbrue (28/4), ti ƀuôn prŏng Kontum, HĐND čar kontum gưl 11 pŏk leh klei bi kƀĭn tal 12, ăt jing klei bi kƀĭn ksiêm wĭt wưng thŭn 2016 – 2021. Mơ̆ng akŏ wưng păn bruă truh kơ êlâo klei bi kƀĭn tal 12 ngă klei bi kƀĭn knhal tuič wưng păn bruă, HĐND čar kontum gưl 11 mkŏ mjing tŭ jing leh 19 klei bi kƀĭn, hlăm anăn mâo 11 klei bi kƀĭn si aguah tlam, lehanăn 8 klei bi kƀĭn truăn kơ bruă; mâo mtrŭn leh 299 hdra mtrŭn mjing knơ̆ng pioh kơ dŭm knơ̆ng dhar bruă djăp gưl hlue ngă. Jih jang hdră mtrŭn mơ̆ng HĐND čar mâo ngă leh jing djŏ hŏng hdră êlan mơ̆ng Đảng, knŭk kna, djŏ guôp hŏng alŭ wăl, pral dưi nao hlăm klei hdĭp, mâo leh phung duh mkra, phung ƀuôn sang hlăm čar mđing êdi.

Hlăm wưng dua hrue mkŏ mjing klei bi kƀĭn tal 12, HĐND srăng čar kontum gưl 11 srăng ksiêm dlăng 65 mta bruă, mâo 14 klei hâo mdah, lehanăn 51 hră mdah, klei čih mkra hdră mtrŭn. Hlăm anăn mâo dŭm bruă năng mđing êdi msĕ si: Kơ klei bhiăn hrui prăk tăk klei bi lông hrŏng ruah ti dŭm gưl hriăm, kơ klei đru phung duh mkra điêt, lehanăn man dưn hlăm čar Kontum wưng thŭn 2021 -–2025, kơ hdră êlan duh bi liê, bi mlih hdră êlan duh bi liê hŏng dŭm bruă amra ngă dôk hlăm klei dưi mơ̆ng HĐND čar./.

Pô mblang: Y-Khem Niê